ເມື່ອບໍ່ດົນມານີ້ ທາງພະແນກກະສິກຳ ແລະ ປ່າໄມ້ ແຂວງສະຫວັນນະເຂດ ຮ່ວມກັບເມືອງສອງຄອນ ໄດ້ຈັດງານວັນສັກຢາກັນພະຍາດສັດແຫ່ງຊາດ, ວັນຊົນລະປະທານແຫ່ງຊາດ, ວັນເປີດລະດູການຜະລິດລະດູແລ້ງ ແລະ ຊົມເຊີຍເມືອງສອງຄອນ ເປັນເມືອງເຂັ້ມແຂງຮອບດ້ານ (ງານປະກວດງົວງາມ ແລະ ວາງສະແດງສິນຄ້າກະສິກຳ-ຫັດຖະກຳ) ຊຶ່ງໄດ້ຈັດຂຶ້ນທີ່ເດີ່ນກິລາຂອງເມືອງສອງຄອນ ໂດຍການໃຫ້ກຽດເປັນປະທານຂອງ ທ່ານ ພູວັງ ເກດແກ້ວພົມພອນ ຮອງເລຂາພັກແຂວງ, ທ່ານ ຄຳຈັນ ສີດາວົງ ຫົວໜ້າພະແນກກະສິກຳ-ປ່າໄມ້ແຂວງ, ທ່ານ ພັອ ລຳຄູນ ວໍລະວົງ ເຈົ້າເມືອງສອງຄອນ ມີທ່ານກົງສູນໃຫຍ່ແຫ່ງ ສສ ຫວຽດນາມປະຈຳແຂວງ, ຕາງໜ້າຈາກກະຊວງກະສິກຳ-ປ່າໄມ້, ການນຳຈາກພະແນກການ, ກົມກອງຂອງແຂວງ, ການນຳບັນດາເມືອງ, ແຂກທີ່ຖືກເຊີນ, ນັກທຸລະກິດ, ຊາວກະສິກອນຕະຫຼອດເຖິງອຳນາດການປົກຄອງບ້ານ ແລະ ພໍ່ແມ່ນປະຊາຊົນຊາວເມືອງສອງຄອນ ທີ່ໄດ້ນຳພາສັດລ້ຽງຂອງຕົນເຂົ້າຮ່ວມຢ່າງເປັນຂະບວນຟົດຟື້ນ.
ທ່ານເຈົ້າເມືອງສອງຄອນ ກໍໄດ້ກ່າວເປີດພິທີຢ່າງເປັນທາງການ ຊຶ່ງຍົກໃຫ້ຮູ້ວ່າ: ຈຸດປະສົງໃນການຈັດງານຄັ້ງນີ້ ອັນທີ 1 ແມ່ນເພື່ອຈັດຕັ້ງຜັນຂະຫຍາຍກົດໝາຍວ່າດ້ວຍຊົນລະປະທານ ທີ່ໄດ້ກຳນົດເອົາວັນທີ 3 ພະຈິກຂອງທຸກໆປີ ເປັນວັນຊົນນະລະປະທານແຫ່ງຊາດ ຊຶ່ງເພື່ອລະນຶກເຖິງວັນດັ່ງກ່າວ ໃນແຕ່ລະປີທົ່ວປະເທດ ຕ້ອງສ້າງຂະບວນການເປີດນ້ຳ, ອະນາໄມຄອງເໝືອງ, ກວດກາລະບົບຫົວງານຊົນລະປະທານຕ່າງໆ ໃຫ້ຮັບປະກັນ ແລະ ກຽມພ້ອມໃນການສະໜອງນ້ຳໃຫ້ແກ່ການຜະລິດລະດູແລ້ງໃນແຕ່ລະປີໃຫ້ທັນລະດູການ, ອັນທີ 2 ເພື່ອຜັນຂະຫຍາຍກົດໝາຍວ່າດ້ວຍການລ້ຽງສັດ ແລະ ສະຕະວະແພດ ທີ່ໄດ້ກຳນົດເອົາວັນທີ 11 ພະຈິກຂອງທຸກໆປີ ເປັນວັນສັກຢາກັນພະຍາດສັດແຫ່ງຊາດ ຊຶ່ງທົ່ວປະເທດ ຕ້ອງໄດ້ມີການສ້າງຂະບວນການໂຄສະນາ, ປຸກລະດົມບັນດາຊາວກະສິກອນ ໃຫ້ຮູ້ເຖິງຄວາມສຳຄັນຂອງການສັກຢາກັນພະຍາດສັດ ແນໃສ່ຫຼຸດຜ່ອນການຕາຍຂອງສັດລ້ຽງ, ເຮັດໃຫ້ສັດມີສຸຂະພາບດີ, ຈະເລີນເຕີບໂຕ ແລະ ແຜ່ຜັນດີ, ອັນທີ 3 ກໍເພື່ອເປີດລະດູການຜະລິດລະດູແລ້ງ ທີ່ຖືເອົາວັນທີ 15 ພະຈິກ ເປັນວັນເລີ່ມຕົກກ້ານາແຊງ ເພື່ອປູກຈິດສຳນຶກ ແລະ ປຸກລະດົມການສ້າງຂະບວນການຜະລິດລະດູແລ້ງໃຫ້ບັນລຸໂຕເລກຄາດໝາຍ ໂດຍສະເພາະເມືອງສອງຄອນ ຈະສູ້ຊົນປູກເຂົ້ານາແຊງໃຫ້ໄດ້ໃນເນື້ອທີ່ 4.000 ເຮັກຕາ, ສະມັດຖະພາບໃຫ້ໄດ້ 5,2 ໂຕນຕໍ່ເຮັກຕາ, ອັນທີ 4 ກໍເພື່ອສະເຫຼີມສະຫຼອງເນື່ອງໃນໂອກາດທີ່ເມືອງສອງຄອນ ຖືກຮັບຮອງເປັນເມືອງເຂັ້ມແຂງຮອບດ້ານ ຕາມທິດວຽກງານ 3 ສ້າງ ທີ່ລັດຖະບານໄດ້ວາງອອກ. ພ້ອມນີ້, ທ່ານ ເຈົ້າເມືອງຍັງໄດ້ຮຽກຮ້ອງມາຍັງອຳນາດການປົກຄອງ, ພໍ່ແມ່ປະຊາຊົນ ກໍຄືຊາວກະສິກອນທັງຫຼາຍ ຈົ່ງຊ່ວຍກັນສືບຕໍ່ບຳລຸງ, ປົກປັກຮັກສາ ແລະ ປັບປຸງລະບົບຊົນລະປະທານເປັນຕົ້ນ: ເໝືອງ, ຝາຍ, ອ່າງເກັບນ້ຳ, ຈັກສູບນ້ຳ ໃຫ້ນຳໃຊ້ໄດ້ຍາວນານ ສາມາດຕອບສະໜອງນ້ຳໃຫ້ພຽງພໍເຂົ້າສູ່ການຜະລິດໄດ້ຢ່າງມີປະສິດທິຜົນດີ ແລະ ນຳໃຊ້ຢ່າງປະຢັດ ທັງຮຽກຮ້ອງໃຫ້ຊາວກະສິກອນນຳເອົາສັດຂອງຕົນໄປສັກຢາ ແລະ ຢອດຢາກັນພະຍາດແຕ່ລະຊະນິດໃຫ້ຄົບຖ້ວນ ແລະຖືກຕາມກຳນົດເວລາ ແລະ ໃຫ້ພ້ອມກັນເອົາໃຈໃສ່ໃນການຜະລິດລະດູແລ້ງໃຫ້ເປັນຂະບວນຟົດຟື້ນ.
ພາຍໃນງານ ກໍໄດ້ມີການປະກວດງົວງາມທີ່ມາຈາກຟາມລ້ຽງສັດ ແລະ ຄອບຄົວຕົວແບບລ້ຽງສັດ ພາຍໃນເມືອງສອງຄອນມີ 38 ໂຕ, ຄວາຍ 5 ໂຕ ແລະ ຈາກຕ່າງເມືອງ 2 ໂຕ, ລວມຈຳນວນທັງໝົດ 45 ໂຕ, ໃນນີ້ມີປະເພດງົວພື້ນເມືອງ 19 ໂຕ ແລະ ງົວພັນປັບປຸງ ຫຼື ພັນປະສົມ 21 ໂຕ. ພ້ອມນີ້, ກໍໄດ້ມີການມອບເງິນລາງວັນໃຫ້ແກ່ຜູ້ທີ່ຊະນະການປະກວດອັນດັບທີ 1-3 ທັງສອງປະເພດງົວ, ອັນດັບ 1 ໄດ້ຮັບ 3 ລ້ານກີບ, ອັນດັບ 2 ຈໍານວນ 2 ລ້ານກີບ ແລະ ອັນດັບ 3 ແມ່ນ 5 ແສນກີບ. ໂອກາດນີ້, ທາງໂຄງການພັດທະນາຊົນລະກະເສດ ແລະ ຊົນນະບົດຮອບດ້ານຮ່ວມກັບບໍລິສັດອິວຊຸງ-ດົງບຸ ຍັງໄດ້ມອບເງິນສົດ 20 ລ້ານກີບ ແລະ ແນວພັນເຂົ້າປູກ 2 ໂຕນ, ຝຸ່ນຊີວະພາບ 10 ໂຕນ ແລະ ຝຸ່ນເຄມີອີກ 5 ໂຕນໃຫ້ເມືອງສອງຄອນ.
ຫຼັງຈາກນັ້ນ, ຄະນະປະທານ ກໍໄດ້ຮ່ວມກັນສັກຢາ-ຢອດຢາກັນພະຍາດໃຫ້ສັດລ້ຽງຂອງປະຊາຊົນ, ທ່ຽວຊົມງົວງາມ-ຄວາຍງາມ, ຊົມການວາງສະແດງສິນຄ້າກະສິກຳ-ຫັດຖະກຳຂອງເມືອງ ແລະ ຍັງໄດ້ເດີນທາງໄປຮ່ວມເປີດນ້ຳຊົນລະປະທານ ທີ່ບ້ານທ່າຂາມລຽນນຳອີກ.
ຂ່າວ-ພາບ: ສະຫວັນນະເຂດ
ຄໍາເຫັນ