 |
ທ່ານ ຄໍາໄຕ ແກ້ວປະເສີດ ເລຂາຄະນະບໍລິຫານງານພັກເມືອງສຸຂຸມາ ໃຫ້ຮູ້ວ່າ: ໃນໄລຍະຜ່ານມາ ບ້ານແຊ ແມ່ນບ້ານໜຶ່ງທີ່ຍັງບໍ່ມີເສັນທາງທ່ຽວໄດ້ສອງລະດູ ແລະ ອີງຕາມການປະເມີນ ມາດຕະຖານພົ້ນທຸກ ແລະ ມາດຕະຖານພັດທະນາ ຕາມດໍາລັດ 348/ລບ ປີ2024 ແມ່ນຖືວ່າຍັງເປັນບ້ານທຸກຍາກ 1 ບ້ານຂອງເມືອງສຸຂຸມາ ເນື່ອງຈາກວ່າ ບ້ານແຊ ບັນລຸໄດ້ແຕ່ 6 ມາດຖານ ເທົ່າກັບ 75%, ບໍ່ບັນລຸ 2 ມາດຖານ ເທົ່າກັບ 25% ຄືມາດຖານທີ 4ມີເສັ້ນທາງຄົມມະນາຄົມ ແລະ ຂົນສົງທີ່ສາມາດທຽວໄດ້ຕະຫຼອດປີ. ມາດຖານທີ 6ເຂົ້າເຖິງການຊື້-ຂາຍ ແລກປ່ຽນສິນຄ້າຢ່າງເປັນປົກກະຕິ. ຕະຫຼອດໄລຍະຜ່ານມາຄະນະພັກ-ຄະນະນໍາເມືອງສຸຂຸມາໄດ້ຖືເອົາວຽກງານກໍ່ສ້າງຮາກຖານ ການເມືອງ, ວຽກງານພັດທະນາຊົນນະບົດ-ແກ້ໄຂຄວາມທຸກຍາກ ແລະ ວຽກງານ 3 ສ້າງເປັນວຽກງານຍຸດທະສາດ, ເຮັດຢ່າງມີຈຸສຸມ ແລະ ຕໍ່ເນື່ອງ, ຊຶ່ງໄດ້ກຳນົດອອກໃນມະຕິ ກອງປະຊຸມໃຫຍ່ ຂອງອົງຄະນະພັກເມືອງຄັ້ງທີ IX ຢ່າງຈະແຈ້ງ ຮອດປີ 2029 ເມືອງສຸຂຸມາ ຈະສູ້ຊົນລຶບລ້າງບ້ານທຸກຍາກ, ຄອບຄົວທຸກຍາກໃຫ້ໄດ້ 100% ຊຶ່ງປັດຈຸບັນພາຍໃນເມືອງມີບ້ານທຸກຍາກຍັງເຫຼືອ 1 ບ້ານ ຄືບ້ານແຊ ແລະ ຄອບຄົວທຸກຍາກທົ່ວເມືອງມີຈຳນວນທັງໝົດ 988 ຄອບຄົວ 10.37%.
 |
ການສ້ອມແປງເສັ້ນທາງເຂົ້າບ້ານແມ່ນນໍາໃຊ້ງົບປະມານຂອງແຂວງໂຄງການກໍ່ສ້າງເສັ້ນທາງດັ່ງກ່າວໄດ້ເລີ່ມຈັດຕັ້ງປະຕິບັດນັບແຕ່ວັນທີ່ 28 ມິຖຸນາປີ 2025 ຊຶ່ງແມ່ນບໍລິສັດ ເອສເອເຄ ສໍາຫຼວດອອກແບບກໍ່ສ້າງຄົບວົງຈອນ ຈຳກັດຜູ້ດຽວ ເປັນຜູ້ຮັບເໝົາ ມູນຄ່າ 4.99 ຕື້ກ່ວາກີບ, ເສັ້ນທາງຍາວ 6 ກິໂລແມັດ,ກ້ວງ 6 ແມັດ. ມາຮອດປັດຈຸບັນສຳເລັດປະມານ 44.6%, ຄາດໝາຍຈະໃຫ້ສໍາເລັດ 100% ພາຍໃນຕົ້ນເດືອນ ກຸມພາປີ 2026ນີ້.
ທ່ານ ບີ້ ບຸນຈະເລີນ ເລຂາພັກບ້ານນາຍບ້ານໆແຊ ກ່າວວ່າ: ການທີ່ບ້ານໄດ້ຮັບການຊ່ວຍເຫຼືອຈາກພັກ-ລັດ ຂັ້ນເທິງແມ່ນສຸດທີ່ມີຄວາມພາກພູມໃຈດີໃຈ ທີຈະໄດ້ເສັ້ນທາງດີເປັນໃບໜ້າໃໝ່ຂອງບ້ານ, ທັງສະໜອງຂໍສະດວກຫຼາຍຢ່າງເປັນຕົ້ນ: ຄວາມສະດວກໃນການໄປມາ, ການຊື້ຂາຍ, ສາທາລະນະສຸກ, ການສຶກສາ ແລະ ທັງເປັນການລົບລ້າງບ້ານທຸກຍາກຕາມມາດຖານ ກ້າວໄປສູ່ການພັດທະນາບ້ານພັດທະນາປະຊາຊົນຢູ່ດີກິນດີ.
 |
ບ້ານແຊຂຶ້ນກັບ ກຸ່ມບ້ານທີ2 ຂອງເມືອງສຸຂຸມາ ຫ່າງຈາກເທດສະບານເມືອງໄປທາງທິດ ຕາເວັນຕົກປະມານ 21 ກິໂລແມັດ, ເປັນເຂດທົ່ງພຽງ ເໝາະສົມແກ່ການປູກເຂົ້າ, ພືດລະດູແລ້ງ, ລ້ຽງສັດ ແລະ ອື່ນໆ, ມີເນື້ອທີ່ທັງໝົດ 5,500 ເຮັກຕາ, ມີພົນລະເມືອງທັງໝົດ 668 ຄົນຍິງ 311 ຄົນ, ມີ 180 ຫຼັງຄາເຮືອນ, ມີ 143 ຄອນຄົວ, ປະຊາຊົນມີມູນເຊື້ອດຸໝັ່ນ ຫ້າວຫັນໃນການອອກແຮງງານ ຖືອາຊີບປູກຝັງ ແລະ ລ້ຽງສັດເປັນຕົ້ນຕໍ, ຄ້າຂາຍເປັນອາຊີບສໍາຮອງ.
(ຂ່າວ-ພາບ: ຈັນທະວີສັກ)
ຄໍາເຫັນ