 |
ໂຄງການດັ່ງກ່າວ, ແມ່ນຢູ່ພາຍໃຕ້ການຄຸ້ມຄອງຂອງອົງການພັດທະນາ ແລະ ບໍລິຫານຕົວເມືອງ ແຂວງ ໃນຖານະເຈົ້າຂອງໂຄງການ, ໂດຍໄດ້ລົງນາມໃນສັນຍາຮັບເໝົາ ສະບັບເລກທີ 303/ອພບຕ, ລົງວັນທີ 4 ເມສາ 2025 ກັບ ບໍລິສັດ ມິດມີໄຊ ກໍ່ສ້າງສ້ອມແປງຂົວ, ທາງ, ເຄຫາສະຖານ ແລະ ຊົນລະປະທານ ເປັນຜູ້ຊະນະການປະມູນ ຕາມຂໍ້ຕົກລົງ ສະບັບເລກທີ 359/ອຊ, ລົງວັນທີ 25 ມີນາ 2025. ໂຄງການນີ້, ມີມູນຄ່າການກໍ່ສ້າງ ທັງໝົດ 1,682,989,000 ກີບ, ໂດຍນຳໃຊ້ແຫຼ່ງທຶນ ຈາກງົບປະມານຂອງລັດຖະບານ 100% ໄລຍະເວລາໃນການຈັດຕັ້ງປະຕິບັດຕົວຈິງແມ່ນເລີ່ມແຕ່ ວັນທີ 1 ເມສາ ຫາ ວັນທີ 30 ມິຖຸນາ 2025 ເປັນເວລາ 3 ເດືອນ, ຊຶ່ງການຕິດຕັ້ງສຳເລັດຕາມກຳນົດເວລາທີ່ລະບຸໄວ້ໃນສັນຍາ.
ການຕິດຕັ້ງລະບົບກ້ອງວົງຈອນປິດຄັ້ງນີ້, ກວມເອົາ 13 ຈຸດ, ຈຳນວນ 37 ກ້ອງ ທົ່ວເທດສະບານເມືອງໄຊ, ໂດຍສະເພາະແມ່ນ ຈຸດ 4 ແຍກ, 3 ແຍກ ແລະ ສະຖານທີ່ສຳຄັນທາງຍຸດທະສາດ ຊຶ່ງຈະຊ່ວຍໃນການຕິດຕາມການສັນຈອນຂອງພາຫະນະ ແລະ ເຫດການອື່ນໆ ໃຫ້ມີຄວາມປອດໄພ ແລະ ສະດວກສະະບາຍ ໃນການບໍລິຫານຈັດການຕົວເມືອງໃຫ້ມີປະສິດທິພາບຫຼາຍຂຶ້ນ. ໂຄງການນີ້, ເປັນບາດກ້າວສຳຄັນໃນການພັດທະນາ ແຂວງອຸດົມໄຊ ໃຫ້ກາຍເປັນເມືອງທີ່ທັນສະໄໝ ແລະ ປອດໄພ, ສ້າງຄວາມເຊື່ອໝັ້ນ ແລະ ຄວາມອຸ່ນໃຈ ໃຫ້ແກ່ປະຊາຊົນ, ພ້ອມທັງເປັນເຄື່ອງມືຊ່ວຍເຫຼືອການເຮັດວຽກຂອງເຈົ້າໜ້າທີ່ໃນການ ຕິດຕາມ ແລະ ຮັກສາຄວາມສະຫງົບ ຮຽບຮ້ອຍ ພາຍໃນສັງຄົມ ແລະ ເປັນສ່ວນໜຶ່ງຂອງການພັດທະນາຕົວເມືອງ ໄປສູ່ການເປັນເມືອງທີ່ທັນສະໄໝ ໂດຍການນຳໃຊ້ເຕັກໂນໂລຢີເຂົ້າມາຊ່ວຍ ໃນການບໍລິຫານຈັດການ ແລະ ຍົກລະດັບມາດຕະຖານໃຫ້ສູງຂື້ນ.
 |
(ຂ່າວ: ແສງອາທິດ)
ຄໍາເຫັນ