ທ່ານ ເສນ ພັນລັກ ໄດ້ກ່າວເປີດພິທີວ່າ: ໃນທົ່ວແຂວງ ໄຊຍະບູລີມີສວນກ້າເບ້ຍທັງໝົດ 60 ແຫ່ງ (ລັດ 12 ແຫ່ງ, ລວມໝູ່ (ປະຊາຊົນ) 34 ແຫ່ງ ແລະ ບໍລິສັດ 14 ແຫ່ງ). ໃນນີ້, ເກັບແກ່ນພັນໄມ້ ແຜນການ 1,920 ກິໂລ, ເກັບໄດ້ຕົວຈິງ 4.360 ກິໂລ ທຽບໃສ່ແຜນການປະຕິບັດໄດ້ 227%, ຜະລິດເບ້ຍໄມ້ ແຜນການ 2,400,000 ເບ້ຍ, ຜະລິດໄດ້ 2,712,597 ເບ້ຍ ທຽບໃສ່ແຜນປະຕິບັດໄດ້ 113.02%. ມາຮອດປັດຈຸບັນໄດ້ປູກໄມ້ ກ່ອນພິທີເປີດ ໃນວັນທີ 1 ມິຖຸນາ 2025, ມີເນື້ອທີ່ 845.31 ເຮັກຕາ, ເບ້ຍໄມ້ 900,467 ເບັ້ຍ, ມີ 976 ຕອນ, ວຽກງານກະກຽມການປູກໄມ້ ທົ່ວແຂວງໄຊຍະບູລີ ໃນປີ 2025 ອີງຕາມຕົວເລກແບ່ງປັນຂອງກະຊວງກະສິກໍາ ແລະ ປ່າໄມ້ ແມ່ນ 3,560 ຮຕ, (ໃນ 3 ປະເພດປ່າຄື: ປ່າປ້ອງກັນ 130 ຮຕ, ປ່າສະຫງວນ 159 ຮຕ ແລະ ປ່າຜະລິດ 3.220 ຮຕ) ແລະ ນອກ 3 ປະເພດປ່າແມ່ນ 51 ຮຕ.
ສໍາລັບໃນວັນປູກຕົ້ນໄມ້ແຫ່ງຊາດຄື: ວັນທີ່ 1 ມິຖຸນາ 2025 ທົ່ວແຂວງ ລວມມີ 11 ເມືອງ, ມີເນື້ອທີ່ຈະປູກ ທັງໝົດ 53.23 ເຮັກຕາ, 28,859 ເບ້ຍ, ມີຈໍານວນ 33 ຕອນ; ເພື່ອໃຫ້ບັນລຸຄາດໝາຍຕ້ອງສູ້ຊົນເຮັດໃຫ້ເນື້ອທີ່ຂອງປ່າໄມ້ປົກຫຸ້ມກວມເອົາ 70% ຂອງເນື້ອທີ່ປ່າໄມ້ທັງໝົດ. ດັ່ງນັ້ນ, ແຜນປີ 2025 ນີ້, ທາງເມືອງໄຊຍະບູລີຈະໄດ້ອອກແຮງສູ້ຊົນປູກໄມ້ 390 ເຮັກຕາ, ຂຶ້ນທະບຽນສວນປູກປ່າໃຫ້ໄດ້ 150 ເຮັກຕາ, ຟື້ນຟູປ່າໄມ້ໃຫ້ໄດ້ 3,127 ເຮັກຕາ ເຊັ່ນ: ປ່າປ້ອງກັນ 964 ເຮັກຕາ , ປ່າສະຫງວນ 350 ເຮັກຕາ, ປ່າຜະລິດ 1,714 ເຮັກຕາ ແລະ ນອກສາມປະເພດປ່າ 100 ເຮັກຕາ,ໂດຍຫ້ອງການກະສິກໍາ ແລະ ປ່າໄມ້ເມືອງຈະເປັນໃຈກາງປະສານງານນໍາບັນດາໂຄງການ ແລະ ຂະແໜງການສາຍຕັ້ງເພື່ອສະໜອງເບ້ຍໄມ້ໃຫ້ໄປປູກໃນແຕ່ລະບ້ານ, ແຕ່ລະເຂດຕາມແຜນການ, ຊຶ່ງໃນສົກປີນີ້, ທາງເມືອງກ້າເບ້ຍໄມ້ໄດ້ທັງໝົດ 55,771 ເບ້ຍ. ຈາກນັ້ນ, ການນໍາຂອງແຂວງ, ຂອງເມືອງ ແລະ ພະນັກງານ ກໍໄດ້ເຂົ້າຮ່ວມປູກຕົ້ນໄມ້ຢູ່ທີ່ອານຸສາວະລີຂອງແຂວງ, ເດີ່ນກັອບຊ້າງນ້ອຍ ແລະ ປູກຕາມຈຸດຕ່າງໆທີ່ທາງເມືອງກຳນົດໃຫ້.
(ຂ່າວ-ພາບ: ສົມພົງ ສີສະຫວັດ)
ຄໍາເຫັນ