ທີ່ຫ້ອງປະຊຸມຫ້ອງວ່າການເມືອງໄຊຍະບູລີ ແຂວງໄຊຍະບູລີ, ໂດຍການເປັນປະທານຂອງທ່ານ ຈັນເພັງ ແສນຄຳ ຮອງເລຂາຄະນະບໍລິຫານງານພັກເມືອງ, ປະທານຄະນະກວດກາພັກ, ປະທານອົງການກວດກາລັດເມືອງ, ຫົວໜ້າຄະນະຕ້ານການສໍ້ລາດບັງຫຼວງຂັ້ນເມືອງ, ມີບັນດາຄະນະພັກ-ຄະນະບັນຊາ, ນາຍ ແລະ ພົນທະຫານ,ນາຍ ແລະ ພົນຕໍາຫຼວດເຂົ້າຮ່ວມ.
ທ່ານ ພັທ ຄຳໄມ່ ພັນກ້າ ຫົວໜ້າກອງບັນຊາການ ປກສ ເມືອງໄຊຍະບູລີ ໄດ້ຜ່ານແຜນປ້ອງກັນ ແລະ ແຜນງົບປະມານປ້ອງກັນງານເທດສະການບຸນອອກພັນສາປະວໍລະນາ ແລະ ບຸນຊ່ວງເຮືອປະຈຳປີ ພສ 2567 ຄສ 2024 ວ່າ: ເພື່ອສະກັດກັ້ນກົນອຸບາຍ, ການເຄື່ອນໄຫວຂອງສັດຕູ ແລະ ກຸ່ມຄົນບໍ່ດີທີ່ອາດຈະກໍຂຶ້ນໃນເວລາຈັດງານເທດສະການອອກພັນສາປະວໍລະນາ ແລະ ບຸນຊ່ວງເຮືອ ປະຈຳປີ ພສ 2567 ຄສ 2024ແລະ ຮັບປະກັນໃຫ້ການຈັດງານດັ່ງກ່າວມີຄວາມສະຫງົບ,ມີຄວາມເປັນລະບຽບຮຽບຮ້ອຍປອດໄພ 100%; ອະນຸກໍາມະການປ້ອງກັນຄວາມສະຫງົບພວກເຮົາຈຶ່ງໄດ້ກຳນົດແຜນການ ແລະ ບັນຈຸກຳລັງປ້ອງກັນເຂົ້າແຕ່ລະຈຸດ ລວມມີທັງໝົດ 16 ຈຸດ ນໍາໃຊ້ກໍາລັງທັງໝົດ 598 ທ່ານ; ທັງນີ້ກໍເພື່ອແນໃສ່ເຮັດໃຫ້ງານເທດສະການອອກພັນສາປະວໍລະນາ ແລະ ບຸນຊ່ວງເຮືອ ປະຈຳປີ ພສ 2567 ຄສ2024 ປີນີ້ເຕັມໄປດ້ວຍສາຍພົວພັນຄວາມສາມັກຄີອັນຜູກແໜ້ນທີ່ເຄີຍມີມາ ແລະ ຮັກສາຮີດຄອງປະເພນີອັນດີງາມຂອງຊາດ ແລະ ຂອງທ້ອງຖິ່ນ; ທັງເປັນການຊຸກຍູ້ຂະບວນການເປີດປີທ່ອງທ່ຽວ 2024 ໃຫ້ມີບັນຍາກາດເບີກບານມ່ວນຊື່ນ,ເຮັດໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດມີຄວາມສົນໃຈຢາກມາທ່ຽວຊົມ. ຈາກນັ້ນ, ໃນກອງປະຊຸມແຕ່ລະພາກສ່ວນ ທີ່ເຂົ້າຮ່ວມກອງປະຊຸມໄດ້ມີຄໍາເຫັນແລກປ່ຽນຖອດຖອນບົດຮຽນໃນການຈະລົງໄປຈັດຕັ້ງປະຕິບັດ.
(ຂ່າວ-ພາບ: ສົມພົງ ສີສະຫວັດ)
ຄໍາເຫັນ