 |
ໃນພິທີ, ທ່ານ ພົມມາ ສົງວິໄລ ຮອງເລຂາພັກເມືອງ ປະທານຄະນະກຳມະການປົກຄອງເມືອງໄຊພູທອງ ໄດ້ລາຍງານກ່ຽວກັບການກະກຽມສ້າງຕັ້ງຕາແສງໂພນທາດວ່າ: ຕາແສງດັ່ງກ່າວ ມີ 11 ບ້ານຄື: ບ້ານໂພນທາດ, ພູມມະເຈດີ, ນາໝາກເກືອ, ໂພນສົ້ມໂຮງ, ຕາກແດດ, ນາຄຳ, ໂພນທັນ, ໂພສີແກ້ວ, ນາລະໂອງ, ຄຳແສນໄຊ ແລະ ບ້ານໜອງກຸງ. ມີພົນລະເມືອງທັງໝົດ 15,664 ຄົນ ຍິງ 6,812 ຄົນ, ມີ 2,880 ຄອບຄົວ, ມີ 2,639 ຫຼັງຄາເຮືອນ, ມີ 165 ໜ່ວຍ ແລະ ປະຊາຊົນທັງໝົດແມ່ນເຜົ່າລາວ. ຕາແສງໂພນທາດ ຕັ້ງຢູ່ທາງທິດຕາເວັນອອກຂອງເມືອງໄຊພູທອງ ຫ່າງຈາກເທດສະບານເມືອງປະມານ 10 ກິໂລແມັດ.
 |
ໃນພິທີ, ຍັງໄດ້ມີການຜ່ານຂໍ້ຕົກລົງ ແລະ ມະຕິຕ່າງໆ ເພື່ອແຕ່ງຕັ້ງຄະນະບໍລິຫານງານພັກຮາກຖານຕາແສງ ແລະ ຄະນະກຳມະການປົກຄອງຕາແສງໂພນທາດ ໂດຍສະຫາຍ ບຸນທະວີ ພິມວົງສາ ກຳມະການພັກເມືອງ ໄດ້ຮັບການແຕ່ງຕັ້ງເປັນ ເລຂາຄະນະບໍລິຫານງານພັກຮາກຖານຕາແສງ, ສະຫາຍ ລາວີ ແກ້ວພາວັນ ເປັນຮອງເລຂາຄະນະບໍລິຫານງານພັກຮາກຖານຕາແສງ ແລະ ເປັນປະທານຄະນະກວດກາພັກຮາກຖານຕາແສງ, ສະຫາຍ ພັທ ສົມໝາຍ ໄຊຍະສິນ, ສະຫາຍ ນາງ ພູວິລັດສະໄໝ ກົມມະລາດ ແລະ ສະຫາຍ ພັທ ມະຫາໄຊ ວໍລະວົງ ເປັນກຳມະການຄະນະບໍລິຫານງານພັກຮາກຖານຕາແສງ. ນອກນີ້, ຍັງໄດ້ແຕ່ງຕັ້ງ ສະຫາຍ ອຸດົມພອນ ໄຊປັນຍາ ເປັນຮອງປະທານຄະນະກວດກາພັກຮາກຖານຕາແສງຕື່ມອີກ.
 |
ໃນຕອນທ້າຍ, ທ່ານ ບຸນໂຈມ ອຸບົນປະເສີດ ໄດ້ໃຫ້ກຽດໂອ້ລົມ ແລະ ຊີ້ທິດເຍືອງທາງ ໂດຍເນັ້ນໜັກໃຫ້ຄະນະບໍລິຫານງານຕາແສງຊຸດໃໝ່ ຈົ່ງຍົກສູງຄວາມຮັບຜິດຊອບໃນການຮັບໃຊ້ປະຊາຊົນ, ສ້າງຄວາມສາມັກຄີພາຍໃນ ແລະ ຜັນຂະຫຍາຍແນວທາງນະໂຍບາຍຂອງພັກ-ລັດ ໃຫ້ເຂົ້າເຖິງຮາກຖານຢ່າງທົ່ວເຖິງ.ຈາກນັ້ນ, ຄະນະການນຳຍັງໄດ້ຮ່ວມກັນເປີດປ້າຍຫ້ອງການປົກຄອງຕາແສງໂພນທາດຢ່າງເປັນທາງການ, ລັ່ນຄ້ອງ 9 ບາດ, ປ່ອຍປາລົງສູ່ໜອງຫຼວງບ້ານໂພນທາດ ແລະ ປູກຕົ້ນໄມ້ເພື່ອເປັນສິລິມຸງຄນການເລີ່ມຕົ້ນສັງກາດໃໝ່ຂອງຕາແສງໂພນທາດ.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ