ໃນກອງປະຊຸມສຸດຍອດອາຊຽນ-ຈີຊີຊີ ຄັ້ງທີ 2, ບັນດາຜູ້ນໍາອາຊຽນ ແລະ ປະເທດສະມາຊິກ ຈີຊີຊີ (ບາເຣນ, ກູເວດ, ໂອມານ, ກາຕາ, ອາຣັບບີ ຊາອຸດິດ ແລະ ເອເມຣັດ ອາຣັບ) ໄດ້ຕີລາຄາສູງຕໍ່ການພົວພັນຮ່ວມມືອາຊຽນ-ຈີຊີຊີ ຕະຫຼອດໄລຍະຜ່ານມາ ໂດຍສະເພາະແມ່ນໄດ້ສະແດງຄວາມຍິນດີຕໍ່ຜົນສໍາເລັດຂອງກອງປະຊຸມສຸດຍອດອາຊຽນ-ຈີຊີຊີ ຄັ້ງທໍາອິດ ທີ່ໄດ້ຈັດຂຶ້ນໃນປີ 2023 ທີ່ ນະຄອນຫຼວງ ຣີຢາດ ຣາຊະອານາຈັກ ອາຣັບບີ ຊາອຸດິດ ແລະ ກອງປະຊຸມອາຊຽນ-ຈີຊີຊີ ວ່າດ້ວຍເສດຖະກິດ ແລະ ການລົງທຶນ ທີ່ໄດ້ຈັດຂຶ້ນໃນປີ 2024 ທີ່ ນະຄອນຫຼວງ ຣີຢາດ ຣາຊະອານາຈັກ ອາຣັບບີ ຊາອຸດິດ. ກອງປະຊຸມຄັ້ງນີ້, ໄດ້ສະແດງໃຫ້ເຫັນເຖິງຄວາມໝາຍໝັ້ນຂອງສອງຝ່າຍ ໃນການຮັດແໜ້ນ ແລະ ເສີມຂະຫຍາຍໝາກຜົນຂອງການພົວພັນຮ່ວມມືອາຊຽນ-ຈີຊີຊີ ໃຫ້ກ້າວເຂົ້າສູ່ລວງເລິກ ໂດຍການເພີ່ມທະວີການຮ່ວມມືທາງດ້ານເສດຖະກິດ ລວມເຖິງການເຊື່ອມໂຍງ-ເຊື່ອມຈອດ, ການຮັດແຄບຄວາມແຕກໂຕນດ້ານການພັດທະນາ, ການພັດທະນາຊັບພະຍາກອນມະນຸດ, ການທ່ອງທ່ຽວ ແລະ ການໄປມາຫາສູ່ລະຫວ່າງປະຊາຊົນ. ກອງປະຊຸມ, ຍັງໄດ້ຊຸກຍູ້ການຮ່ວມມືໃນຂະແໜງການອື່ນໆ ເປັນຕົ້ນແມ່ນການພັດທະນາແບບຍືນຍົງ, ຕົວເມືອງອັດສະລິຍະ ແລະ ຂົງເຂດອື່ນໆ ທີ່ສອງຝ່າຍມີທ່າແຮງ ແລະ ມີຄວາມສົນໃຈຮ່ວມກັນ.
ໃນຕອນບ່າຍຂອງວັນດຽວກັນ, ທ່ານ ສອນໄຊ ສີພັນດອນ ຍັງໄດ້ນໍາພາຄະນະຜູ້ແທນ ເຂົ້າຮ່ວມກອງປະຊຸມສຸດຍອດອາຊຽນ-ຈີຊີຊີ-ຈີນ. ກອງປະຊຸມ, ໄດ້ສະແດງຄວາມຍິນດີຕໍ່ການຈັດກອງປະຊຸມສຸດຍອດສາມຝ່າຍນີ້ ເປັນຄັ້ງທໍາອິດ ຊຶ່ງໄດ້ສະແດງໃຫ້ເຫັນເຖິງຄວາມໝາຍໝັ້ນຂອງອາຊຽນ, ຈີຊີຊີ ແລະ ສປ ຈີນ ໃນການເພີ່ມທະວີການພົວພັນຮ່ວມມືທາງດ້ານເສດຖະກິດ ເພື່ອຄວາມສົມບູນພູນສຸກໃນພາກພື້ນ ແລະ ໃນໂລກ. ກອງປະຊຸມ ຍັງໄດ້ປຶກສາຫາລື ແລະ ກໍານົດທິດທາງການຮ່ວມມືໃນຕໍ່ໜ້າ ເປັນຕົ້ນແມ່ນການເພີ່ມທະວີການຮ່ວມມືທາງດ້ານການຄ້າ ແລະ ການລົງທຶນ, ການເຊື່ອມໂຍງ-ເຊື່ອມຈອດ, ພື້ນຖານໂຄງລ່າງ, ຄວາມໝັ້ນຄົງທາງດ້ານພະລັງງານ, ການພັດທະນາແບບຍືນຍົງ, ການຫັນປ່ຽນດ້ານດີຈີຕອນ, ການໄປມາຫາສູ່ລະຫວ່າງປະຊາຊົນ ແລະ ບັນດາຂົງເຂດການຮ່ວມມືທີ່ສາມຝ່າຍມີທ່າແຮງ ແລະ ມີຄວາມສົນໃຈຮ່ວມກັນ.
(ຂ່າວ-ພາບ: ກະຊວງການຕ່າງປະເທດ
ຄໍາເຫັນ