ໃນການພົບປະຄັ້ງນີ້, ສອງຝ່າຍ ໄດ້ສະແດງຄວາມປິຕິຍິນດີທີ່ໄດ້ພົບປະກັນເປັນຄັ້ງທໍາອິດ ແລະ ເຊື່ອໝັ້ນວ່າ ການພົບກັນຄັ້ງນີ້ ຈະເປັນການປະກອບສ່ວນອັນສໍາຄັນ ເຂົ້າໃນການເສີມຂະຫຍາຍການພົວພັນຮ່ວມມືອັນດີລະຫວ່າງ ສອງປະເທດ. ພ້ອມນີ້, ສອງຝ່າຍ ໄດ້ຕີລາຄາສູງ ແລະ ສະແດງຄວາມຊົມເຊີຍ ທີ່ເຫັນວ່າ ຕະຫຼອດໄລຍະ 17 ປີ ແຫ່ງການສ້າງຕັ້ງສາຍພົວພັນການທູດນໍາກັນ ໃນວັນທີ 14 ກໍລະກົດ 2008, ສອງຝ່າຍ ໄດ້ເອົາໃຈໃສ່ຊຸກຍູ້ການພົວພັນ ຮ່ວມມືອັນດີງາມ ລະຫວ່າງສອງປະເທດ ໃຫ້ໄດ້ຮັບການຂະຫຍາຍຕົວ ເປັນກ້າວໆ ຊຶ່ງສະແດງອອກໃນການສົ່ງສານສະແດງຄວາມຊົມເຊີຍ ຊຶ່ງກັນ ແລະ ກັນ ຢ່າງເປັນປົກກະຕິ ໃນໂອກາດວັນສໍາຄັນຕ່າງໆ, ການແລກປ່ຽນການຢ້ຽມຢາມຂອງການນຳ, ການສະໜັບສະໜູນຊ່ວຍເຫຼືອ ຊືຶ່ງ ແລະ ກັນ ໃນເວທີພາກພື້ນ ແລະ ສາກົນ ແລະ ອື່ນໆ.
ໃນໂອກາດດຽວກັນນີ້, ທ່ານ ສອນໄຊ ສີພັນດອນ ໄດ້ສະແດງຄວາມຂອບໃຈຢ່າງຈິງໃຈ ໄປຍັງ ລັດຖະບານ ແລະ ປະຊາຊົນ ກູເວດ ທີ່ໄດ້ໃຫ້ການສະໜັບສະໜູນຊ່ວຍເຫຼືອ ສປປ ລາວ ໃນດ້ານຕ່າງໆ ຕະຫຼອດໄລຍະຜ່ານມາ ໂດຍສະເພາະໃນຂະແໜງການກະສິກຳ ແລະ ພະລັງງານ, ພ້ອມທັງໄດ້ເຊື້ອເຊີນນັກທຸລະກິດ ຈາກລັດກູເວດ ມາສຶກສາໂອກາດໃນການລົງທຶນ ໃນຂົງເຂດບຸລິມະສິດ ທີ່ລັດຖະບານໃຫ້ການສົ່ງເສີມ ເປັນຕົ້ນແມ່ນ: ດ້ານກະສິກໍາສະອາດ, ອຸດສາຫະກໍາປຸງແຕ່ງ, ພະລັງງານ-ບໍ່ແຮ່, ພະລັງງາານສະອາດ, ພື້ນຖານໂຄງລ່າງ (ເສັ້ນທາງດ່ວນ), ການບໍລິການໂຮງແຮມ, ການທ່ອງທ່ຽວ ແລະ ອື່ນໆ.
ທ່ານ ສອນໄຊ ສີພັນດອນ ຍັງໄດ້ຝາກຄວາມຢື້ຢາມຖາມຂ່າວ ແລະ ຄໍາເຊື້ອເຊີນ ໄປຍັງ ສົມເດັດ ເຊກຄ໌ ອາເມັດ ອັບດຸນລາ ອາລ ອາເມັດ ອາລ ຊາ ບາສ ນາຍົກລັດຖະມົນຕີ ແຫ່ງ ລັດກູເວດ ສະເດັດຢ້ຽມຢາມ ສປປ ລາວ ຢ່າງເປັນທາງການ ໃນເວລາທີ່ສອງຝ່າຍ ມີຄວາມສະດວກ ເພື່ອຊຸກຍູ້ ແລະ ສົ່ງເສີມສາຍພົວພັນ ແລະ ການຮ່ວມມືອັນດີ ລະຫວ່າງ ສອງປະເທດ ໃຫ້ຂະຫຍາຍຕົວຍິ່ງໆຂຶ້ນ.
(ຂ່າວ-ພາບ: ກະຊວງການຕ່າງປະເທດ
ຄໍາເຫັນ