ນາຍົກລັດຖະມົນຕີ ພົບປະໂອ້ລົມ ການນໍາແຂວງເຊກອງ

ທ່ານ ບຸນຫຼາຍ ບຸດທິ ຮັກສາການເລຂາຄະນະບໍລິຫານງານພັກແຂວງ ຮັກສາການເຈົ້າແຂວງເຊກອງ ໄດ້ລາຍງານການນຳພາ-ຊີ້ນຳຮອບດ້ານ ແລະ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະ ແຜນວຽກຈຸດສຸມ 6 ເດືອນທ້າຍປີ 2025 ແລະ ການກະກຽມກອງປະຊຸມໃຫ່ຍອົງຄະນະພັກແຂວງ ວ່າ: ໄລຍະ 6 ເດືອນຜ່ານມາ, ການພັດທະນາເສດຖະກິດ-ສັງຄົມ ມີທ່າກ້າວຂະຫຍາຍຕົວດີຂຶ້ນ ໂດຍສະແດງໃຫ້ເຫັນໃນ 3 ຂະແໜງການຫຼັກ ຄື: ຂະແໜງກະສິກຳ ແລະ ປ່າໄມ້ ມີການຂະຫຍາຍໂຕທາງດ້ານການປູກຝັງ, ລ້ຽງສັດ ເພີ່ມຂຶ້ນ; ຂະແໜງອຸດສາຫະກຳ-ພະລັງງານໄຟຟ້າ ແລະ ບໍ່ແຮ່ ໄດ້ມີການເຄື່ອນໄຫວດຳເນີນການຜະລິດເປັນປົກກະຕິ ແລະ ຂະແໜງບໍລິການ, ການຄ້າ ແລະ ຄົມມະນາຄົມຂົນສົ່ງ ໄດ້ມີການຈັດຕັ້ງປະຕິບັດໄປຕາມແຜນການວາງໄວ້ ມີທ່ວງທ່າດີຂຶ້ນເປັນລໍາດັບ ເຊັ່ນ: ການຄ້າຂາຍຍົກ-ຂາຍຍ່ອຍ, ການຂົນສົ່ງໂດຍສານ, ໂຮງແຮມ, ຮ້ານອາຫານ, ລີສອດ, ບ້ານພັກ, ແຫຼ່ງທ່ອງທ່ຽວ ໂດຍຄາດຄະເນໝົດປີ 2025 ຈະເຮັດໃຫ້ລວມຍອດຜະລິດຕະພັນພາຍໃນ ບັນລຸໃນລະດັບ 6.2%; ນອກນັ້ນ, ການເກັບລາຍຮັບ ແລະ ການປະຕິບັດລາຍຈ່າຍງົບປະມານ ກໍມີການຄຸ້ມຄອງ, ຈັດຕັ້ງຢ່າງເຂັ້ມງວດ. ພ້ອມນີ້, ການກະກຽມ ແລະ ດຳເນີນກອງປະຊຸມໃຫ່ຍ 3 ຂັ້ນຂອງພັກ ຊຶ່ງມາຮອດປັດຈຸບັນ ການດໍາເນີນກອງປະຊຸມໃຫ່ຍອົງຄະນະພັກເມືອງ 4 ເມືອງ ແລະ ກອງປະຊຸມໃຫຍ່ອົງຄະນະພັກ 2 ກໍາລັງປະກອບອາວຸດ (ປກຊ, ປກສ) ແມ່ນສໍາເລັດ 100% ພ້ອມທັງສໍາເລັດການແບ່ງງານ-ແບ່ງຄວາມຮັບຜິດຊອບພາຍໃນຄະນະພັກ ຖືກຕ້ອງສອດຄ່ອງຕາມພາລະບົດບາດ ທັງວຽກງານພັກ ແລະວຽກງານດ້ານລັດ, ສ່ວນການດໍາເນີນກອງປະຊຸມໃຫ່ຍຂັ້ນຮາກຖານພັກອ້ອມຂ້າງແຂວງ ແມ່ນສໍາເລັດ 93.25%; ສໍາລັບຂັ້ນອົງການຈັດຕັ້ງມະຫາຊົນແມ່ນສຳເລັດ 100%; ທັງນີ້, ການກະກຽມ ແລະ ດໍາເນີນກອງປະຊຸມໃຫ່ຍ ຄັ້ງທີ XI ຂອງອົງຄະນະພັກແຂວງເຊກອງ ທີ່ໄດ້ຄາດໝາຍຈະເປີດຂຶ້ນໃນເດືອນສິງຫາຕໍ່ໜ້ານີ້.

ທ່ານນາຍົກລັດຖະມົນຕີ ໄດ້ໃຫ້ທິດຊີ້ນໍາວ່າ: ການນໍາພາ-ຊີ້ນໍາຂອງຄະນະບໍລິຫານງານພັກແຂວງເຊກອງ ກໍຄືພະນັກງານຫຼັກແຫຼ່ງຂັ້ນພະແນກການຕ່າງໆພາຍໃນແຂວງ ໄດ້ສຸມໃສ່ຈັດຕັ້ງປະຕິບັດວຽກງານ ຕາມພາລະບົດບາດຂອງຕົນ ໂດຍສະເພາະ ໃນປີ 2025 ມາຮອດໄລຍະນີ້ ກໍນັບໄດ້ວ່າເຄິ່ງປີແລ້ວ ທີ່ໄດ້ເອົາໃຈໃສ່ປະຕິບັດແຜນພັດທະນາເສດຖະກິດ-ສັງຄົມ, ວຽກງານຈຸດສຸມໃນແຕ່ຂົງເຂດ ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດມີຜົນສໍາເລັດຕາມຄາດໝາຍ; ທັງໝົດນັ້ນ ຍ້ອນການນໍາພາ-ຊີ້ນໍາຢ່າງໃກ້ຊິດ, ດ້ວຍຄວາມສາມັກຄີເປັນເອກະພາບສູງຂອງຄະນະພັກ-ຄະນະນໍາ ທຸກຂັ້ນລວມທັງການປະກອບສ່ວນຂອງປະຊາຊົນບັນດາເຜົ່າແຂວງເຊກອງ ທີ່ໄດ້ສຸມທຸກເຫື່ອແຮງ ແລະ ສະຕິປັນຍາເຂົ້າໃນການປະຕິບັດໜ້າທີ່ຂອງຕົນຢ່າງເຕັມກຳລັງ; ໂດຍໃນຕໍ່ໜ້ານີ້ ກໍຄື 6 ເດືອນທ້າຍປີ, ຂໍໃຫ້ຄະນະພັກ-ຄະນະນໍາທຸກຂັ້ນ ພ້ອມກັນເອົາໃຈໃສ່ປະຕິບັດໜ້າທີ່ຂອງຕົນ ດ້ວຍການເພີ່ມທະວີຂອດການນໍາພາ-ຊີ້ນໍາໃຫ້ສູງຂຶ້ນ, ຫັນລົງກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານ, ກໍ່ສ້າງພັກ-ພະນັກງານ ຕາມທິດປອດໃສ, ເຂັ້ມແຂງ ແລະ ໜັກແໜ້ນ; ເດັດດ່ຽວສະກັດກັ້ນ ແລະທແກ້ໄຂບັນດາປະກົດການຫຍໍ້ທໍ້ທາງດ້ານສັງຄົມ ໃຫ້ຫຼຸດລົງ ເປັນຕົ້ນ: ອຸບັດຕິເຫດ, ຂີ້ລັກງັດແງະ, ຄ້າຂາຍຢາເສບຕິດ, ຄ້າຂາຍເຖື່ອນຕ່າງໆ ແລະ ການພະນັນຜິດກົດໝາຍ; ພ້ອມນີ້, ກໍໃຫ້ເພີ່ມທະວີການສຶກສາອົບຮົມວຽກງານການເມືອງ-ແນວຄິດ ເພື່ອສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງ ໃຫ້ແກ່ສະມາຊິກພັກ-ພະນັກງານ, ປັບປຸງກົງຈັກການຈັດຕັ້ງ ໃຫ້ຖືກຕ້ອງ, ສອດຄ່ອງກັບໜ້າທີ່ວິຊາສະເພາະ ແລະ ຄວາມຮຽກຮ້ອງຕ້ອງການຂອງໜ້າທີ່ການເມືອງ ໃນໄລຍະໃໝ່; ເປັນເຈົ້າການຜັນຂະຫຍາຍ ແລະ ຈັດຕັ້ງປະຕິບັດໃນການສ້າງເສດຖະກິດເອກະລາດ ເປັນເຈົ້າຕົນເອງ ໂດຍໃຫ້ສຸມໃສ່ຂຸດຄົ້ນທ່າແຮງບົ່ມຊ້ອນພາຍໃນແຂວງ ເພື່ອມາພັດທະນາເສດຖະກິດຂອງແຂວງ ໂດຍສະເພາະ ພື້ນຖານໂຄງລ່າງຄົມມະນາຄົມຂົນສົ່ງ ໃຫ້ມີຄວາມສະດວກໃນການໄປ-ມາ ພ້ອມທັງເອົາໃຈໃສ່ແກ້ໄຂຄວາມທຸກຍາກຂອງປະຊາຊົນບັນດາເຜົ່າໃຫ້ຫຼຸດໜ້ອຍຖອຍລົງ; ເຊື່ອໝັ້ນວ່າ: ພາຍໃຕ້ການນໍາພາ-ຊີ້ນໍາຂອງອົງຄະນະພັກແຂວງ ບວກກັບກຳລັງແຮງຂອງພະນັກງານ-ລັດຖະກອນ, ປະຊາຊົນບັນດາເຜົ່າ ຈະເຮັດໃຫ້ແຂວງເຊກອງ ມີການພັັດທະນາກ້າວຂຶ້ນຢ່່າງບໍ່ຢຸດຢັ້ງ.

(ຂ່າວ-ພາບ: ອັດສະວິນ)