 |
ທ່ານ ບຸນຄົງ ພິມມະສອນ ກໍາມະການພັກແຂວງ ເລຂາພັກຄະນະບໍລິຫານງານພັກເມືອງ ໄດ້ລາຍງານວ່າ: ເມືອງຫຼວງນໍ້າທາ ປະກອບມີ 78 ບ້ານ, ມີ 4 ຕາແສງ (ຕາແສງ ທົ່ງອົ້ມ; ຕາແສງຫຼວງຂອນ; ຕາແສງທົ່ງປຸ່ງ ແລະ ຕາແສງນາເຕີຍ), ຕາແສງຫຼວງຂອນ ໄດ້ປະກາດສ້າງຕັ້ງໃນວັນທີ 25 ທັນວາ 2025 ເຊິ່ງຕັ້ງຢູ່ທິດໃຕ້ຂອງເມືອງຫຼວງນໍ້າທາ, ຫ່າງຈາກຫ້ອງວ່າການເມືອງປະມານ 4.5 ກິໂລແມັດ, ມີເນື້ອທີ່ທັງໝົດ 54.057 ເຮັກຕາ, ເນື້ອທີ່ເປັນພູດອຍກວມ 44.44%, ປະກອບມີ 18 ບ້ານ, ມີ 4,396 ຄອບຄົວ, 3,639 ຫຼັງຄາ, ພົນລະເມືອງ 19,024 ຄົນ, ຍິງ 9,505 ຄົນ.
|
ໂອກາດນີ້ ທ່ານ ນາຍົກລັດຖະມົນຕີ ໄດ້ໃຫ້ກຽດໂອ້ລົມ ແລະ ທິດຊີ້ນຳ ຕໍ່ວຽກງານຈຸດສຸມຂອງຕາແສງ ບາງດ້ານ ເປັນຕົ້ນແມ່ນ: ເພີ່ມທະວີການສຶກສາອົບຮົມການເມືອງ-ແນວຄິດ ຂອງພະນັກງານ-ລັດຖະກອນ ແລະ ປະຊາຊົນບັນດາເຜົ່າ; ມີສະຕິລະວັງຕົວຕໍ່ກົນອຸບາຍຂອງຄົນບໍ່ດີ ແລະ ຮັກສາຄວາມເປັນລະບຽບຮຽບຮ້ອຍ ພາຍໃນຕາແສງ ແລະ ເຂດຊາຍແດນ; ສືບຕໍ່ຈັດຕັ້ງປະຕິບັດ ວາລະແຫ່ງຊາດ ວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກຍາກ ຕິດພັນກັບການພັດທະນາທີ່ຍຶນຍົງ ແລະ ສີຂຽວ; ສົ່ງເສີມການປູກຝັງ-ລ້ຽງສັດ ເປັນສິນຄ້າ ຕາມທິດ ສ້າງເສດຖະກິດເອກະລາດ ເປັນເຈົ້າຕົນເອງ ໃນໄລຍະໃໝ່ ໃຫ້ປະກົດຜົນເປັນຈິງ, ສູ້ຊົນຈັດຕັ້ງປະຕິບັດແຜນການຜະລິດປະຈຳປີ ເປັນຕົ້ນ ການຜະລິດກະສິກຳ ເຊິ່ງເຫັນວ່າ ໄລຍະຜ່ານມາເກີດມີໄພນໍ້າຖ້ວມ, ສືບຕໍ່ເອົາໃຈໃສ່ຢ່າງໃກ້ຊິດ ເພື່ອກຽມພ້ອມຮັບມືກັບໄພພິບັດທຳມະຊາດ ໃຫ້ທົ່ວເຖິງ ແລະ ທັນການ; ປະຕິບັດ 11 ຕົວຊີ້ວັດ ດ້ານການພັດທະນາ, ເອົາໃຈໃສ່ຕິດຕາມການລັກລອບຂຸດຄົ້ນຄຳ, ການດູດແຮ່ຊາຍ-ຫີນ ບໍ່ຖືກຕ້ອງຕາມລະບຽບການ; ປັບປຸງກົນໄກບໍລິຫານລັດ ຜ່ານລະບົບປະຕູດຽວ ແລະ ຫັນເປັນດີຈີຕອນ; ຝຶກອົບຮົມຍົກລະດັບຄວາມຮູ້-ຄວາມສາມາດ ໃຫ້ບຸກຄະລາກອນຂັ້ນຕາແສງ ແລະ ບ້ານ; ພ້ອມທັງສ້າງຕາແສງຫຼວງຂອນ ໃຫ້ກາຍເປັນທ້ອງຖິ່ນທີ່ໝັ້ນຄົງ, ປະຊາຊົນມີຊີວິດການເປັນຢູ່ ນັບມື້ນັບດີຂຶ້ນ.
 |
 |
ໃນໂອກາດລົງຢຽ້ມຢາມ ທ່ານ ນາຍົກລັດຖະມົນຕີ ຍັງໄດ້ມອບເງິນໃຫ້ແກ່ເມືອງຫຼວງນໍ້າທາ 50 ລ້ານກີບ ແລະ ຕາແສງຫຼວງຂອນ 30 ລ້ານກີບ ຕື່ມອີກ.
ຂ່າວ: ຫຼວງນ້ຳທາ
ຄໍາເຫັນ