ນາຍົກໂອ້ລົມຕໍ່ກອງປະຊຸມສະຫຼຸບວຽກງານ ຫສນຍ ຫ້ອງການກະຊວງ-ອົງການ ແລະ ຫ້ອງວ່າການທ້ອງຖິ່ນ

ທ່ານນາຍົກລັດຖະມົນຕີ ໄດ້ຕີລາຄາສູງຕໍ່ຜົນສໍາເລັດຂອງການດຳເນີນກອງປະຊຸມຄັ້ງນີ້, ພ້ອມທັງຍົກໃຫ້ເຫັນສະພາບການພົ້ນເດັ່ນທີ່ເກີດຂຶ້ນໃນພາກພື້ນ ແລະ ສາກົນ, ທິດທາງ ແລະ ຄາດໝາຍລວມ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X ກໍຄືບັນດາໜ້າວຽກຈຸດສຸມ ແລະ ຄາດໝາຍສູ້ຊົນຂອງລັດຖະບານ ຊຸດທີ X, ລວມທັງນະໂຍບາຍແກ້ໄຂຄວາມທຸກຍາກຂອງປະຊາຊົນ, ການສ້າງເສດຖະກິດ ເອກະລາດ ເປັນເຈົ້າຕົນເອງ, ການແກ້ໄຂຂໍ້ຄົງຄ້າງຕ່າງໆ. ໃນໂອກາດດຽວກັນນີ້, ທ່ານນາຍົກລັດຖະມົນຕີ ໄດ້ມີຄໍາເຫັນເນັ້ນໜັກຕໍ່ກອງປະຊຸມຕື່ມບາງດ້ານ ເປັນຕົ້ນຄະນະພັກ-ຄະນະນຳ ຕ້ອງຖືເອົາການນໍາພາການເມືອງແນວຄິດຂອງພະນັກງານ-ລັດຖະກອນ ເປັນບັນຫາສໍາຄັນໂດຍຄຳນຶງເຖິງຜົນໄດ້-ຜົນເສຍ ຂອງການປະຕິບັດແນວທາງນະໂຍບາຍຂອງພັກ-ລັດ; ມີສະຕິລະວັງຕົວຕໍ່ກົນອຸບາຍຂອງພວກສັດຕູ; ມີແບບແຜນວິທີເຮັດວຽກ ໂດຍສະເພາະ ການຕິດຕາມຊຸກຍູ້ ແລະ ລາຍງານຜົນການຈັດຕັ້ງປະຕິບັດບັນດາມະຕິ, ຄໍາສັ່ງ, ແຈ້ງການ ທິດຊີ້ນໍາຂອງຂັ້ນເທິງ ຢ່າງວ່ອງໄວ ແລະ ທັນການ; ສືບຕໍ່ເອົາໃຈໃສ່ການເປັນເສນາທິການຄົ້ນຄວ້າໃຫ້ຖືກກັບຄວາມເປັນຈິງເພື່ອເຮັດໃຫ້ການຊີ້ນຳ ແລະ ຕົກລົງບັນຫາຂອງການນຳຖືກຕ້ອງ, ແທດຕົວຈິງ ແລະ ສາມາດປະຕິບັດໄດ້; ການຈໍລະຈອນ ແລະ ແກ້ໄຂເອກະສານຕ່າງໆ ຕ້ອງລະອຽດຊັດເຈນ, ວ່ອງໄວ ແລະ ທັນການ ໂດຍຫັນໄປສູ່ລະບົບທັນສະໄໝ;ຄົ້ນຄວ້າປັບປຸງກົງຈັກການຈັດຕັ້ງໃຫ້ກະທັດຮັດ ຊ່ວຍວຽກການນໍາແຕ່ລະຂັ້ນເຄື່ອນໄຫວວຽກງານຢ່າງມີປະສິດທິ ພາບ, ປະສິດທິຜົນ; ສ້າງ ແລະ ນໍາໃຊ້ພະນັກງານຈາກພຶດຕິກຳ ແລະ ຄວາມສາມາດຕົວຈິງ ເພື່ອໃຫ້ກາຍເປັນຊ່ຽວຊານ ແລະ ຊໍານານສະເພາະດ້ານ, ມີນໍ້າໃຈຮັບໃຊ້ປະເທດຊາດ, ຮັບໃຊ້ປະຊາຊົນ, ສຸຂຸມ, ຮອບຄອບ, ມີໄຫວພິບ, ບໍ່ອູ້ມວຽກ, ບໍ່ປະວຽກໃຫ້ຊັກຊ້າ ແລະ ບໍ່ຮຽກເອົາຜົນປະໂຫຍດສ່ວນຕົວ; ຕ້ອງຮັກສາຄວາມລັບ, ຊື່ສັດບໍລິສຸດ, ກ້າຫານ ແລະ ກົງໄປກົງມາ ຕໍ່ຄໍາເຫັນທີ່ສະເໜີຕໍ່ຂັ້ນເທິງ, ການສະເໜີຕ້ອງພາວະວິໄສ, ໜ້າເຊື່ອຖື; ຕ້ອງມີຄວາມສາມັກຄີ ເປັນຈິດໜຶ່ງໃຈດຽວ, ມີການແລກປ່ຽນບົດຮຽນ, ຕໍານິຕິຊົມຊຶ່ງກັນ ແລະ ກັນ; ສືບຕໍ່ຍົກລະດັບຄວາມຮູ້ຄວາມສາມາດ ຂອງພະນັກງານ-ລັດຖະກອນ ທາງດ້ານທິດສະດີ ແລະ ວິຊາສະເພາະ ເພື່ອຮັບໃຊ້ໜ້າທີ່ການເມືອງ ຕາມທິດພະນັກງານສືບທອດປ່ຽນແທນແຕ່ລະໄລຍະ, ພ້ອມທັງ ສັບຊ້ອນຈັດວາງ, ຍົກຍ້າຍພະ ນັກງານຕາມຄວາມຮຽກຮ້ອງຕ້ອງການຂອງວຽກງານຕົວຈິງ ແລະ ແທດເໝາະກັບຄວາມຮູ້ຄວາມສາມາດວິຊາສະ ເພາະ ຜູ້ໜຶ່ງຕ້ອງເຮັດໄດ້ຫຼາຍວຽກ. ນອກນັ້ນ, ທ່ານຍັງໄດ້ເນັ້ນໜັກບາງວຽກງານຕໍ່ອົງການປົກຄອງທ້ອງຖິ່ນຄື: ໃຫ້ສືບຕໍ່ເປັນເຈົ້າການຈັດຕັ້ງຜັນຂະຫຍາຍບັນດານິຕິກໍາຕື່ມ ເປັນຕົ້ນແຜນພັດທະນາເສດຖະກິດ - ສັງຄົມແຫ່ງຊາດ 5 ປີ ຄັ້ງທີ X, ຄໍາສັ່ງ ເລກທີ 06/ນຍ, ຄໍາສັ່ງ 11/ນຍ, ຄໍາສັ່ງ 15/ນຍ, ຄໍາສັ່ງ 40/ນຍ, ມະຕິ 165/ສພຊ ແລະ ອື່ນໆ; ເອົາໃຈໃສ່ຕິດຕາມ, ຊຸກຍູ້, ມີແຜນການ ແລະ ມາດຕະການຕ່າງໆ ຊ່ວຍເຫຼືອປະຊາຊົນໃນທ້ອງຖິ່ນຂອງຕົນໃຫ້ທັນກັບເວລາ ເພື່ອຮັບມືກັບໄພພິບັດ ແລະ ບັນຫາອື່ນທີ່ຈະເກີດຂຶ້ນ ໃນໄລຍະລະດູຝົນ ກໍຄືລະດູແລ້ງ ເພື່ອບໍ່ໃຫ້ມີຜົນກະທົບຕໍ່ການຜະລິດສິນຄ້າ, ການຄົມມະນາຄົມ ແລະ ອື່ນໆ; ຕິດຕາມ, ກວດກາ ແລະ ຊຸກຍູ້ ບັນດາໂຄງການລົງທຶນຢ່າງເປັນປົກກະຕິ, ພ້ອມທັງ ມີມາດຕະການເດັດຂາດ ຕໍ່ການລັກລອບຂຸດຄົ້ນຄຳຕົກຂ້ອນ, ລັກລອບຕັດໄມ້-ລ່າສັດ ແລະ ບັນຫາປະກົດການຫຍໍ້ທໍ້ໃນສັງຄົມ; ຄຸ້ມຄອງ ແລະ ຈັດເກັບລາຍຮັບຕ່າງໆ ໃຫ້ໄດ້ຕາມແຜນ, ຫັນການເກັບລາຍຮັບ ເຂົ້າສູ່ລະບົບທັນສະໄໝ ເທື່ອລະກ້າວ ເພື່ອຫຼຸດຜ່ອນການຮົ່ວໄຫຼຂອງງົບປະ ມານ; ປັບປຸງກົນໄກການປະສານງານກັບ ກະຊວງ-ອົງການ ຂອງສູນກາງ ທັງສາຍຕັ້ງ ແລະ ສາຍຂວາງ, ທັງມີລະບອບການລາຍງານຂໍທິດຊີ້ນຳຈາກຂັ້ນເທິງ ຢ່າງເປັນປົກກະຕິ.

(ຂ່າວ-ພາບ: ກົມປະຊາສໍາພັນ ຫສນຍ)