 |
ໂອກາດນີ້, ທ່ານ ນາງ ແພງພັນ ບຸບຜາພອນ ໄດ້ໃຫ້ຮູ້ເນື້ອໃນບົດຂຽນວ່າ: ໃຫ້ເວົ້າເຖິງມູນເຊື້ອຂອງແນວລາວອິດສະຫຼະ, ແນວລາວຮັກຊາດ ຫຼື ແນວລາວສ້າງຊາດໃນໄລຍະສະໄໝການຕໍ່ສູ້ກູ້ຊາດຕ້ານກັບຈັກກະພັດຜູ້ຮຸກຮານໃນເມື່ອກ່ອນ ກໍຄືໄລຍະການປົກປັກຮັກສາ ແລະ ສ້າງສາປະເທດຊາດໃນປັດຈຸບັນ ໂດຍສະເພາະໄລຍະການປ່ຽນແປງໃໝ່, ການເຊື່ອມໂຍງກັບພາກພື້ນ ແລະ ສາກົນ ໃນຕະຫຼອດໄລຍະ 75 ປີຜ່ານມາ; ເວົ້າເຖິງວິຖີຊີວິດ, ຄວາມສາມັກຄີຂອງປະຊາຊົນລາວບັນດາເຜົ່າ, ບັນທຶກປະຫວັດ, ມູນເຊື້ອ, ວິລະກໍາ, ຜົນງານ, ວຽກດີຄົນເດັ່ນ... ສໍາລັບປະເພດບົດປະກອບມີ: ບົດເລື່ອງສັ້ນ, ບົດບັນທຶກ, ບົດກາບກອນ (ກະວີ). ສ່ວນກະຕິກາ: ຕ້ອງເປັນບົດທີ່ປະດິດແຕ່ງຂຶ້ນໃໝ່ ແລະ ມີເນື້ອໃນສອດຄ່ອງກັບແນວທາງນະໂຍບາຍຂອງພັກ-ລັດ, ມີສິລະປະການປະພັນຖືກຕ້ອງຕາມຫຼັກວິຊາການ, ຂຽນໂດຍຜູ້ຂຽນແທ້, ບໍ່ເຄີຍລົງພິມ ຫຼື ແຂ່ງຂັນມາກ່ອນ ທັງບໍ່ລອກຮຽນແບບ ແລະ ບໍ່ດັດແປງຜົນງານຂອງຄົນອື່ນ, ຄວາມຍາວຂອງບົດຂຽນ: ເລື່ອງສັ້ນ ແລະ ບົດບັນທຶກ 5-10 ໜ້າເອ4 (A4), ບົດກະວີ 15-20 ບາດ, ນັກຂຽນຜູ້ໜຶ່ງ 1 ບົດ (ຕາມທີ່ໄດ້ກໍານົດ), ບົດຕ້ອງຕີພິມຄອມພີວເຕີ, ຟາຍເວີດ, ຟອນເພັດຊະລາດໂອທີ, ຂະໜາດຕົວໜັງສື 12. ພ້ອມນັ້ນ, ຜູ້ສົ່ງບົດເຂົ້າຮ່ວມຍັງຈະໄດ້ເງິນຄ່າບົດ/ຄ່ານາມປາກກາ, ພ້ອມໃບກຽດຕິຄຸນ (ເຊັນໂດຍທ່ານປະທານສູນກາງແນວລາວສ້າງຊາດ). ກໍານົດເວລາຮັບບົດ: ນັບແຕ່ວັນທີ 30 ມິຖຸນາ - 31 ສິງຫາ 2025. ຄະນະຈັດທໍາຜ່ານບົດ, ອອກແບບ ແລະ ຈັດໜ້າປຶ້ມ: ເດືອນ ກັນຍາ 2025 ແລະ ຈັດພິມໂຄສະນາເຜີຍແຜ່ ໃນເດືອນຕຸລາ 2025. ນັກປະພັນ ນັກກະວີ ສາມາດສົ່ງບົດໄດ້ທີ່: ກົມໂຄສະນາສູນກາງແນວລາວສ້າງຊາດ.
(ຂ່າວ-ພາບ: ວັນເພັງ)
ຄໍາເຫັນ