ທ່ານ ອຳພອນບຸນຍາລາດ ຜູ້ອຳນວຍການບໍລິສັດສາຍພູຫຼວງຈໍາກັດຜູ້ດຽວ ຜູ້ສຳປະທານນໍ້າຕົກຕາດສຽງລື ເມືອງບົວລະພາ ໄດ້ໃຫ້ສໍາພາດຕໍ່ສື່ມວນຊົນເມື່ອບໍ່ດົນມານີ້ວ່າ: ຍ້ອນເຫັນໄດ້ຄວາມອຸດົມສົມບູນທາງດ້ານທໍາມະຊາດ, ຊີວະນາໆພັນຢູ່ໃນເຂດປ່າປ້ອງກັນພູຫຼວງ-ພູເຂົານົກ ຈຶ່ງໄດ້ມີແນວຄິດຢາກພັດທະນາເຂດດັ່ງກ່າວນີ້ໃຫ້ເປັນສະຖານທີທ່ອງທ່ຽວທາງທໍາມະຊາດທີ່ມີຄວາມສວຍສົດງົດງາມບໍ່ແພ້ນໍ້າຕົກຕາດແຫ່ງອື່ນໆ ໂດຍຕິດພັນກັບການອະນຸລັກສັດປ່ານາໆພັນ. ນໍ້າຕົກຕາດສຽງລືມີຄວາມສູງຂອງນໍ້າຕົກປະມານ 70 ແມັດ, ບໍລິເວນນໍ້າຕົກມີອ່າງນໍ້າທີ່ໃສເຢັນ ແລະ ສວຍງາມເໝາະແກ່ການລົງຫຼິ້ນກິດຈະກຳອາບນໍ້າ, ລອຍນໍ້າເພື່ອສ້າງຄວາມເພີດເພີນແກ່ຜູ້ມາທ່ຽວຊົມ ແລະ ສອງຂ້າງອ່າງນໍ້າໃສເຢັນດັ່ງກ່າວປົກຄຸມດ້ວຍປ່າໄມ້ທີ່ຂຽວສະອຸ່ມທີ່ໜ້າປະທັບໃຈແກ່ຜູ້ມາພົບເຫັນ. ນອກນັ້ນ,ບໍລິເວນນໍ້າຕົກຍັງປະກອບດ້ວຍດອກໄມ້ສີຊົມພູ (ດອກທຽນ) ເບັ່ງບານເປັນຕາອອນຊອນ, ມີບ່ອນກາງເຕັ້ນນອນພັກແຮມຄືນ, ມີຮ້ານອາຫານ, ຈຸດຊົມວິວນໍ້າຕົກຕາດເພື່ອຖ່າຍພາບໆງາມໆໄວ້ເປັນທີ່ລະນຶກຊຶ່ງໄລຍະທາງຈາກບ່ອນຈອດລົດໄປຫາຈຸດຊົມວິວຂອງຕາດສູງສຸດ1,200 ແມັດ.ໃນປັດຈຸບັນນີ້, ໄດ້ຈັດສັນເປັນສະຖານທີ່ທ່ອງທ່ຽວ ແລະ ເນື້ອທີ່ໆຖືກຈັດສັນທັງໝົດມີ 5,587,028 ຕາແມັດ. ໃນນັ້ນ, ນອນຢູ່ໃນເຂດປ່າປ້ອງກັນພູຫຼວງ-ພູເຂົານົກມີເນື້ອທີ່ 40.489 ເຮັກຕາແລະ ໄດ້ເປີດໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າທ່ຽວຊົມຢ່າງເປັນທາງການໃນວັນທີ 20 ທັນວາ 2024 ຜ່ານມາ.
ທ່ານ ອຳພອນ ບຸນຍາລາດ ຍັງໃຫ້ຮູ້ປະຫວັດຄວາມເປັນມາໃນເມື່ອກ່ອນນໍ້າຕົກຕາດແຫ່ງນີ້ເພິ່ນເອີ້ນວ່າ:"ຜາດຳຜາແດງ ຊຽງຈັນຊຽງລື ທຣຳຊີຍິງຕາລິງອາຍຣອຍ"ໝາຍຄວາມວ່າ: ທັງໝົດນີ້ແມ່ນສາຍພົວພັນດຽວກັນລະຫວ່າງໜອງຍາດ, ໜອງປາດ, ຕາດຊຽງລື ສາຍພູກຳພ້າ (ທຣຳຊີຍິງ), ນາກຳພ້າ (ຕາລິງອາຍລອຍ) ທີ່ຕັ້ງຢູ່ໃກ້ໆກັນນີ້ເອງ. ໃນເມື່ອກ່ອນສຽງນໍ້າຕົກດັງ"ຮຶງໆໆໆ" ສຽງດັ່ງກ່າວໄດ້ກ້ອງກັງວານໄປເຖິງບາງກອກປະເທດໄທ ແລະ ຢູ່ນໍ້າຕົກຊັ້ນເທິງຍັງມີຫີນກ້ອນໜຶ່ງເປັນລີ້ນອອກມາຄ້າຍຄືກັບລີ້ນຂອງສັດ ແຕ່ມັນມີຂະໜາດໃຫຍ່ຍ້ອນນໍ້າຕົກໃສ່ຫີນດັ່ງກ່າວຈຶ່ງເຮັດໃຫ້ເກີດມີສຽງດັງກ້ອງກັງວານຢ່າງມະຫັດສະຈັນ. ແຕ່ມາໃນປັດຈຸບັນລີ້ນທີ່ກໍ່ໃຫ້ເກີດສຽງດັ່ງກ່າວໄດ້ຖືກຖັບຫັກໄປແລ້ວ.ດັ່ງນັ້ນ, ຈຶ່ງເປັນສາເຫດເຮັດໃຫ້ສຽງກ້ອງກັງວານດັ່ງກ່າວຢຸດໄປ. ແຕ່ກໍຍັງໄດ້ຍິນສຽງດັງຄ່ອຍໆເປັນບາງຄັ້ງຄາວ ຫຼື ເວລາໄດ້ຍິນສຽງຮຶງໆຂຶ້ນ. ນອກນັ້ນ, ຍັງມີຮອຍຕີນຂອງຄົນໃຫຍ່ຢຽບຢູ່ພະລານຫີນທີ່ຕາດຊັ້ນເທິງຕໍ່ມາໃນສະໄໝປູ່ຍ່າ-ຕາຍາຍມັກເອີ້ນຊື່ນໍ້າຕົກຕາດນີ້ວ່າ: ນໍ້າຕົກຕາດສຽງລື ຫຼືຊຽງລືມາຮອດປັດຈຸບັນ. ນໍ້າຕົກຕາດດັ່ງກ່າວຫ່າງຈາກຕົວເມືອງບົວລະພາ 9 ກິໂລແມັດ ຊຶ່ງໄລຍະທີ່ເໝາະສົມແກ່ການທ່ອງທ່ຽວແມ່ນທ້າຍເດືອນມິຖຸນາ ຫາ ທ້າຍເດືອນຕຸລາຂອງທຸກໆປີ.
ທ່ານ ອຳພອນ ບຸນຍາລາດ ກ່າວຕື່ມວ່າ: ໃນຕໍ່ໜ້າສະຖານທີ່ທ່ອງທ່ຽວແຫ່ງນີ້ຈະຈັດໃຫ້ມີຫຼາຍກິດຈະກໍາຕື່ມອີກ ເປັນຕົ້ນກິດຈະກໍາຂີ່ສະລິງ,ເຮືອນຕົ້ນໄມ້, ທີ່ພັກໂຮມສະເຕ, ຈຸດປີນຜາ, ຂົວອູ່ ແລະ ອື່ນໆ.
ຄໍາເຫັນ