ໜອງບົກພັດທະນາຂົງເຂດວັດທະນະທໍາ-ສັງຄົມຢ່າງຕັ້ງໜ້າ

 ເມືອງຍັງຕັ້ງໜ້າບຸກບືນ ພັດທະນາສົ່ງເສີມວຽກງານສຶກສາທິການ ແລະກິລາພາຍໃນເມືອງໃຫ້ບັນລຸຕາມຕົວຊີ້ວັດທີ່ໄດ້ກໍານົດອອກ.

ຕະຫຼອດ 5 ປີ ຜ່ານມາ(2020-2024) ເມືອງໄດ້ສະໜອງທຶນຮອນປັບປຸງກໍ່ສ້າງພື້ນຖານໂຄງລ່າງດ້ານການສຶກສາ ດ້ວຍທຶນຂອງລັດ, ທຶນຊ່ວຍເຫຼືອ ແລະ ການປະກອບສ່ວນຂອງປະຊາຊົນ; ສໍາເລັດການກໍ່ສ້າງໂຮງຮຽນມັດທະຍົມວິຊາຊີບຕົວແບບມິດຕະພາບລາວ-ຫວຽດນາມ; ຕັ້ງໜ້າປະຕິບັດເປົ້າໝາຍການພັດທະນາແບບຍືນຍົງ ສາມາດບັດລຸໄດ້ 11 ຕົວຊີ້ບອກ, ສ່ວນຕົວຊີ້ວັດທີ່ເຫຼືອແມ່ນຢູ່ໃນທ່າອ່ຽງດີຂຶ້ນ; ເມືອງໄດ້ເອົາໃຈໃສ່ຄຸ້ມຄອງບໍລິຫານການຮຽນ-ການສອນ ຖືກຕ້ອງຕາມຫຼັກສູດໂຄງການທີ່ກະຊວງສຶກສາທິການ ແລະ ກິລາວາງອອກ. ການສ້າງຄູປະສົບການ, ການສ້າງໂຮງຮຽນຕົວແບບມີລັກສະນະເພີ່ມຂຶ້ນ; ດ້ານກິລາ-ກາຍຍະກໍາໄດ້ຊຸກຍູ້ສົ່ງເສີມນັກກິລາທີ່ມີພອນສະຫວັນ ໄດ້ເຂົ້າຮ່ວມການແຂ່ງຂັນລະດັບເມືອງ, ແຂວງ ແລະ ລະດັບຊາດ ສາມາດຍາດໄດ້ 5 ຫຼຽນຄໍາ, 1 ຫຼຽນເງິນ ແລະ 4 ຫຼຽນທອງ ອັນໄດ້ນໍາເອົາກຽດຊື່ສຽງມາສູ່ປະຊາຊົນຊາວເມືອງໜອງບົກ.

ວຽກງານສາທາລະນະສຸກກໍໄດ້ຮັບການປັບປຸງ ແລະ ຍົກລະດັບການບໍລິການ ພ້ອມທັງຕອບສະໜອງອຸປະກອນການແພດ ແລະ ຢາທີ່ຈໍາເປັນໃຫ້ໂຮງໝໍນ້ອຍ; ຖືເອົາວຽກງານໂຄສະນາສຸຂະສຶກສາປ້ອງກັນ ເປັນຕົ້ນຕໍ ແລະ ປິ່ນປົວເປັນສໍາຄັນ; ພະນັກງານແພດໝໍໄດ້ຍົກລະດັບວິຊາສະເພາະ, ຈັນຍາບັນ- ຈັນຍາທໍາ ສູງຂຶ້ນ; ໄດ້ສຸມທຸກກໍາລັງເພື່ອປຸກລະດົມທົ່ວສັງຄົມເຂົ້າຮ່ວມຕ້ານ, ສະກັດກັ້ນ ແລະ ແກ້ໄຂ ການລະບາດພະຍາດໂຄວິດ-19, ພະຍາດລະບາດຕາມລະດູການ ແລະ ສາມາດສັກຢາວັກຊິນໃຫ້ປະຊາຊົນ ໃນກຸ່ມເປົ້າໝາຍບັນລຸຕາມແຜນ; ການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ບັນລຸໄດ້ 10 ຕົວຊີ້ບອກ ແລະ ສໍາເລັດການປະກາດຮັບຮອງເມືອງໜອງບົກເປັນເມືອງຢຸດຕິການຖ່າຍຊະຊາຍ.

5 ປີ ຜ່ານມາ, ວຽກງານຖະແຫຼງຂ່າວ,ວັດທະນະທໍາ ແລະທ່ອງທ່ຽວ ໄດ້ເຄື່ອນໄຫວເກັບກໍາຂໍ້ມູນຂ່າວສານ ແລະ ເຜີຍແຜ່ແນວທາງນະໂຍບາຍຂອງພັກ, ກົດໝາຍຂອງລັດ ຜ່ານທາງວິທະຍຸກະຈາຍສຽງຂອງເມືອງ, ໂທລະໂຄ່ງປະຈໍາບ້ານ ແລະ ສື່ສັງຄົມອອນລາຍ ຢ່າງແຂງແຮງທົ່ວເຖິງ; ຮີດຄອງປະເພນີ ວັດທະນະທໍາອັນດີງາມ ໄດ້ຮັບການອະນຸລັກສົ່ງເສີມ; ຄອບຄົວວັດທະນະທໍາໄດ້ມີການຮັບຮອງເພີ່ມຂຶ້ນ, ບ້ານວັດທະນະທໍາ ໄດ້ຮັບການປະເມີນຢ່າງຕໍ່ເນື່ອງ; ໄດ້ຄຸ້ມຄອງ-ຕິດຕາມ ຜູ້ປະກອບການທ່ອງທ່ຽວ ໃຫ້ເຄື່ອນໄຫວຖືກຕ້ອງ ສອດຄ່ອງຕາມລະບຽບກົດໝາຍ.

ໄປພ້ອມກັນນັ້ນ,ເມືອງຍັງໄດ້ເພີ່ມຄວາມເອົາໃຈໃສ່ວຽກງານແຮງງານ ແລະສະຫວັດດີການ-ສັງຄົມ: ໄດ້ຊຸກຍູ້ການຝຶກອົບຮົມວິຊາຊີບ, ພັດທະນາ ຍົກລະດັບສີມືແຮງງານໄດ້ລື່ນຄາດໝາຍ; ສົ່ງເສີມຈັດຫາວຽກເຮັດງານທໍາ, ຄຸ້ມຄອງ-ຕິດຕາມ ກວດກາ ແຮງງານພາຍໃນ ແລະ ຕ່າງປະເທດທີ່ມາເຄື່ອນໄຫວອອກແຮງງານໃຫ້ຖືກຕ້ອງຕາມລະບຽບກົດໝາຍ; ໄດ້ຄົ້ນຄວ້າ ແລະ ນໍາສະເໜີການປະຕິບັດນະໂຍບາຍຕໍ່ພະນັກງານນັກຮົບປະຕິວັດ, ຜູ້ທີ່ມີຄຸນງາມຄວາມດີ, ຊ່ວຍເຫຼືອບັນເທົາທຸກໃຫ້ແກ່ຄອບຄົວ-ບຸກຄົນທີ່ໄດ້ຮັບຜົນກະທົບຈາກໄພພິບັດ ແລະ ປະເທດຊາດ; ເຄື່ອນໄຫວປຸກລະດົມຮັບບໍລິຈາກເລືອດຢ່າງເປັນປົກກະຕິ.

ໃນ 5 ປີຕໍ່ໜ້ານີ້,ເມືອງໜອງບົກຈະຕັ້ງໜ້າລົງທຶນພັດທະນາວຽກງານສຶກສາທິການ ແລະກິລາ ສູ້ຊົນປະຕິບັດຄາດໝາຍການພັດທະນາແບບຍືນຍົງໃນຂົງເຂດການສຶກສາໃຫ້ບັນລຸ 100%; ປັບປຸງພື້ນຖານໂຄງລ່າງດ້ານສຶກສາໃຫ້ມີຄຸນນະພາບດີ; ສ້າງຄວາມເຂັ້ມແຂງໃຫ້ຜູ້ບໍລິຫານການສຶກສາ, ຄະນະພັດທະນາການສຶກສາຂັ້ນບ້ານ ໃນການເຄື່ອນໄຫວຕາມພາລະບົດບາດຂອງຕົນ; ສ້າງຄູສອນດີ, ນັກຮຽນເກັ່ງ, ສ້າງໂຮງຮຽນຕົວແບບ ແລະສ້າງຄູປະສົບການທີ່ມີຄຸນນະພາບ ໃຫ້ບັນລຸຕາມແຜນທີ່ວາງໄວ້; ປຸກລະດົມໃຫ້ຊຸມຊົນສ້າງ ແລະ ປັບປຸງສະໝາມກິລາ, ສະຖານທີ່ອອກກໍາລັງກາຍ, ຊຸກຍູ້ສ້າງຂະບວນການເຄື່ອນໄຫວການແຂ່ງຂັນກິລາປະຈໍາປີ, ຂະບວນການແຂ່ງຂັນກິລາຂໍ່ານັບຮັບຕ້ອນວັນສໍາຄັນຕ່າງໆຢ່າງ ເປັນປົກກະຕິ ເພື່ອສ້າງນັກກິລາທີ່ມີພອນສະຫວັນ ກາຍເປັນນັກກິລາທີມຊາດ-ທີມແຂວງໃຫ້ຫຼາຍຂຶ້ນ; ຊຸກຍູ້ປຸກລະດົມມວນຊົນໃຫ້ອອກກໍາລັງກາຍ ແລະ ຫຼິ້ນກິລາເພີ່ມຂຶ້ນໄດ້ຕາມແຜນທີ່ວາງໄວ້. ປັບປຸງພື້ນຖານໂຄງລ່າງດ້ານສາທາລະນະສຸກໃຫ້ດີຂຶ້ນ,ໂຄສະນາສຸຂະສຶກສາ, ປ້ອງກັນພະຍາດເປັນຕົ້ນຕໍ, ການບໍລິການ-ການປິ່ນປົວເປັນສໍາຄັນ, ຕ້ານ ແລະ ສະກັດການແຜ່ລະບາດຂອງພະຍາດຕາມລະດູການ; ສູ້ຊົນປະຕິບັດຄາດໝາຍການພັດທະນາແບບຍືນຍົງ ໃນຂົງເຂດສາທາລະນະສຸກໃຫ້ບັນລຸ 100%; ສູ້ຊົນໃຫ້ໂຮງໝໍເມືອງເປັນໂຮງໝໍປະເພດ (ກ) ສາມາຜ່າຕັດຂະໜາດກາງໄດ້; ສ້າງໂຮງໝໍນ້ອຍຕົວແບບໃນການບໍລິການ,ປະຕິບັດ 5 ດີ 1 ພໍໃຈ ໃຫ້ມີຄຸນນະພາບ; ຮັບປະກັນໃຫ້ປະຊາຊົນມີອາຍຸຍືນສະເລ່ຍ 63 ປີຂຶ້ນໄປ; ຂະຫຍາຍບ້ານແບບຢ່າງສາທາລະນະສຸກໃຫ້ເພີ່ມຂຶ້ນ ແລະ ຕິດຕາມປະເມີນ ແລະເຜີຍແຜ່ຮັກສານາມມະຍົດບ້ານແບບຢ່າງສາທາລະນະສຸກທີ່ມີແລ້ວໃຫ້ຍືນຍົງ.

ຕັ້ງໜ້າລົງເຄື່ອນໄຫວ ເກັບກໍາຂ່າວ, ຂຽນຂ່າວ, ລາຍງານຂ່າວ ເຫດການຕ່າງໆ,ການພັດທະນາສ້າງສາພັດທະນາເມືອງ,ຄອບຄົວຕົວແບບ ໃຫ້ເປັນປົກກະຕິຕໍ່ເນື່ອງ ແລະທັນເຫດການ; ສືບຕໍ່ໂຄສະນາເຜີຍແຜ່ແນວທາງນະໂຍບາຍຂອງ ພັກ-ລັດ, ຜ່ານທາງສະຖານີວິທະຍຸກະຈາຍສຽງຂອງເມືອງໂທລະໂຄ່ງປະຈໍາບ້ານ, ສື່ສັງຄົມອອນລາຍ; ອະນຸລັກຮັກສາຮີດຄອງປະເພນີອັນດີງາມຂອງເຜົ່າໃຫ້ຍືນຍົງ; ຊຸກຍູ້ສົ່ງເສີມການປະດິດຄິດແຕ່ງ, ບົດເພງ, ການຂັບລໍາ, ບົດຟ້ອນ ທີ່ເປັນມູນເຊື້ອ ໃຫ້ເປັນຂະບວນການຟົດຟື້ນ; ສ້າງຫໍພິພິທະພັນຂອງເມືອງໃຫ້ໄດ້ 1 ແຫ່ງ; ປະເມີນຄືນ ແລະຂະຫຍາຍຄອບຄົວ ແລະບ້ານວັດທະນະທໍາໃຫ້ໄດ້ 100%; ສ້າງສູນວັດທະນະທໍາເດັກໃຫ້ໄດ້ 1 ແຫ່ງ; ປັບປຸງຍົກລະດັບພື້ນຖານໂຄງລ່າງດ້ານການທ່ອງທ່ຽວ, ຄຸ້ມຄອງກິດຈະການທ່ອງທ່ຽວໃຫ້ຜູ້ປະກອບການເຄື່ອນໄຫວຖືກຕ້ອງຕາມລະບຽບກົດໝາຍ; ພັດທະນາສະຖານທີ່ທ່ອງທ່ຽວທາງດ້ານປະຫວັດສາດວັດທະນະທໍາ ແລະ ດ້ານກະສິກໍາ ເພື່ອດຶງດູດນັກທ່ອງທ່ຽວໃຫ້ຫຼາຍຂຶ້ນ. ເມືອງຈະສືບຕໍ່ຊຸກຍູ້ການພັດທະນາສີມືແຮງງານໃຫ້ບັນລຸ 80 ຄົນ, ຈັດຫາວຽກເຮັດງານທໍາໃຫ້ຜູ້ທີ່ວ່າງງານໃຫ້ບັນລຸ 200 ຄົນ, ຄຸ້ມຄອງແຮງງານພາຍໃນ ແລະຕ່າງປະເທດ ທີ່ມາເຄື່ອນໄຫວອອກແຮງງານພາຍໃນເມືອງໃຫ້ຖືກຕາມລະບຽບກົດໝາຍ; ປະຕິບັດລະບອບປະກັນສັງຄົມ ສໍາລັບພະນັກງານ-ລັດຖະກອນ, ໃນລັດວິສາຫະກິດ ແລະວຽກສັງຄົມສົງເຄາະໃຫ້ກວ້າງຂວາງ; ປະຕິບັດນະໂຍບາຍ ແລະສະຫວັດດີການຕໍ່ຜູ້ທີ່ມີຄຸນງາມຄວາມດີຕໍ່ປະເທດຊາດ, ພະນັກງານອາວຸໂສບໍານານຕາມລະບຽບການ; ກະກຽມຄວາມພ້ອມປ້ອງກັນ ແລະຕອບໂຕ້ໄພພິບັດທີ່ອາດຈະເກີດຂຶ້ນ, ສ້າງສູນຫຼົບໄພ ຈາກອຸທົກກະໄພ; ສ້າງຄອບຄົວ, ບ້ານພັດທະນາທາງດ້ານແຮງງານ ແລະສະຫວັດດີການ-ສັງຄົມ ໃຫ້ໄດ້ 15 ບ້ານ ເຄື່ອນໄຫວປຸກລະດົມຂົນຂວາຍຮັບບໍລິຈາກເລືອດໃຫ້ໄດ້ 1,350 ຖົງ ແລະ ສ້າງໜ່ວຍງານກູ້ຊີບກູ້ໄພໃຫ້ໄດ້ 1 ຫົວໜ່ວຍ.