ນວ ຈະສືບຕໍ່ຕອບໂຕ້-ຟື້ນຟູ ຫຼັງໄພພິບັດພາຍຸໝາກເຫັບຕົກ

ທ່ານ ສາລະພິດ ສູນວໍລະວົງ ໃຫ້ຮູ້ວ່າ: ໃນຕອນແລງວັນທີ 22 ມີນາ 2026 ຜ່ານມາ, ໄດ້ມີພາຍຸລະດູຮ້ອນເກີດຂຶ້ນ ຊຶ່ງເຮັດໃຫ້ເກີດມີລົມແຮງ, ຝົນຕົກໜັກ ແລະ ເກີດມີໝາກເຫັບ ຕົກໜັກຢູ່ສອງເມືອງດັ່ງກ່າວ ໄດ້ສົ່ງຜົນກະທົບຕໍ່ທີ່ຢູ່ອາໄສ ແລະ ຊັບສິນ ຂອງປະຊາຊົນທັງສອງເມືອງຈໍານວນ 18 ບ້ານ. ສະນັ້ນ, ການຈັດຕັ້ງປະຕິບັດການຕອບໂຕ້ ແລະ ການຟື້ນຟູຂອງຄະນະກໍາມະການຄຸ້ມຄອງໄພພິບັດຂັ້ນ ນວ ແລະ ຂັ້ນເມືອງມາຮອດ ວັນທີ 8 ເມສາ 2026 ໄດ້ສຸມໃສ່ແກ້ໄຂຊ່ວຍເຫຼືອປະຊາຊົນທີ່ໄດ້ຮັບຜົນກະທົບ. ພາຍຫຼັງເກີດເຫດ, ຄະນະກໍາ ມະການຄຸ້ມຄອງໄພພິບັດຂັ້ນ ນວ ກໍ ໄດ້ຄົ້ນຄວ້າລົງສົມທົບກັບຄະນະກຳ ມະການຄຸ້ມຄອງໄພພິບັດຂັ້ນເມືອງ ແລະ ອົງການປົກຄອງແຕ່ລະບ້ານ ໂດຍເລັ່ງໃສ່ເກັບກໍາຈໍານວນບ້ານ ແລະ ຫຼັງຄາເຮືອນທີ່ໄດ້ຮັບຜົນກະທົບໃນເບື້ອງຕົ້ນມີຈັກບັນຫາ ໂດຍເລັ່ງໃສ່ແກ້ ໄຂ 8 ບັນຫາເປັນອັນຮີບດ່ວນຄື: ແກ້ໄຂໄຟຟ້າ, ອິນເຕີເນັດ, ນໍ້າປະປາ, ນໍ້າໃຊ້ຄົວເຮືອນ, ຂີ້ເຫຍື້ອສິ່ງເສດ ເຫຼືອຂອງກະເບື້ອງ, ສັງກະສີ, ນໍ້າດື່ມ, ເຂົ້າກິນ, ອາຫານ, ເຄື່ອງໃຊ້ໃນຄົວເຮືອນທີ່ຈໍາເປັນ, ຊ່ວຍເຫຼືອທາງດ້ານແຮງງານຈາກກໍາລັງ ປກຊ-ປກສ, ກໍາລັງຈາກສູນກາງຊາວໜຸ່ມ ແລະ ຊາວ ໜຸ່ມຈາກຂະແໜງການອ້ອມຂ້າງ ນວ; ເລັ່ງສ້ອມແປງຫຼັງຄາເຮືອນ. ໃນນີ້, ໄດ້ ຈັດບຸລິມະສິດໃນການຊ່ວຍເຫຼືອເບື້ອງຕົ້ນ; ໄດ້ມອບໝາຍໃຫ້ສະຫາຍກໍາມະການພັກ ນວ 1 ສະຫາຍ ຮັບຜິດຊອບ 1 ບ້ານ ເພື່ອລົງບັນຊານໍາພາ-ຊີ້ນໍາ ວຽກຮອບດ້ານກັບທີ່ໂດຍກົງ ເປັນຕົ້ນ ການເກັບກໍາຂໍ້ມູນຫຼັງຄາເຮືອນທີ່ຖືກຜົນກະທົບ, ຄອບຄົວທຸກຍາກທີ່ຖືກຜົນກະທົບ, ວຽກປ້ອງກັນຄວາມສະ ຫງົບ ແລະ ວຽກອື່ນໆທີ່ກ່ຽວຂ້ອງໄພພິບັດຄັ້ງນີ້; ໄດ້ມອບໃຫ້ທຸກພະແນກການ, ອົງການ, ກົມກອງຂັ້ນ ນວ ສົມທົບກັບຂັ້ນເມືອງລົງຮັບຜິດຊອບແຕ່ລະບ້ານ ໂດຍປະຕິບັດໜ້າວຽກ ຂອງຂະແໜງຕົນເອງເປັນຫຼັກ, ໄດ້ຈັດຕັ້ງສູນບັນຊາຢູ່ແຕ່ລະຈຸດເພື່ອປະຈໍາການປົກກະຕິທັງກາງເວັນ ແລະ ກາງຄືນ ເພື່ອອໍານວຍຄວາມສະດວກໃນ ການບໍລິການຮັບໃຊ້ປະຊາຊົນເພື່ອ ຮັບຄໍາສະເໜີ, ແຈກຢາຍເຄື່ອງຊ່ວຍເຫຼືອ ແລະ ບັນຊາການແກ້ໄຂບັນຫາຂອງປະຊາຊົນທີ່ໄດ້ຮັບຜົນກະທົບ ເປັນແຕ່ລະກໍລະນີ ພ້ອມທັງເປັນຈຸດບໍລິການລົດເມບໍ່ເສຍຄ່າ; ກໍານົດເອົາຈຸດຫ້ອງການບ້ານຈັນສະຫວ່າງ ເມືອງສີໂຄດຕະບອງເປັນຈຸດບໍລິການ ເປັນຕົ້ນສູນບໍລິການໄຟຟ້າ, ນໍ້າປະປາ, ບໍລິການ ພື້ນຖານໂຄງລ່າງ, ບໍລິການເກັບມ້ຽນຂີ້ເຫຍື້ອ, ອິນເຕີເນັດ, ສາທາລະນະສຸກ, ກູ້ໄພກູ້ຊີບ, ການບໍລິການນໍ້າປະປາເຄື່ອນທີ່, ແຮງງານເພື່ອເຮັດອະນາໄມ ແລະ ມຸງຫຼັງຄາເຮືອນ ໂດຍມີການ ແບ່ງໜ້າທີ່ກັນຢ່າງລະອຽດ.

ທ່ານ ສາລະພິດ ສູນວໍລະວົງ ໃຫ້ຮູ້ຕື່ມວ່າ: ຜ່ານການຈັດຕັ້ງປະຕິບັດວຽກງານດັ່ງກ່າວ ນັບແຕ່ວັນທີ 22 ມີນາ ເຖິງວັນທີ 8 ເມສາ 2026 ຄະນະກຳມະການຄຸ້ມຄອງໄພພິບັດ ນວ ຂໍຢັ້ງຢືນການສ້ອມແປງຫຼັງຄາເຮືອນ, ການສ້ອມແປງໄຟຟ້າ, ການສ້ອມແປງນໍ້າປະປາຄົວເຮືອນ, ການບໍລິການນໍ້າປະປາເຄື່ອນທີ່, ການບໍລິການເກັບມ້ຽນຂີ້ເຫຍື້ອຄື: ເມືອງສີໂຄດຕະບອງ: ມີ 10 ບ້ານ ໄດ້ຮັບຜົນກະທົບ 6,386 ຫຼັງຄາເຮືອນ ແລະ ມາຮອດວັນທີ 8 ເມສາ 2026 ໄດ້ຮັບການສ້ອມແປງ ແລ້ວ 5,230 ຫຼັງຄາເຮືອນ ເທົ່າກັບ 82%; ກໍາລັງສ້ອມແປງ 1,060 ຫຼັງຄາເຮືອນ ເທົ່າກັບ 16.5% ແລະ ຍັງບໍ່ທັນໄດ້ຮັບການສ້ອມແປງ 96 ຫຼັງຄາເຮືອນ ເທົ່າກັບ 1.5%: (ສະ ເພາະຫຼັງຄາເຮືອນທີ່ຍັງບໍ່ທັນສ້ອມແປງ 96 ຫຼັງ. ໃນນີ້, ມີ 44 ຫຼັງ ແມ່ນຍ້ອນຍັງບໍ່ທັນມີເງິນຊື້ວັດຖຸ, 15 ຫຼັງເປັນເຮືອນທີ່ເຈົ້າຂອງເຮືອນຊື້ປະໄວ້ຍັງບໍ່ທັນມາຢູ່ ແລະ ອີກ 1 ຫຼັງ ມີວັດຖຸແລ້ວ ແຕ່ລໍຖ້ານາຍຊ່າງມາສ້ອມແປງ. ນອກຈາກນັ້ນ, ເປັນເຮືອນສວນທີ່ເຈົ້າຂອງຢູ່ໃນເມືອງຍັງບໍ່ທັນ ໄດ້ເຂົ້າໄປສ້ອມແປງ), ໂຮງຮຽນ 11 ແຫ່ງ ກໍາລັງສ້ອມແປງ 2 ແຫ່ງ, ວັດ 3 ແຫ່ງ, ຫ້ອງການບ້ານ 1 ຫຼັງ, ສຸກສາລາ ບ້ານ 1 ແຫ່ງ ແມ່ນກໍາລັງສ້ອມແປງ, ສ່ວນໂຮງງານຜະລິດຢາວັກຊິນ 1 ແຫ່ງ ທີ່ຍັງບໍ່ທັນສ້ອມແປງໄດ້ທັນກັບສະພາບນັ້ນ ຍ້ອນວ່າກໍາລັງສັ່ງຊື້ວັດສະດຸ. ສໍາລັັບຄ້າຍທະຫານກອງພັນ ໃຫຍ່ຈໍ 11 ທີ່ໄດ້ຮັບຜົນເສຍຫາຍ ຈໍານວນ 109 ຫຼັງຄາເຮືອນ ມາຮອດ ປັດຈຸບັນແມ່ນໄດ້ສໍາເລັດການສ້ອມແປງແລ້ວ 14 ຫຼັງ, ກໍາລັງສ້ອມແປງ 95 ຫຼັງ (ສາເຫດສ້ອມແປງຊັກຊ້າ ແມ່ນລໍຖ້າວັດຖຸ); ເມືອງນາຍຊາຍທອງ: ມີ 8 ບ້ານ ໄດ້ຮັບຜົນກະທົບ ຈໍານວນ 1,502 ຫຼັງຄາເຮືອນ, ສໍາເລັດການສ້ອມແປງແລ້ວ 100%.

ມາຮອດປັດຈຸບັນລວມຍອດລາຍຮັບທີ່ໄດ້ຈາກງົບປະມານ ແລະ ການປະ ກອບສ່ວນຊ່ວຍເຫຼືອຈາກທຸກພາກສ່ວນເປັນເງິນສົດທັງໝົດ 14 ຕື້ກວ່າກີບ ແລະ ໄດ້ເບີກຈ່າຍຮັບໃຊ້ເຂົ້າໃນວຽກງານແກ້ໄຂສຸກເສີນ ແລະ ມອບ ເງິນສົດໃຫ້ກັບຄອບຄົວຜູ້ປະສົບໄພທີ່ຫຍຸ້ງຍາກ ເພື່ອນໍາໄປຊື້ວັດຖຸອຸປະກອນທີ່ຈຳເປັນລວມຈຳນວນ 3 ຕື້ ກວ່າກີບ. ສ່ວນທີ່ຍັງເຫຼືອແມ່ນຍັງຈະໄດ້ສືບຕໍ່ເຂົ້າໃນການແກ້ໄຂຊ່ວຍເຫຼືອຄອບຄົວຜູ້ຖືກຜົນກະທົບເພື່ອ ການຟື້ນຟູຜົນເສຍຫາຍຕ່າງໆ.

ຂ່າວ-ພາບ: ວັນເພັງ