 |
ໃນວາລະ, ສະຫາຍ ອາດສະພັງທອງ ສີພັນດອນ ໄດ້ນໍາສະເໜີ ຫົວຂໍ້ທີ 1: “ເພີ່ມທະວີການນໍາພາ-ຊີ້ນໍາຕໍ່ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງປະຊາຊົນ” ຊຶ່ງໄດ້ຍົກໃຫ້ຮູ້ເນື້ອໃນບາງຕອນທີ່ສໍາຄັນ ວ່າ: ທິດນໍາການພັດທະນາຊົນນະບົດ ແລະ ແກ້ໄຂຄວາມທຸກຍາກ ກ່ອນອື່ນ ຕ້ອງຢຶດໝັ້ນຢ່າງສະເໝີຕົ້ນສະເໝີປາຍ ການພັດທະນາຊົນນະບົດຮອບດ້ານ, ຖືເປັນໜ້າທີ່ຍຸດທະສາດ, ທັງເປັນວຽກບຸລິມະສິດສໍາຄັນຂອງພັກ-ລັດ ແລະ ທົ່ວສັງຄົມ, ພັດທະນາຊົນນະບົດ ຍາມໃດກໍຕິດພັນກັບການແກ້ໄຂຄວາມທຸກຍາກ ແລະ ສ້າງຄວາມຮັ່ງມີ ໃຫ້ແກ່ປະຊາຊົນ ຊຶ່ງບໍ່ພຽງແຕ່ແມ່ນການເຮັດຕາມຄວາມມຸ່ງມາດປາຖະໜາອັນແຮງກ້າ ຂອງປະຊາຊົນ ແລະ ອຸດົມການອັນສູງສົ່ງຂອງພັກເທົ່ານັ້ນ, ຫາກຍັງແມ່ນການເຂົ້າຮ່ວມປະຕິບັດພັນທະສາກົນ ໃນການພັດທະນາແບບຍືນຍົງ, ຕ້ອງເຮັດໃຫ້ລະບົບການເມືອງຢູ່ຊົນນະບົດ ມີຄວາມເຂັ້ມແຂງ, ໜັກແໜ້ນ, ສາມາດນໍາພາປະຊາຊົນ ເປັນເຈົ້າໃນການປົກປັກຮັກສາ, ພັດທະນາຕົນເອງ ແລະ ພັດທະນາບ້ານຊ່ອງ ໃຫ້ຫຼຸດພົ້ນຈາກຄວາມທຸກຍາກ ຊຶ່ງສະແດງອອກ: ເສດຖະກິດໄດ້ຮັບການພັດທະນາ, ຊີວິດການເປັນຢູ່ດ້ານວັດຖຸ ແລະ ຈິດໃຈ ຂອງປະຊາຊົນຢູ່ຊົນນະບົດໄດ້ຮັບການປົວແປງໃຫ້ດີຂຶ້ນຈະແຈ້ງ, ມີພື້ນຖານໂຄງລ່າງເສດຖະກິດ-ສັງຄົມ, ມີສິ່ງແວດລ້ອມທີ່ດີ, ການສຶກສາ, ສາທາລະນະສຸກ ໄດ້ຮັບການຍົກລະດັບເຂົ້າສູ່ຄຸນນະພາບໃໝ່, ວັດທະນະທຳທີ່ເປັນເອກະລັກ ຂອງທ້ອງຖິ່ນ ໄດ້ຮັບການອະນຸລັກ ແລະ ເສີມຂະຫຍາຍຢ່າງຕັ້ງໜ້າ
ທິດທາງ, ໜ້າທີ່ຈຸດສຸມ ຍູ້ແຮງການສົ່ງເສີມການຜະລິດກະສິກຳ ແລະ ປ່າໄມ້ເປັນສິນຄ້າ ຕິດພັນກັບອຸດສາຫະກຳປຸງແຕ່ງ ແລະ ການຕະຫຼາດ ຕາມທ່າແຮງໄດ້ປຽບຂອງທ້ອງຖິ່ນ ແລະ ເຂດແຄວ້ນ, ຊຸກຍູ້ການພັດທະນາວິສາຫະກິດ, ຟາມ, ຄອບຄົວຕົວແບບ ໃນການຜະລິດສິນຄ້າສົດ, ຊີວະພາບ, ສະ ອາດ (ປອດສານພິດ) ສະໜອງໃຫ້ແກ່ຕົວເມືອງ ປ່ຽນແທນການນໍາເຂົ້າ ແລະ ວຽກງານອື່ນໆ.
(ຂ່າວ: ແສງຈັນ)
ຄໍາເຫັນ