ນວ ສືບຕໍ່ຝຶກອົບຮົມ ພະນັກງານລົງກໍ່ສ້າງຮາກຖານການເມືອງ

ສະຫາຍ ເຂັມເພັດ ແພງດວງຈັນ ຍົກໃຫ້ຮູ້ໃນຫົວຂໍ້ທີ 3: ກຳແໜ້ນ ແລະ ຈັດຕັ້ງປະຕິບັດ 4 ຄາດໝາຍ 4 ເນື້ອໃນວຽກງານກໍ່ສ້າງຮາກຖານການເມືອງ ຄື: ຮັບປະກັນເຮັດໃຫ້ລະບົບການເມືອງຢູ່ຮາກຖານ ມີຄວາມເຂັ້ມແຂງເຊັ່ນ: ມີໜ່ວຍພັກໄດ້ຮັບການຢັ້ງຢືນເປັນໜ່ວຍພັກປອດໃສ, ເຂັ້ມແຂງ, ໜັກ ແໜ້ນ. ມີອົງການປົກຄອງບ້ານ, ແນວລາວສ້າງຊາດ, ສະຫະພັນນັກຮົບເກົ່າ ແລະ ບັນດາອົງການຈັດຕັ້ງມະຫາຊົນ ເຄື່ອນໄຫວຕາມພາລະບົດບາດໜ້າທີ່ຂອງຕົນເປັນປົກກະຕິ, ສາມາດເຕົ້າໂຮມຄວາມສາມັກຄີ ກັບປະຊາຊົນບັນດາເຜົ່າ, ຊັ້ນຄົນພາຍໃນບ້ານ, ທັງຮູ້ປຸກລະດົມ ແລະ ນໍາພາຊາວບ້ານເຂົ້າຮ່ວມປົກປັກຮັກສາ ແລະ ພັດທະນາບ້ານຂອງຕົນ, ຮູ້ແກ້ໄຂຂໍ້ຂັດແຍ່ງຢ່າງຖືກຕ້ອງເປັນທຳ, ຊາວບ້ານທຸກຄົນມີຄວາມຕື່ນຕົວການເມືອງ, ມີຄວາມຫ້າວຫັນ ເປັນເຈົ້າການປະຕິບັດວຽກງານລວມຂອງບ້ານ ກໍຄືການດໍາລົງຊີວິດ ທຳມາຫາກິນສ້າງຄວາມຮັ່ງມີໃຫ້ແກ່ຄອບຄົວທີ່ຖືກຕ້ອງ.

ຈຸດປະສົງເພື່ອຜັນຂະຫຍາຍເນື້ອໃນ ຂອງກົດໝາຍວ່າດ້ວຍການປົກຄອງທ້ອງຖິ່ນ ສະບັບປັບປຸງ ປີ 2025 ກ່ຽວກັບຕາແສງ ແລະ ຄະນະກໍາມະການປົກຄອງຕາແສງ ໃຫ້ລະອຽດ, ຈະແຈ້ງ ແນໃສ່ເຮັດໃຫ້ມີຄວາມເຂົ້າໃຈ ເປັນເອກະພາບໃນການຈັດຕັ້ງປະຕິບັດ ໃນຂອບເຂດທົ່ວປະເທດ, ເພື່ອເປັນບ່ອນອີງໃຫ້ແກ່ກະຊວງ, ອົງການຂັ້ນສູນກາງທີ່ກ່ຽວຂ້ອງ, ຄົ້ນຄວ້າອອກນິຕິກໍາ ກ່ຽວກັບ ການແບ່ງຂັ້ນຄຸ້ມຄອງ ຂອງຂະແໜງການຕົນ ຢູ່ຕາແສງ, ເພື່ອເປັນບ່ອນອີງໃຫ້ອົງການປົກຄອງທ້ອງຖິ່ນ ດໍາເນີນການຄົ້ນຄວ້າ, ກະກຽມສ້າງຕັ້ງຕາແສງ ຕາມທີ່ໄດ້ກໍານົດໄວ້ໃນກົດໝາຍວ່າດ້ວຍການປົກຄອງທ້ອງຖິ່ນ ສະບັບປັບປຸງປີ 2025 ແລະ ນິຕິກຳອື່ນໆທີ່ກ່ຽວຂ້ອງ.

ໃນຕອນແລງຂອງວັນດຽວກັນ, ສະຫາຍ ພູທອນ ແກ້ວດວງມະນີ ກໍາມະການປະຈໍາພັກ ຫົວໜ້າຄະນະຈັດຕັ້ງ ນວ ໄດ້ໃຫ້ກຽດບັນລະຍາຍເອກະສານ ໃນຫົວຂໍ້ທີ 4: ທີ່ຕັ້ງ, ພາລະບົດບາດ, ສິດ, ໜ້າທີ່ ແລະ ລະບຽບການ ຂອງພະນັກງານກໍ່ສ້າງຮາກຖານການເມືອງ ພະນັການກໍ່ສ້າງຮາກຖານ ແມ່ນພະນັກ ງານງານຫຼັກແຫຼ່ງ ທີ່ໄດ້ຮັບການເລືອກເຟັ້ນດ້ວຍມາດຖານ ແລະ ເງື່ອນໄຂຈາກຂະແໜງການຕ່າງໆຂອງສູນກາງ ແລະ ທ້ອງຖິ່ນຕ່າງໆ. ພາລະບົດບາດຂອງພະນັກງານກໍ່ສ້າງຮາກຖານການເມືອງ ກ່ອນອື່ນໝົດຕ້ອງເປັນຄົນທີ່ມີຫຼັກໝັ້ນການເມືອງຢ່າງຈະແຈ້ງຖືກຕ້ອງ, ກຳແໜ້ນແນວທາງຂອງພັກ, ນະໂຍບາຍຂອງລັດ, ມີຄວາມສາມາດໂຄສະນາເຜີຍແຜ່ແນວທາງຂອງພັກ, ນະໂຍບາຍຂອງລັດ, ເປັນຄົນທີ່ມີຄຸນສົມບັດ ສິນທຳປະຕິວັດ, ມີທັດສະນະມະຫາຊົນຢ່າງຖືກຕ້ອງ, ມີແບບແຜນວິທີເຮັດວຽກ ຖືວຽກງານນີ້ເປັນປັດໃຈຕັດສິນຜົນສໍາເລັດຂອງການພັດທະນາຮາກຖານບ້ານ, ສຸມທຸກກຳລັງ, ທຸກການຊີ້ນໍາ-ນໍາພາເຂົ້າໃນການແກ້ໄຂຄວາມທຸກຍາກ ດ້ວຍການສົ່ງເສີມການຜະລິດ, ການບໍລິການ, ປັບປຸງຍົກສູງຄຸນນະພາບຊີວິດຂອງປະຊາຊົນໃຫ້ດີຂຶ້ນເລື້ອຍໆ, ພັດທະນາວັດທະນະທຳ-ສັງຄົມໃຫ້ສົມຄູ່ກັບການພັດທະນາເສດຖະກິດ ໂດຍສະເພາະແມ່ນການສົ່ງເສີມການສຶກສາ, ການຂະຫຍາຍຕາໜ່າງບໍລິການດ້ານສາທາລະນະສຸກໃຫ້ທົ່ວເຖິງ ແຕ່ລະບ້ານ, ຈັດຕັ້ງປະຕິບັດແນວທາງ ປກຊ-ປກສ ທົ່ງປວງຊົນຮອບດ້ານຢູ່ຮາກຖານບ້ານຢ່າງເປັນປົກກະຕິ, ສ້າງບ້ານປ້ອມໝັ້ນ ແລະ ກຸ່ມບ້ານສູ້ຮົບຕິດລຽນໃນບັນດາເຂດ ແລະ ບໍລິເວນຈຸດສຸມ, ແກ້ໄຂ ໄດ້ໜໍ່ແໜງ, ປັດໃຈຂອງຄວາມບໍ່ສະຫງົບປອດໄພ ແລະ ວຽກງານອື່ນໆ.

(ຂ່າວ: ແສງຈັນ)