 |
ສະຫາຍ ອຸ່ມ ພານຸເດດ ເລຂາໜ່ວຍພັກດ່ານສາກົນຂົວມິດຕະພາບນໍ້າເຫືອງ ໄດ້ຜ່ານບົດສະຫຼຸບການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2025 ແລະ ທິດທາງແຜນການ ປີ 2026, ຊຶ່ງໄດ້ຍົກໃຫ້ເຫັນຜົນງານດ້ານດີ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ໃນ 1 ປີຜ່ານມາ. ຕະຫຼອດໄລຍະຜ່ານມາ, ຄະນະໜ່ວຍພັກໄດ້ສຸມໃສ່ນໍາພາ-ຊີ້ນໍາການປະຕິບັດວຽກງານຕາມ 5 ເນື້ອໃນຂອງການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໂດຍສະເພາະແມ່ນດ້ານການເມືອງ-ແນວຄິດໄດ້ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ພະນັກງານ-ສະມາຊິກພັກຢ່າງຕໍ່ເນື່ອງ, ສ້າງຄວາມສາມັກຄີເປັນເອກະພາບ ແລະ ສະກັດກັ້ນປະກົດການຫຍໍ້ທໍ້.ດ້ານການຈັດຕັ້ງຍຶດໝັ້ນຫຼັກການລວມສູນປະຊາທິປະໄຕ, ນໍາພາເປັນໝູ່ຄະນະ ແລະ ແບ່ງຄວາມຮັບຜິດຊອບໃຫ້ບຸກຄົນຢ່າງຈະແຈ້ງ. ດ້ານວິຊາສະເພາະ ສາມາດຈັດເກັບລາຍຮັບໄດ້ 523.4 ຕື້ກວ່າກີບ ເທົ່າກັບ 95,69% ຂອງແຜນການປີ, ວຽກງານບໍລິຫານຜ່ານປະຕູດຽວເກັບລາຍຮັບໄດ້ 10 ຕື້ກວ່າກີບ, ວຽກງານ ຕມ ຄຸ້ມຄອງການເຂົ້າ-ອອກ ໄດ້ 521,000 ກວ່າເທື່ອຄົນ ແລະ ພາຫະນະ32,000 ກວ່າເທື່ອຄັນ ຮັບປະກັນຄວາມປອດໄພ 100%. ນອກນັ້ນ, ວຽກງານກັກກັນພືດ ສາມາດຄຸ້ມຄອງການສົ່ງອອກຜະລິດຕະພັນພືດ ມູນຄ່າກວ່າ 64 ລ້ານກວ່າໂດລາ ແລະ ນໍາເຂົ້ານໍ້າມັນເຊື້ອໄຟກວ່າ 132 ລ້ານກວ່າລິດ.
ຜ່ານການປະເມີນ ແລະ ແບ່ງປະເພດສະມາຊິກພັກ ສາມາດຄັດເລືອກໄດ້ສະມາຊິກພັກປະເພດແຂງ 40 ສະຫາຍ, ບໍ່ແບ່ງ 2 ສະຫາຍ (ສະມາຊິກພັກສຳຮອງ). ຜ່ານການຕີລາຄາ 5 ດ້ານ, ໜ່ວຍພັກດ່ານສາກົນຂົວມິດຕະພາບນ້ຳເຫືອງ ໄດ້ຄະແນນລວມ 48 ຄະແນນ, ສືບຕໍ່ຮັກສານາມມະຍົດເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ.
 |
ໃນຕອນທ້າຍ, ສະຫາຍ ສີຄານ ແກ່ນມະນີ ໄດ້ເນັ້ນໜັກໃຫ້ຄະນະໜ່ວຍພັກ ແລະ ສະມາຊິກພັກທຸກສະຫາຍ ຈົ່ງສືບຕໍ່ເພີ່ມທະວີຄວາມຮັບຜິດຊອບໃນໜ້າທີ່ການເມືອງ, ຮັກສາມູນເຊື້ອຄວາມສາມັກຄີ, ເຂັ້ມງວດໃນການຄຸ້ມຄອງການເຂົ້າ-ອອກດ່ານສາກົນໃຫ້ມີຄວາມສະຫງົບ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມໃຫ້ຂະຫຍາຍຕົວຂຶ້ນເລື້ອຍໆ.
(ຂ່າວ: ແກ່ນທ້າວ)
ຄໍາເຫັນ