ໜຶ່ງປີວຽກງານໂຄສະນາອົບຮົມ ໄດ້ຮັບການຈັດຕັ້ງເຄື່ອນໄຫວຢ່າງຕໍ່ເນື່ອງ

ຊຶ່ງໄດ້ສ້າງເງື່ອນໄຂອັນຈໍາເປັນພື້ນຖານ ໃຫ້ແກ່ວຽກງານໂຄສະນາອົບຮົມ ຈຶ່ງໄດ້ຮັບການຈັດຕັ້ງເຄື່ອນໄຫວຢ່າງຕໍ່ເນື່ອງ.

ສະຫາຍ ລາວປາວຊົ່ງ ນະວົງໄຊ ກໍາມະການສູນກາງພັກ ຮອງເລຂາຄະນະພັກ ຮອງຫົວໜ້າຄະນະໂຄສະນາອົບຮົມສູນກາງພັກ (ຄອສພ) ໄດ້ສະຫຼຸບຕີລາຄາວຽກງານໂຄສະນາອົບຮົມທົ່ວປະເທດ ປະຈຳປີ 2024 ແລະ ທິດທາງວຽກງານໃນປີ 2025 ຕໍ່ກອງປະຊຸມວຽກງານໂຄສະນາອົບຮົມທົ່ວປະເທດ ປະຈໍາປີ 2024 ພາຍໃຕ້ຄໍາຂວັນ: “ເສີມຂະຫຍາຍຈິດໃຈເອກະລາດ ເປັນເຈົ້າຕົນເອງວຽກງານໂຄສະນາອົບຮົມ ໃນໄລຍະໃໝ່” ໃນວັນທີ 23 ມັງກອນຜ່ານມາວ່າ: ໃນໄລຍະປີ 2024 ຜ່ານມາ, ວຽກງານແນວຄິດ ກໍຄືວຽກງານໂຄສະນາອົບຮົມ ໄດ້ຈັດຕັ້ງເຄື່ອນໄຫວຕິດພັນກັບບັນດາເຫດການ ການເມືອງ ຢ່າງຕໍ່ເນື່ອງ ຊຶ່ງຜົນການຈັດຕັ້ງປະຕິບັດຕົວຈິງ ເຮັດໃຫ້ໄດ້ຮັບຜົນສໍາເລັດຫຼາຍດ້ານ ໂດຍສະເພາະມີຫຼາຍເອກະສານຂອງພັກ ແລະ ລັດ ສືບຕໍ່ໄດ້ຮັບການຈັດຕັ້ງເຜີຍແຜ່, ເຊື່ອມຊຶມ ແລະ ຜັນຂະຫຍາຍເຂົ້າສູ່ຊີວິດຕົວຈິງ. ຄະນະພັກແຕ່ລະຂັ້ນ ໄດ້ເປັນເຈົ້າການຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ລວມທັງບັນດາມະຕິກອງປະຊຸມຄົບຄະນະຂອງຄະນະບໍລິຫານງານສູນກາງພັກ ຄັ້ງທີ 8 ແລະ 9 ສະໄໝ XI, ຜົນສໍາເລັດກອງປະຊຸມຄົບຄະນະກາງສະໄໝ ຂອງຄະນະບໍລິຫານງານສູນກາງພັກ ສະໄໝທີ XI, ຄໍາສັ່ງວ່າດ້ວຍການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນ ຂອງພັກ ສະບັບເລກທີ 411/ຄລສພ, ລົງວັນທີ 8 ສິງຫາ 2023; 2 ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ວ່າດ້ວຍການແກ້ໄຂບັນຫາຢາເສບຕິດ; ມະຕິວ່າດ້ວຍການສ້າງເສດຖະກິດເອກະລາດ ເປັນເຈົ້າຕົນເອງໃນໄລຍະໃໝ່ ສະບັບເລກທີ 04/ກມສພ ແລະ ອື່ນໆ ໃຫ້ແກ່ຖັນແຖວພະນັກງານ, ລັດຖະກອນ, ສະມາຊິກພັກ, ນັກຮົບ ແລະ ປະຊາຊົນບັນດາເຜົ່າໃນທົ່ວປະເທດ ຢ່າງເປັນຂະບວນການກວ້າງຂວາງ.

ຄຽງຄູ່ກັນນັ້ນ, ວຽກງານໂຄສະນາ ໄດ້ຮັບການຈັດຕັ້ງເຄື່ອນໄຫວຢ່າງຕໍ່ເນື່ອງ. ບັນດາອົງການຈັດຕັ້ງຂອງພັກ-ລັດ, ແນວລາວສ້າງຊາດ, ສະຫະພັນນັກຮົບເກົ່າ ແລະ ອົງການຈັດຕັ້ງມະຫາຊົນທຸກຂັ້ນ ໄດ້ສືບຕໍ່ເອົາໃຈໃສ່ຈັດຕັ້ງເຊື່ອມຊຶມ ແລະ ສຶກສາອົບຮົມໃຫ້ປະຊາຊົນຊັ້ນຄົນຕ່າງໆ ໄດ້ມີຄວາມຮັບຮູ້, ເຂົ້າໃຈມູນເຊື້ອປະຕິວັດ, ແນວທາງ-ແຜນນະໂຍບາຍຂອງພັກ, ລະບຽບກົດໝາຍ ແລະ ແຜນພັດທະນາເສດຖະກິດ-ສັງຄົມຂອງລັດ ໃນແຕ່ລະໄລຍະ, ພ້ອມທັງເຜີຍແຜ່ຜົນສໍາເລັດ ຂອງພາລະກິດປົກປັກຮັກສາ ແລະ ພັດທະນາປະເທດຊາດ, ປຸກລະດົມສະຕິຕື່ນຕົວ ແລະ ປະຕິບັດສິດເປັນເຈົ້າປະເທດຊາດ ກໍຄື ສົ່ງເສີມຫົວຄິດປະດິດສ້າງຂອງທົ່ວສັງຄົມ ເພື່ອປະກອບສ່ວນອັນສໍາຄັນເຂົ້າໃນການຈັດຕັ້ງປະຕິບັດແນວທາງ-ແຜນນະໂຍບາຍຂອງພັກຢ່າງມີຜົນສໍາເລັດ. ພ້ອມນັ້ນ, ໄດ້ເອົາໃຈໃສ່ຄົ້ນຄວ້າ ແລະ ເຜີຍແຜ່ສະພາບການທີ່ພົ້ນເດັ່ນພາຍໃນ ແລະ ສາກົນ ເຮັດໃຫ້ພະນັກງານ-ສະມາຊິກພັກສ່ວນຫຼາຍ ມີຄວາມເຂົ້າໃຈ ແລະ ເປັນເອກະພາບຕໍ່ແນວທາງ, ນະໂຍບາຍຂອງພັກ-ລັດ, ມີສະຕິຕໍ່ກົນອຸບາຍມ້າງເພທໍາລາຍ ຂອງອິດທິກໍາລັງປໍລະປັກ ແລະ ພວກຄົນບໍ່ດີ. ບັນດາເນື້ອໃນ, ຮູບການ ແລະ ວິທີການໂຄສະນາ ສືບຕໍ່ໄດ້ຮັບການປັບປຸງໃຫ້ດີຂຶ້ນ. ໃນນັ້ນ, ວຽກງານໂຄສະນາຜ່ານສື່ຕ່າງໆ ເປັນຕົ້ນແມ່ນຜ່ານໜັງສືພິມ, ວາລະສານ, ວິທະຍຸ, ໂທລະພາບ, ສື່ສັງຄົມອອນລາຍ... ສືບຕໍ່ໄດ້ຮັບການເອົາໃຈໃສ່ກະຈາຍຂ່າວທີ່ຫຼາກຫຼາຍສອດຄ່ອງກັບສະພາບການ ແລະ ທັນເຫດການກວ່າເກົ່າ, ສ້າງເງື່ອນໄຂໃຫ້ເປົ້າໝາຍຕ່າງໆ ສາມາດເຂົ້າເຖິງຂໍ້ມູນຂ່າວສານທາງການນັບມື້ສະດວກ ແລະ ກວ້າງຂວາງ (ເກືອບວ່າທຸກກະຊວງ, ອົງການ ແລະ ທ້ອງຖິ່ນ ໄດ້ມີພາຫະນະສື່ໂຄສະນາຂອງຕົນເອງ). ພ້ອມນັ້ນ, ວຽກງານໂຄສະນາເຄື່ອນທີ່ ສືບຕໍ່ຂະຫຍາຍລົງສູ່ເຂດຈຸດສຸມຊຸມຊົນ, ຮາກຖານຊົນນະບົດ-ເຂດຫ່າງໄກສອກຫຼີກ ດ້ວຍການສາຍຮູບເງົາ ແລະ ສາລະຄະດີ ເພື່ອປຸກລະດົມຊວນເຊື່ອເປົ້າໝາຍຕ່າງໆ ໃຫ້ຕື່ນຕົວເປັນເຈົ້າການພັດທະນາຍົກລະດັບຊີວິດການເປັນຢູ່ຂອງຕົນເອງ, ຕັ້ງໜ້າປະກອບສ່ວນປົກປັກຮັກສາ-ພັດທະນາບ້ານຊ່ອງຂອງຕົນຕາມແນວທາງ-ນະໂຍບາຍຂອງພັກ-ລັດ ແລະ ໄດ້ແຈກຢາຍແຜ່ນສາລະຄະດີໃຫ້ບັນດາກະຊວງ-ອົງການ ແລະ ທ້ອງຖິ່ນຈໍານວນ 95 ແຜ່ນ (93 ເລື່ອງ); ໄດ້ຈັດພິມປຶ້ມສະເຫຼີມສະຫຼອງວັນເກີດປະທານ ຄໍາໄຕ ສີພັນດອນ ຄົບຮອບ 100 ປີ, ປຶ້ມເຜີຍແຜ່ແຜນແມ່ບົດ ວ່າດ້ວຍການສ້າງຄູ່ຮ່ວມຊາຕາກຳ ລາວ-ຈີນ, ເອກະສານດໍາເນີນຊີວິດການເມືອງ ສໍາລັບພະນັກງານ, ສະມາຊິກພັກ ເພື່ອດໍາເນີນຊີວິດການເມືອງໃນທົ່ວພັກ; ສໍາເລັດການສ້າງເອກະສານ 3 ວັນປະຫວັດສາດຄື: ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ, ວັນສະຖາປະນາ ສປປ ລາວ ຄົບຮອບ 50 ປີ ແລະ ວັນເກີດປະທານ ໄກສອນ ພົມວິຫານ ຄົບຮອບ 105 ປີ ພ້ອມທັງອອກຄໍາແນະນໍາ. ໃນນັ້ນ, ເອກະສານອົບຮົມແນວທາງ-ແຜນນະໂຍບາຍຂອງພັກ, ນິຕິກໍາຂອງລັດ ສືບຕໍ່ໄດ້ຮັບການປັບປຸງ ແລະ ສ້າງໃໝ່ ໃຫ້ສອດຄ່ອງກັບສະພາບວຽກງານຕົວຈິງ; ວຽກງານຕິດຕາມ, ເກັບກຳສະພາບແນວຄິດ-ຫາງສຽງສັງຄົມ ໄດ້ມີການປັບປຸງ ແລະ ດໍາເນີນການເຄື່ອນໄຫວເປັນປົກກະຕິ; ວຽກງານຄົ້ນຄວ້າທິດສະດີ ແລະ ສັງລວມພຶດຕິກໍາຂອງພັກ ໄດ້ຮັບການເອົາໃຈໃສ່ປັບປຸງ ແລະ ມີບາດກ້າວພົ້ນເດັ່ນຂຶ້ນ; ສື່ສິ່ງພິມຕ່າງໆ ຂອງພັກ-ລັດ ໂດຍສະເພາະແມ່ນວາລະສານ ແລະ ໜັງສືພິມ ສືບຕໍ່ໄດ້ຮັບການປັບປຸງ ຕິດພັນກັບການຫັນເປັນທັນສະໄໝ; ບຸກຄະລາກອນ ທີ່ເຮັດວຽກງານໂຄສະນາອົບຮົມ ສືບຕໍ່ໄດ້ຮັບການກໍ່ສ້າງ, ຝຶກອົບຮົມ ແລະ ບໍາລຸງຍົກລະດັບ ມີຈໍານວນເພີ່ມຂຶ້ນ; ພື້ນຖານວັດຖຸ-ເຕັກນິກ ແລະ ສິ່ງອໍານວຍຄວາມສະດວກ ໃຫ້ແກ່ການເຄື່ອນໄຫວວຽກງານໂຄສະນາອົບຮົມ ບາງດ້ານໄດ້ຮັບການເອົາໃຈໃສ່ປັບປຸງດີຂຶ້ນ; ການພົວພັນຮ່ວມມືກັບຕ່າງປະເທດ ໂດຍສະເພາະກັບບັນດາປະເທດເພື່ອນມິດຍຸດທະສາດ ສສ ຫວຽດນາມ ແລະ ສປ ຈີນ ສືບຕໍ່ໄດ້ຮັບການເສີມຂະຫຍາຍເຂົ້າສູ່ຕົວຈິງ.

ສັງລວມແລ້ວ, ໃນໄລຍະໜຶ່ງປີຜ່ານມາ ວຽກງານໂຄສະນາອົບຮົມ ຍັງສືບຕໍ່ຮັກສາໄດ້ບົດບາດສໍາຄັນ ແລະ ມີລັກສະນະພົ້ນເດັ່ນ-ເປັນໃຈກາງໃນການເຄື່ອນໄຫວວຽກງານການເມືອງ-ແນວຄິດ ຂອງທົ່ວພັກ, ປະກອບສ່ວນສໍາຄັນໃນການຜັນຂະຫຍາຍແນວທາງແຜນນະໂຍບາຍຂອງພັກ, ນະໂຍບາຍ ແລະ ນິຕິກໍາຂອງລັດ ເຂົ້າສູ່ຊີວິດສັງຄົມຢ່າງກວ້າງຂວາງ, ເຮັດໃຫ້ຖັນແຖວພະນັກງານ-ສະມາຊິກພັກ, ປະຊາຊົນບັນດາເຜົ່າສ່ວນໃຫຍ່ມີຄວາມຮັບຮູ້, ເຂົ້າໃຈແນວທາງຂອງພັກ, ລະບຽບກົດໝາຍຂອງລັດ, ເຄື່ອນໄຫວດໍາລົງຊີວິດ ຕາມລັດຖະທໍາມະນູນ ແລະ ກົດໝາຍ, ເປັນເຈົ້າການປັບປຸງຍົກລະດັບຊີວິດການເປັນຢູ່ຂອງຕົນໃຫ້ດີຂຶ້ນ, ເຂົ້າຮ່ວມປະກອບສ່ວນໃນຂະບວນການປົກປັກຮັກສາ ແລະ ສ້າງສາພັດທະນາປະເທດຊາດຢ່າງຕັ້ງໜ້າ.