ຍົກລະດັບການເປັນຄູ່ຮ່ວມມືເພື່ອຮ່ວມກັນແກ້ໄຂບັນຫາອາຊະຍາກໍາຂ້າມຊາດ

ຈຸດປະສົງກອງປະຊຸມແນໃສ່ການແລກປ່ຽນຄໍາຄິດຄໍາເຫັນ ແລະ ປຶກສາຫາລືກັນກ່ຽວກັບສະພາບບັນຫາອາຊະຍາກໍາຂ້າມຊາດໂດຍລົງເລິກບັນຫາການຕົວະຕົ້ມ ແລະ ຫຼອກລວງຜ່ານທາງອອນລາຍ ຊຶ່ງເປັນບັນຫາທີ່ພາກພື້ນແມ່ນໍ້າຂອງກໍາລັງປະເຊີນໜ້າ ແລະ ເປັນສິ່ງທ້າທາຍໃນການແກ້ໄຂບັນຫາ, ສ້າງຄວາມເສຍຫາຍຢ່າງໃຫຍ່ຫຼວງໃຫ້ແກ່ຄວາມປອດໄພ, ຄວາມໝັ້ນຄົງ ແລະ ເສດຖະກິດຂອງບັນດາປະ ເທດແມ່ນໍ້າຂອງ ແລະ ຍັງຖືເປັນໄພຂົ່ມຂູ່ໃຫ້ແກ່ການດໍາລົງຊີວິດຂອງປະຊາຊົນ. ທ່ານປະທານກອງປະຊຸມໄດ້ຊີ້ໃຫ້ເຫັນເຖິງຜົນກະທົບຈາກບັນຫາອາຊະຍາກໍາຂ້າມຊາດທີນັບມື້ເພີ່ມທະວີຄວາມຮູນແຮງຂຶ້ນ ແລະ ປະກົດຕົວໃນຫຼາຍຮູບແບບວິທີການ, ຊຶ່ງມັນໄດ້ຮຽກຮ້ອງໃຫ້ບັນດາປະເທດຮ່ວມມືກັນໂດຍສະເພາະພາຍໃຕ້ 4 ຂົງເຂດສໍາຄັນຄື: 1)ການສ້າງລະບຽບກົດໝາຍ ແລະ ການແລກປ່ຽນຂໍ້ມູນຂ່າວສານລະຫວ່າງປະເທດ; 2)ການພັດທະນາຂີດຄວາມສາມາດດ້ານວິຊາການ ແລະ ຊັບພະຍາກອນມະນຸດ; 3)ການຍົກສູງຄວາມຮັບຮູ້ຂອງປະຊາຊົນ ແລະ ທັກສະດ້ານດິຈິຕອນ; ແລະ 4)ການເພີ່ມທະວີການຮ່ວມມືລະຫວ່າງພາກສ່ວນຕ່າງໆຢ່າງຮອບດ້ານ. ທ່ານໄດ້ເນັ້ນໜັກຕື່ມວ່າການຕ້ານອາຊະຍາກໍາຂ້າມຊາດແມ່ນໜ້າທີ່ຮ່ວມກັນທີ່ຈໍາເປັນ ເພື່ອຮັກສາຄວາມໝັ້ນຄົງ, ສະຖຽນລະພາບ ແລະ ຄວາມຈະເລີນຮຸ່ງເຮືອງຂອງພາກພື້ນ.

ຜູ້ເຂົ້າຮ່ວມກອງປະຊຸມໄດ້ແລກປ່ຽນຄໍາຄິດຄໍາເຫັນກັນໃນດ້ານວິຊາການ ແລະ ເຫັນດີເປັນເອກະພາບກັນວ່າການຕົວະຕົ້ມ ແລະ ການຫຼອກຫຼວງຜ່ານທາງອອນລາຍນັ້ນນັບມື້ນັບມີຄວາມຮຸນແຮງ, ແຜ່ລາມອອກສູ່ວົງກວ້າງ ແລະ ມີການຜັນແປໄປຕາມການພັດທະນາຂອງຍຸກສະໄໝກໍຄືການພັດທະນາຢ່າງກ້າວກະໂດດຂອງເຕັກໂນໂລຊີໂດຍສະເພາະການນໍາໃຊ້ປັນຍາປະດິດ (AI) ເຮັດໃຫ້ການຕິດຕາມແກ້ໄຂບັນຫາມີຄວາມຫຍຸ້ງຍາກ ແລະ ສັບສົນຂຶ້ນ. ການແກ້ໄຂບັນຫາດັ່ງກ່າວຕ້ອງອາໄສການຮ່ວມມື ແລະ ເປັນເອກະພາບກັນຂອງທຸກພາກສ່ວນບໍ່ວ່າຈະເປັນພາກລັດຖະບານ, ພາກທຸລະກິດ ແລະ ພາກປະຊາຊົນຂອງທຸກປະເທດເພື່ອຮ່ວມກັນສະກັດກັ້ນ, ຮັບມື, ແກ້ໄຂ ແລະ ປ້ອງກັນເພື່ອຫຼຸດຜ່ອນຜົນກະທົບຕໍ່ຄວາມໝັ້ນຄົງ, ລະບົບເສດຖະກິດ ແລະ ຊີວິດການເປັນຢູ່ຂອງປະຊາຊົນ.

ກອງປະຊຸມໄດ້ດໍາເນີນໄປເປັນເວລາ 2 ວັນ ແລະ ໄດ້ສໍາເລັດຜົນອັນຈົບງາມ. ພາຍຫຼັງກອງປະຊຸມ ໄດ້ມີການສັງລວມເອົາຄວາມຄິດຄໍາເຫັນ ແລະ ບັນດາຂໍ້ສະເໜີແນະເພື່ອຈັດພິມເປັນຂໍ້ມູນ, ບ່ອນອີງ ແລະ ເຜີຍແຜ່ໃຫ້ແກ່ພາກສ່ວນທີ່ກ່ຽວຂ້ອງຕໍ່ໄປ.

(ຂ່າວ: ກຕທ)