ຍົກສູງການພົວພັນຮ່ວມມືວຽກງານ ສນຊ ແລະ ສະຫະພັນກໍາມະບານລາວ

ສະຫາຍ ນາງ ສີພະຈັນ ນັນທະວົງສາ ກໍາມະການຄະນະປະຈໍາພັກ ຮອງປະທານ ສນຊ ໄດ້ປະ ກອບຄໍາເຫັນຕໍ່ກອງປະຊຸມໃຫຍ່ຜູ້ແທນກໍາມະບານລາວທົ່ວປະເທດ ຄັ້ງທີ IX ຈັດຂຶ້ນເມື່ອບໍ່ດົນມານີ້ ໃນຫົວຂໍ້: ການພົວພັນຮ່ວມມືລະຫວ່າງ ສນຊ ແລະ ສະຫະພັນກໍາມະບານລາວ ເພື່ອເສີມຂະຫຍາຍມູນເຊື້ອ ແລະ ເຕົ້າໂຮມຄວາມສາມັກຄີໃນຖັນແຖວສະມາຊິກກໍາມະບານ, ກໍາມະກອນ ແລະ ຊາວຜູ້ອອກແຮງງານລາວບັນດາເຜົ່າໃຫ້ເປັນຈິດໜຶ່ງໃຈດຽວກັນ. ແນວລາວສ້າງຊາດແມ່ນອົງການສໍາພັນທາງການເມືອງຂອງທົ່ວສັງຄົມເປັນສະຫະພັນຂອງອົງການຈັດຕັ້ງການເມືອງ, ອົງການຈັດຕັ້ງການເມືອງ-ສັງຄົມ, ອົງການຈັດຕັ້ງສັງຄົມ ແລະ ບຸກຄົນທີ່ເປັນຕົວແທນໃຫ້ແກ່ຊັ້ນຄົນ, ຊົນເຜົ່າ, ສາສະໜາ, ເພດ, ໄວ ລວມທັງຕົວແທນຄົນລາວທີ່ ດໍາລົງຊີວິດຢູ່ຕ່າງປະເທດ ບົນພື້ນຖານຄວາມຕື່ນຕົວ ແລະ ສະໝັກໃຈ. ໄດ້ສືບທອດ ແລະ ເສີມຂະຫຍາຍມູນເຊື້ອອັນສະຫງ່າລາສີຂອງແນວລາວອິດສະຫຼະ ແລະ ແນວລາວຮັກຊາດໃນການຕໍ່ສູ້ກູ້ຊາດໃນເມື່ອກ່ອນ ແລະ ປົກປັກຮັກສາພັດທະນາປະເທດຊາດໃນປັດຈຸບັນ. ໂດຍໄດ້ເສີມຂະຫຍາຍນໍ້າໃຈຮັກຊາດ, ມູນເຊື້ອສາມັກຄີທົ່ວປວງຊົນລາວບັນດາເຜົ່າ ເປັນປັດໄຈໜຶ່ງທີ່ຕັດສິນທຸກໄຊຊະນະຂອງການປະຕິວັດລາວ, ສນຊ ໄດ້ຜັນຂະຫຍາຍວຽກງານແນວໂຮມໃນ 6 ວຽກງານຈຸດສຸມ ມາເປັນ 5 ແຜນງານ, 41 ໂຄງການ; ເປັນຕົ້ນແມ່ນໂຄງການສ້າງຄອບຄົວ ແລະ ບ້ານສາມັກຄີປອງດອງ ຕິດພັນກັບການແກ້ໄຂຄວາມທຸກຍາກຂອງປະ ຊາຊົນບັນດາເຜົ່າ ເປັນຕົວຊີ້ວັດໜຶ່ງໃນມາດຖານຄອບຄົວພັດທະນາ. ນັບແຕ່ໃດໆມາ ສອງອົງການແມ່ນໄດ້ຮ່ວມມືກັນເສີມຂະຫຍາຍມູນເຊື້ອຮ່ວມສໍາພັນ ແລະ ໄດ້ຕັ້ງໜ້າເຄື່ອນໄຫວວຽກງານແນວໂຮມ, ວຽກງານມະ ຫາຊົນດ້ວຍຄວາມຮັບຜິດຊອບສູງ, ປຸກລະດົມກໍາລັງແຮງສັງລວມເຂົ້າໃນພາລະກິດຂອງພັກ, ຂອງຊາດ; ຍູ້ແຮງຂະບວນການແຂ່ງຂັນຮັກຊາດ ແລະ ພັດທະນາ, ປະຕິບັດເນື້ອໃນຄໍາຂວັນ, ຂໍ້ແຂ່ງຂັນຂອງແຕ່ລະອົງ ການຢ່າງເປັນຂະບວນຟົດຟື້ນ ແລະ ຕໍ່ເນື່ອງ ໂດຍສະເພາະຄໍາຂວັນ 4 ເສີມສ້າງຂອງແນວລາວສ້າງຊາດ (ເສີມສ້າງຄວາມສາມັກຄີ; ຄຸນງາມຄວາມດີ; ຄຸນວຸດທິ ແລະ ຄຸນນະທໍາ), 3 ດີຂອງສະຫະພັນແມ່ຍິງລາວ, 4 ບຸກຂອງຊາວໜຸ່ມປະຊາຊົນປະຕິວັດລາວ, 5 ເປັນເຈົ້າຂອງກໍາມະບານແມ່ນໄດ້ຮັບການຍູ້ແຮງເຂົ້າສູ່ພາກປະຕິບັດຢ່າງເປັນຮູບປະທໍາ ແລະ ກວ້າງຂວາງ. ແນວລາວສ້າງຊາດ ແລະ ສະຫະພັນກໍາມະບານໄດ້ພ້ອມກັນອອກແຮງຈັດຕັ້ງຜັນຂະຫຍາຍເນື້ອໃນ 4 ຮ່ວມ ເພື່ອເສີມຂະຫຍາຍມູນເຊື້ອຄວາມສາມັກຄີຢ່າງກົມກຽວ ແລະ ແຂງແຮງຄື: ໜຶ່ງ. ໄດ້ຮ່ວມກັນສຶກສາອົບຮົມຂົນຂວາຍມະຫາຊົນ, ປະຊາຊົນໃຫ້ໄປຕາມທິດດຽວກັນ ເພື່ອເຂົ້າຮ່ວມຈັດຕັ້ງປະຕິບັດແນວທາງນະໂຍບາຍຂອງພັກ, ກົດໝາຍ ແລະ ລະບຽບການຂອງລັດ, ສ້າງຂະບວນການມະຫາຊົນດ້ວຍຫຼາຍຮູບຫຼາຍສີ, ຫຼາຍລະດັບ, ຫຼາຍຂະໜາດແຕກຕ່າງກັນ ເພື່ອປະກອບສ່ວນເຂົ້າໃນການແກ້ໄຂບັນຫາປະກົດການຫຍໍ້ທໍ້ໃນສັງຄົມ; ສອງ. ຮ່ວມກັນເຄື່ອນໄຫວວຽກງານຢູ່ທ້ອງຖິ່ນຮາກຖານ ໂດຍລົງພົບປະໂອ້ລົມ, ເກັບກໍາສຽງສັງຄົມ, ຄວາມມຸ່ງມາດປາຖະໜາຂອງປະຊາຊົນລາວບັນດາເຜົ່າ ກໍຄືມະຫາຊົນຕໍ່ການເຄື່ອນໄຫວທີ່ຕັ້ງໜ້າ ແລະ ບໍ່ຕັ້ງໜ້າຂອງອົງການອໍານາດລັດຕາມຂໍ້ກໍານົດ 01/ຄລສພ; ສາມ. ໄດ້ຮ່າງມະຕິຮ່ວມກັນ ແລະ ຄົ້ນຄວ້າຫົວຂໍ້ ການສ້າງຂະບວນການແຂ່ງຂັນຮັກຊາດ ແລະ ພັດທະນາ ໂດຍກໍານົດຈຸດສຸມຕາມສະພາບຈຸດພິເສດຂອງແຕ່ລະອົງການ, ຂອງແຕ່ລະທ້ອງຖິ່ນເພື່ອສ້າງຂະບວນການລວມຕາມກຳລັງແຮງຂອງແຕ່ລະອົງການ; ສີ່. ສ້າງການຫັນປ່ຽນແກ້ໄຂຄວາມຫຍຸ້ງຍາກ ແລະ ສ້າງລາຍຮັບເພີ່ມທີ່ຖືກກົດໝາຍ ໂດຍການຜັນຂະຫຍາຍມະຕິ 108/ກມສພ ວ່າດ້ວຍວຽກງານແນວໂຮມ ແລະ ວຽກງານມະຫາຊົນຂອງພັກ ໃນໄລຍະໃໝ່. ນອກນັ້ນ, ໄດ້ຮ່ວມກັນຈັດກິດຈະກໍາໄປຢ້ຽມຢາມຖານທີ່ໝັ້ນຢູ່ແຂວງຫົວພັນ, ກິດຈະກໍາຊ່ວຍເຫຼືອມະນຸດສະທໍາ, ກິດຈະກໍາບໍລິຈາກເລືອດຊ່ວຍຊີວິດສັງຄົມ ແລະ ອີກຫຼາຍກິດຈະກໍາເພື່ອສ້າງຂະບວນການຂໍ່ານັບຮັບຕ້ອນສະເຫຼີມສະຫຼອງ 3 ວັນປະຫວັດສາດ ແລະ ວັນສ້າງຕັ້ງຂອງອົງການຕົນຢ່າງກວ້າງຂວາງ ແລະ ຟົດຟື້ນ. ໃນໄລຍະຜ່ານມາ, ສນຊ ແລະ ສະຫະພັນກໍາມະບານລາວໄດ້ມີການພົວພັນຮ່ວມມືກັນຢ່າງໃກ້ຊິດໃນການສຶກສາອົບຮົມ, ເຕົ້າໂຮມຄວາມສາມັກຄີປອງດອງໃນຖັນແຖວສະມາຊິກພັກ, ພະນັກງານ ກໍຄືສະມາຊິກກໍາມະບານ, ກໍາມະກອນ ແລະ ຊາວຜູ້ອອກແຮງງານລາວບັນດາເຜົ່າ, ແຕ່ກໍຍັງເຮັດໄດ້ໜ້ອຍບໍ່ທັນເຂົ້າເຖິງທຸກກຸ່ມເປົ້າໝາຍ ເມື່ອທຽບໃສ່ກັບຄວາມຮຽກຮ້ອງຕ້ອງການຂອງໜ້າທີ່ການເມືອງ. ການປະຕິບັດ 4 ຮ່ວມ, ການລົງເຄື່ອນໄຫວທ້ອງຖິ່ນເພື່ອຊຸກຍູ້, ຕິດຕາມກວດກາ ແລະ ເກັບກໍາສະພາບ ຫາງສຽງສັງຄົມ, ຄວາມມຸ່ງມາດປາຖະໜາຂອງສະມາຊິກກໍາມະບານ ກໍຄືຜູ້ອອກແຮງງານລາວບັນດາເຜົ່າ ແມ່ນຍັງເຮັດໄດ້ຈໍາກັດ.

ໃນຕໍ່ໜ້ານີ້, ເພື່ອເຮັດໃຫ້ການພົວພັນຮ່ວມມືກັນລະຫວ່າງ ສນຊ ແລະ ສະຫະພັນກໍາມະບານລາວ ໄດ້ຮັບການຈັດຕັ້ງຜັນຂະຫຍາຍໄດ້ຫຼາຍ ແລະ ເຂົ້າສູ່ລວງເລິກນັ້ນ; ຂ້າພະເຈົ້າຂໍສະເໜີວ່າ ທັງສອງພາກ ສ່ວນຕ້ອງໄດ້ເອົາໃຈໃສ່ບາງຈຸດຕົ້ນຕໍດັ່ງນີ້:1. ສ້າງແຜນການເຄື່ອນໄຫວຮ່ວມກັນ, ກໍານົດເປົ້າໝາຍຮ່ວມກັນ ເພື່ອສືບຕໍ່ເຮັດວຽກງານສຶກສາອົບຮົມ, ເຕົ້າໂຮມຄວາມສາມັກຄີ ແລະ ເສີມຂະຫຍາຍກຳລັງແຮງຂອງທົ່ວປວງຊົນລາວບັນດາເຜົ່າ ພ້ອມທັງເຮັດໜ້າທີ່ຕິດຕາມກວດກາ ການຈັດຕັ້ງປະຕິບັດແນວທາງ, ນະໂຍບາຍ, ການປັບປຸງກົງຈັກ-ບຸກຄະລາກອນຂອງອົງການລັດ ແລະ ປົກປ້ອງສິດຜົນປະໂຫຍດຂອງສະມາຊິກຂອງອົງການຕົນຢ່າງແຂງແຮງ; 2. ສືບຕໍ່ກໍານົດແຜນງານ, ສ້າງຂະບວນການແຂ່ງຂັນຮັກຊາດ ແລະ ພັດທະນາໃຫ້ມີຫຼາຍລະດັບ, ຫຼາຍຮູບແບບຕິດພັນກັບຂໍ້ແຂ່ງຂັນຂອງອົງການຕົນ; ຜັດປ່ຽນກັນເປັນເຈົ້າພາບຈັດກິດຈະກໍາເພື່ອປະກອບສ່ວນແກ້ໄຂປະກົດການຫຍໍ້ທໍ້ຕ່າງໆໃນສັງຄົມຕາມພາລະບົດບາດຂອງຕົນ; ສືບຕໍ່ປຸກລະດົມບັນດາອົງການຈັດຕັ້ງສັງຄົມ, ບຸກຄົນ, ນິຕິບຸກຄົນປະກອບພັນທະຕໍ່ລັດ ແລະ ຮ່ວມມືກັບກະຊວງ-ອົງການ, ອົງການຈັດຕັ້ງສາກົນ ແລະ ອົງການຈັດຕັ້ງສັງຄົມອື່ນໆ ເພື່ອລະດົມການຊ່ວຍເຫຼືອປະຊາຊົນຜູ້ດ້ອຍໂອກາດ ແລະ ຜູ້ຖືກຜົນກະທົບຈາກໄພພິບັດທາງທໍາມະຊາດ; 3. ແນວລາວສ້າງຊາດ ແລະ ສະຫະພັນກໍາມະບານຂັ້ນແຂວງ, ເມືອງຕ້ອງ ເອົາໃຈໃສ່ປະສານສົມທົບ, ພົວພັນກັນຢ່າງໃກ້ຊິດ; ຈັດຕັ້ງຜັນຂະຫຍາຍເນື້ອໃນ 4 ຮ່ວມໃຫ້ເຂົ້າສູ່ລວງເລິກ. ພ້ອມນີ້, ກໍເອົາໃຈໃສ່ ຮ່ວມກັນເກັບກໍາຫາງສຽງສັງຄົມ, ຄວາມມຸ່ງມາດປາຖະໜາຂອງສະມາຊິກກໍາມະບານ, ກໍາມະກອນ ແລະ ຂອງປະຊາຊົນຜູ້ອອກແຮງງານເພື່ອສະເໜີຕໍ່ຂັ້ນເທິງຂອງຕົນໃຫ້ວ່ອງໄວ ແລະ ທັນເຫດ ການ; 4. ສືບຕໍ່ຍົກສູງຍູ້ແຮງໃຫ້ຄະນະພັກ ແລະ ອົງການປົກຄອງຂັ້ນຕົນສ້າງເງື່ອນໄຂ ແລະ ອໍານວຍຄວາມສະດວກເພື່ອຜັນຂະຫຍາຍມະຕິ 04/ກມສພ ແລະ ມະຕິ 05/ລບ ກ່ຽວກັບການສ້າງເສດຖະກິດເອກະ ລາດເປັນເຈົ້າຕົນເອງ. ຈັດຕັ້ງຜັນຂະຫຍາຍມະຕິ 108/ກມສພ ວ່າດ້ວຍວຽກງານງານແນວໂຮມ ແລະ ວຽກງານມະຫາຊົນຂອງພັກໃນໄລຍະໃໝ່ໃຫ້ກວ້າງຂວາງ ໂດຍສະເພາະຮ່ວມກັນສ້າງການຫັນປ່ຽນແກ້ໄຂຄວາມຫຍຸ້ງຍາກ ແລະ ສ້າງລາຍຮັບເພີ່ມຮ່ວມກັນຕາມທ່າແຮງຂອງແຕ່ລະອົງການໃນແຕ່ລະທ້ອງຖິ່ນໃຫ້ປະກົດຜົນເປັນຈິງ.