ທ່ານນາງ ສົມຫວັງ ໄຊຍະຕິ ຫົວໜ້າອົງການໄອຍະການປະຊາຊົນແຂວງອຸດົມໄຊໄດ້ໃຫ້ສຳພາດຕໍ່ສື່ມວນຊົນເມື່ອບໍ່ດົນຜ່ານມາ ທີ່ຫໍປະຊຸມແຫ່ງຊາດວ່າ: ໃນການຈັດຕັ້ງປະຕິບັດນິຕິກໍາອົງການໄອຍະການປະຊາຊົນເປັນອົງການທີ່ມີພາລະບົດບາດ, ສິດ ແລະ ໜ້າທີ່ໃນການຕິດຕາມກວດກາການຈັດຕັ້ງປະຕິບັດກົດໝາຍ ແລະ ສັ່ງຟ້ອງຜູ້ກະທໍາຜິດຂຶ້ນສານ. ນອກຈາກລະບຽບກົດໝາຍແລ້ວທາງຄະນະພັກ, ຄະນະນໍາຂອງອົງການໄອຍະການປະຊາຊົນສູງສຸດຍັງຖືສໍາຄັນຕໍ່ການອອກນິຕິກໍາລຸ່ມກົດໝາຍເພື່ອເຮັດໃຫ້ການຈັດຕັ້ງປະຕິບັດກົດໝາຍມີຄວາມເຂັ້ມງວດ.
ທ່ານນາງ ສົມຫວັງ ໄຊຍະຕິ ກ່າວໃຫ້ຮູ້ອີກວ່າ: ອົງການໄອຍະການປະຊາຊົນແຂວງອຸດົມໄຊໄດ້ຖືສໍາຄັນ, ເຂັ້ມງວດຕໍ່ກັບການຈັດຕັ້ງປະຕິບັດບັນດານິຕິກໍາທີ່ຂັ້ນເທິງສົ່ງໃຫ້ເປັນຕົ້ນພາຍຫຼັງທີ່ໄດ້ຮັບແຈ້ງການ ຫຼື ຄໍາສັ່ງຈາກອົງການໄອຍະການປະຊາຊົນສູງສຸດສົ່ງໃຫ້ກໍໄດ້ຈັດຕັ້ງເຜີຍແຜ່ເຊື່ອມຊຶມ ແລະ ນໍາໄປລາຍງານໃຫ້ອົງການປົກຄອງຮັບຊາບ. ນອກຈາກນັ້ນ, ຖ້າວ່ານິຕິກໍາທີ່ຕິດພັນກັບເຈົ້າໜ້າທີ່ ຫຼືພາກສ່ວນທີ່ກ່ຽວຂ້ອງກໍໄດ້ມີການປະສານສົມທົບ, ມີການປະຊຸມ. ຫຼັງຈາກນັ້ນ, ກໍໄດ້ຂຶ້ນແຜນ ແລະ ລົງເຜີຍແຜ່ຢູ່ໃນຂັ້ນເມືອງຈົນຮອດຂັ້ນແຂວງໃຫ້ມີຄວາມເປັນເອກະພາບໃນການຈັດຕັ້ງປະຕິບັດ. ສະນັ້ນ, ການຈັດຕັ້ງປະຕິບັດນິຕິກໍາຢູ່ແຂວງອຸດົມໄຊກໍຍັງມີຂໍ້ສະດວກ ແລະ ຂໍ້ຫຍຸງຍາກ. ສໍາລັບຂໍ້ສະດວກພວກເຮົາມີນິຕິກໍາຂອງຂັ້ນເທິງທີ່ສົ່ງມາໃຫ້; ໄດ້ຮັບການໃກ້ຊິດຕິດແທດ, ມີການຊີ້ນໍາ-ນໍາພາຈາກອົງການປົກຄອງແຂວງ, ຈາກອົງການໄອຍະການປະຊາຊົນສູງສຸດ, ສະພາປະຊາຊົນແຂວງ. ສະນັ້ນ, ຈຶ່ງເຮັດໃຫ້ການຈັດຕັ້ງປະຕິບັດເຜີຍແຜ່ນິຕິກໍາໄດ້ຮັບໝາກຜົນພໍສົມຄວນ. ຜ່ານການຈັດຕັ້ງປະຕິບັດແລ້ວກໍປາສະຈາກບໍ່ໄດ້ຂໍ້ຫຍຸ້ງຍາກຈໍານວນໜຶ່ງ ເປັນຕົ້ນນິຕິກໍາທີ່ຂັ້ນເທິງໄດ້ອອກມີຈໍານວນຫຼາຍແຕ່ວ່າຢູ່ໃນການຈັດຕັ້ງປະຕິບັດກໍຍັງມີນິຕິກໍາຈໍານວນໜຶ່ງທີ່ຍັງບໍ່ທັນໄດ້ຮັບການຈັດຕັ້ງປະຕິບັດ. ໃນນັ້ນ, ຍັງມີເຫດຜົນໃນຕົວ ແລະ ນອກຕົວ ໂດຍສະເພາະເຫດຜົນໃນຕົວບາງຄັ້ງສົ່ງໃຫ້ຂັ້ນເມືອງຜັນຂະຫຍາຍຕໍ່, ການຜັນຂະຫຍາຍນັ້ນບາງຄັ້ງຍັງບໍ່ທັນທົ່ວເຖິງ, ບໍ່ທັນຮອດປະຊາຊົນ ຫຼືພາກສ່ວນທີ່ກ່ຽວຂ້ອງເທົ່າທີ່ຄວນ; ພະນັກງານທີ່ລົງໂຄສະນາເຜີຍແຜ່ຍັງກໍາເນື້ອໃນບໍ່ທັນແໜ້ນເຮັດໃຫ້ການເຜີຍແຜ່ຍັງບໍ່ທັນໄດ້ດີ. ແນ່ນອນການຈັດຕັ້ງປະຕິບັດຖ້າເຮົາເຜີຍແຜ່ເຊື່ອມຊຶມຄວາມຮັບຮູ້-ເຂົ້າໃຈບໍ່ເລິກເຊິ່ງແນ່ນອນການຈັດຕັ້ງປະຕິບັດຈະບໍ່ໄດ້ຮັບໝາກຜົນເຕັມທີ່.
ທ່ານນາງ ສົມຫວັງ ໄຊຍະຕິ ກ່າວເນັ້ນຕື່ມວ່າ: ສໍາລັບການຈັດຕັ້ງປະຕິບັດທີ່ພົ້ນເດັ່ນແຂວງອຸດົມໄຊ ແມ່ນໄດ້ຈັດຕັ້ງການເຜີຍແຜ່, ຈັດຕັ້ງປະຕິບັດເປັນຕົ້ນມະຕິ 112ຂອງກົມການເມືອງສູນກາງພັກວ່າດ້ວຍການຍົກສູງຄຸນນະພາບໃນການດໍາເນີນຄະດີຕາມຂະບວນຍຸຕິທໍາຕໍ່ກັບນິຕິກໍາ, ມະຕິດັ່ງກ່າວອົງການໄອຍະການປະຊາຊົນໄດ້ເປັນເຈົ້າການໃນການປະສານສົມທົບກັບອົງການປົກຄອງແຂວງ, ປ້ອງກັນຄວາມສະຫງົບ (ປກສ) ແຂວງ ແລະ ໄດ້ສ້າງແຜນຮ່ວມກັນຕິດພັນກັບນິຕິກໍາຂອງປ້ອງກັນຊາດ (ປກຊ)-ປ້ອງກັນຄວາມສະຫງົບ(ປກສ), ໄດ້ລົງຈັດຕັ້ງການເຜີຍແຜ່ຢູ່ໃນ 7 ເມືອງຂອງແຂວງ ຖືວ່າສໍາເລັດ ເພື່ອຮັບປະກັນເນັ້ນບາງຂໍ້ກ່າວຫາພວກເຮົາຍັງບໍ່ທັນເຂັ້ມງວດໃນການດໍາເນີນ ຊຶ່ງຈະເນັ້ນເລື່ອງການບໍລິຫານພາຍຫຼັງທີ່ມີການລົງໄປເຜີຍແຜ່ນິຕິກໍາດັ່ງກ່າວ ຖືໄດ້ວ່າມີຫຼາຍຂໍ້ກ່າວຫາທີ່ໄດ້ຮັບການສັ່ງຟ້ອງໃຫ້ສານຕັດສິນ; ກ່ຽວກັບການຜັນຂະຫຍາຍ ຫຼືຈັດຕັ້ງປະຕິບັດຕາມແຈ້ງການເລກທີ 013 ຂອງປກສ ແລະ ຄໍາສັ່ງເລກທີ 006ຂອງຫົວໜ້າອົງການໄອຍະການປະຊາຊົນສູງສຸດ ວ່າດ້ວຍການຕິດຕາມກວດກາເຂັ້ມງວດໃນການດໍາເນີນຄະດີຕໍ່ຜູ້ທີ່ປູກ, ນໍາໃຊ້, ຄ້າຂາຍນໍ້າກະທ້ອມ, ຢາສູບໄຟຟ້າ ແລະ ອື່ນໆຊຶ່ງໄດ້ລາຍງານໃຫ້ອົງການປົກຄອງຮັບຊາບ ແລະ ສົມທົບກັບພະແນກສາທາລະນະສຸກ,ກອງບັນຊາການ ປກສ ແຂວງ ໄດ້ແຕ່ງຕັ້ງກັນລົງໂຄສະນາເຜີຍແຜ່ຢູ່ໃນ 7 ເມືອງ ແລະ 4 ຈຸດຂອງເທດສະບານເມືອງໄຊ ແຂວງອຸດົມໄຊ. ນອກນັ້ນ,ຍັງມີໂປສເຕີໃນການໂຄສະນາເດັດຂາດໃນການດໍາເນີນຄະດີຕໍ່ຜູ້ລະເມີດຖືວ່າສໍາເລັດຢູ່ໃນ 28 ປ້າຍ ຢູ່ໃນຈຸດສໍາຄັນຕ່າງໆຊຶ່ງອົງການໄອຍະການປະຊາຊົນ ແຂວງອຸດົມໄຊ ແມ່ນໄດ້ເຂັ້ມງວດເປັນຢ່າງດີຕໍ່ວຽກງານດັ່ງກ່າວ.
ຄໍາເຫັນ