ອົງການກາແດງແຫ່ງຊາດລາວ ໄດ້ຕ້ອນຮັບຄະນະສະພາກາແດງ ສ ເກົາຫຼີ

ອົງການກາແດງແຫ່ງຊາດລາວ ໄດ້ຕ້ອນຮັບ ຄະນະສະພາກາແດງ ແລະ ຜູ້ໃຫ້ທຶນ ຈາກ ສ ເກົາຫຼີ ຢ້ຽມຢາມ ແລະ ມອບອຸປະກອນການຮຽນໃຫ້ແກ່ໂຮງຮຽນປະຖົມດວງບຸດດີ ເມືອງໄຊທານີ ແລະ ໂຮງຮຽນປະຖົມແສນດິນ ເມືອງນາຊາຍທອງ ນະຄອນຫຼວງວຽງຈັນ, ພາຍໃຕ້ໂຄງການ: “ຫຼຸດຜ່ອນຄວາມສ່ຽງໄພພິບັດໃນໂຮງຮຽນ”, ໃນວັນທີ 14 ທັນວານີ້.
    ເປັນກຽດໃນພິທີ ໂດຍ ທ່ານ ພູທອນ ເມືອງປາກ ປະທານອົງການກາແດງແຫ່ງຊາດລາວ ພ້ອມດ້ວຍຄະນະ, ທ່ານ ຊຸງ ຮາ ເຈັງ ຫົວໜ້າທິມບໍລິຫານກາແດງ ແຂວງ ຈີ ອອງ ນາມ ສ ເກົາຫຼີ ພ້ອມດ້ວຍຄະນະ.  ຈຸດປະສົງ ເພື່ອເປັນການສະຫຼຸບສັງລວມຜົນໄດ້ຮັບ ຂອງການຈັດຕັ້ງປະຕິບັດໃນການຊ່ວຍເຫຼືອໂຮງຮຽນ (ໂຮງຮຽນປະຖົມ ດວງບຸດດີ ເມືອງໄຊທານີ ແລະ ໂຮງຮຽນປະຖົມ ບ້ານແສນດິນ ເມືອງນາຊາຍທອງ) ໃຫ້ຄະນະສະພາກາແດງ ສ ເກົາຫຼີ ແລະ ອາສາສະໝັກ ທີ່ມາຢ້ຽມຢາມ ໄດ້ຮັບຮູ້ ແລະ ເພື່ອເປັນການນໍາສະເໜີ 3 ໂຮງຮຽນ ໃນເມືອງ ໄຊທານີ  (ໂຮງຮຽນ ອະນຸບານ ບ້ານນາພອກ, ໂຮງຮຽນປະຖົມ ສົມບູນອຸດົມຜົນ ແລະ ໂຮງຮຽນປະຖົມສົມບູນ ບ້ານວຽງແກ້ວ) ນະຄອນຫຼວງວຽງຈັນ ຕື່ມອີກ.
    ໃນພິທີ, ທ່ານ ສີວິໄລ ໄຊຍະລາດ ຄະນະຫ້ອງການຂົນຂວາຍແຫຼ່ງທຶນ ແລະ ບັນເທົາທຸກ ອົງການກາແດງແຫ່ງຊາດລາວ ໄດ້ລາຍງານ ປະຫວັດຄວາມເປັນມາໂດຍຫຍໍ້ ໂຄງການຮ່ວມມື ອົງການກາແດງລາວ-ກາແດງ ສ ເກົາຫຼີ ຊຶ່ງເລີ່ມມາແຕ່ປີ 2010 – 2016 ໄດ້ມີການແລກປ່ຽນກິດຈະກໍາຊາວໜຸ່ມ, ປີ 2017 ວຽກງານຊ່ວຍເຫຼືອບັນເທົາທຸກ ໄດ້ຮັບການສະໜັບສະໜູນ ໂຄງການຫຼຸດຜ່ອນໄພພິບັດ 2 ໂຮງຮຽນ ທີ່ນະຄອນຫຼວງວຽງຈັນ, 2018 ໄດ້ຮັບເຄື່ອງຊ່ວຍເຫຼືອສຸຂະນາໄມ  ແຂວງອັດຕະປື, 2021ໄດ້ຮັບເຄື່ອງຊ່ວຍເຫຼືອຈາກ ກາແດງ ສ ເກົາຫຼີ, 2022 ໂຄງການຫຼຸດຜ່ອນຄວາມສ່ຽງໄພພິບັດຊຸມຊົນ 5 ຂອງເມືອງພູວົງ ແຂວງອັດຕະປື ແລະ ວຽກງານອື່ນໆ. 
    

ຂ່າວ: ເປ4ພະແນກຕ່າງປະເທດ ສີວັນ 17.12.2023
ຄະນະກວດກາສູນກາງ ປາຖະກະຖາເອກະສານສໍາຄັນຂອງພັກ-ຂອງຊາດ
    ຄະນະພັກ ຄະນະກວດກາສູນກາງພັກ ແລະ ອົງການກວດກາແຫ່ງລັດ ໄດ້ຈັດພິທີ ເຜີຍແຜ່ເອກະສານສໍາຄັນຂອງພັກ-ຂອງຊາດຄື: ວັນເກີດປະທານ ໄກສອນ ພົມວິຫານ ຄົບຮອບ 103 ປີ, ວັນປະກາດເອກະລາດ ຄົບຮອບ 78 ປີ, ວັນຊາດທີ 2 ທັນວາ ຄົບຮອບ 48 ປີ, ວັນສ້າງຕັ້ງກອງທັບປະຊາຊົນລາວ ຄົບຮອບ  75 ປີ, ໃນວັນທີ 14 ທັນວານີ້, ທີ່ສະໂມສອນຂອງຄະນະກວດກາສູນກາງ.
    ເປັນກຽດໃນພິທີ ໂດຍ ທ່ານ ສີໄນ ມຽງລາວັນ ຮອງເລຂາຄະນະພັກ ຮອງປະທານກວດກາສູນກາງພັກ ແລະ ຮອງຫົວໜ້າອົງການກວດກາແຫ່ງລັດ, ເຂົ້າຮ່ວມຮັບຟັງມີບັນດາຄະນະປະຈໍາພັກ, ສະມາຊິກພັກ, ພະນັກງານຫຼັກແຫຼ່ງ ພ້ອມດ້ວຍພະນັກງານ-ລັດຖະກອນ.
    ຈຸດປະສົງຂອງພິທີ ເພື່ອໃຫ້ສະມາຊິກພັກ, ພະນັກງານ-ລັດຖະກອນ ຮັບຮູ້, ກໍາແໜ້ນ ແລະ ຮໍ່າຮຽນເອົາແບບຢ່າງຄຸນສົມບັດທີ່ດີເລີດ ຂອງປະທານ ໄກສອນ ພົມວິຫານ, ມູນເຊື້ອປະຫວັດສາດ, ຄວາມອົງອາດກ້າຫານ ແລະ ຄວາມເສຍສະຫຼະອັນສູງສົ່ງຂອງບັນພະບູລຸດລາວ ໃນສະໄໝຕໍ່ສູ້ຕ້ານຈັກກະພັດຜູ້ຮຸກຮານ.
    ທ່ານ ສີໄນ ມຽງລາວັນ ໄດ້ເຜີຍແຜ່ ວັນເກີດຂອງປະທານ ໄກສອນ ພົມວິຫານ ຄົບຮອບ 103 ປີ ຊຶ່ງໄດ້ຍົກໃຫ້ເຫັນຊີວິດ ແລະ ການເຄື່ອນໄຫວປະຕິວັດ, ແບບຢ່າງທີ່ດີເລີດ ແລະ ຮໍ່າຮຽນເອົາແບບຢ່າງດີເລີດຂອງປະທານ ໄກສອນ ພົມວິຫານ.  ປະທານ ໄກສອນ ພົມວິຫານ ໄດ້ຮັບຮູ້ແຈ້ງວ່າ: “ການປະຕິວັດຕ່າງກັບການປະຕິຮູບ ແລະ ການລັດຖະປະຫານ, ການປະຕິວັດ ແມ່ນການຕໍ່ສູ້ຊົນຊັ້ນ ທີ່ດຸເດືອດຂ້ຽວຂາດ”. ສະນັ້ນ, ຢາກເອົາຊະນະສັດຕູ ຕ້ອງມີນໍ້າໃຈປະຕິວັດ ເດັດດ່ຽວໜຽວແໜ້ນ ແລະ ຕໍ່ສູ້ສຸດກົກສຸດປາຍ. ກ່ອນອື່ນໝົດ ແມ່ນຕ້ອງມີກຳລັງປະຕິວັດ ແລະ ມີຖານທີ່ໝັ້ນ ເພື່ອເປັນບ່ອນອີງໃຫ້ແກ່ການຕໍ່ສູ້ອັນຍືດເຍື້ອຍາວນານ, ເພາະວ່າພວກເຮົາ ຕໍ່ສູ້ກັບສັດຕູ ທີ່ມີຄວາມເຂັ້ມແຂງທີ່ສຸດ ຊຶ່ງບໍ່ສາມາດເອົາຊະນະສັດຕູໄດ້ ໃນໄລຍະທາງອັນສັ້ນ. ຈາກແນວຄິດຊີ້ນໍາ ທີ່ເປັນຍຸດທະສາດດັ່ງກ່າວ ດ້ວຍຄວາມເປັນເອກະພາບສູງ, ເພິ່ນ ຈຶ່ງໄດ້ນໍາພາກໍ່ສ້າງຖານທີ່ໝັ້ນການປະຕິວັດຂຶ້ນ ເລີ່ມຈາກຕາແສງລາວຮຸ່ງ ເມືອງຊຽງຄໍ້ ແຂວງຫົວພັນ, ແລ້ວຄ່ອຍໆຂະຫຍາຍອອກກາຍເປັນເຂດປົດປ່ອຍອັນກວ້າງໃຫຍ່.
ນອກນີ້, ປະທານ ໄກສອນ ພົມວິຫານ ຍັງໄດ້ຮັບຮູ້ແຈ້ງວ່າ: ຂະບວນການປະຕິວັດຢູ່ປະເທດເຮົາ ເພື່ອເອົາຊະນະກັບຈັກກະພັດຜູ້ຮຸກຮານ ຈຳເປັນຕ້ອງມີພັກນຳພາ. ຍ້ອນແນວນັ້ນ, ອີງຕາມການຕົກລົງຂອງກອງປະຊຸມໃຫຍ່ ຄັ້ງທີ II ຂອງພັກກອມມູນິດອິນດູຈີນ ປີ 1951, ປະທານ ໄກສອນ ພົມວິຫານ ຈຶ່ງໄດ້ຮ່ວມກັບໝູ່ຄະນະສ້າງຕັ້ງ “ພັກປະຊາຊົນລາວ” ຂຶ້ນໃນວັນທີ 22 ມີນາ 1955 ຊຶ່ງແມ່ນ “ພັກປະຊາຊົນ ປະຕິວັດລາວ” ໃນປັດຈຸບັນ.
ນັບແຕ່ມີພັກນໍາພາຂະບວນການປະຕິວັດ ຂອງປະເທດເຮົາ ໄດ້ຮັບໄຊຊະນະເປັນກ້າວໆ ຈາກໄຊຊະນະນີ້ ໄປສູ່ໄຊຊະນະໃໝ່ ທີ່ໃຫຍ່ຫຼວງຂຶ້ນເລື້ອຍໆ ໂດຍພາຍໃຕ້ການນໍາພາໂດຍກົງຂອງປະທານ ໄກສອນ ພົມວິຫານ ໃນຖານະທີ່ເປັນຜູ້ນຳໜ້າພາທາງ ແລະ ເປັນຜູ້ນໍາໃນຫຼາຍຕຳແໜ່ງ ໄດ້ນໍາພາການຕໍ່ສູ້ປະຕິວັດ ຢູ່ປະເທດເຮົາ ມີຜົນສຳເລັດ ແລະ ໄຊຊະນະອັນໃຫຍ່ຫຼວງໃນແຕ່ລະໄລຍະ ຂອງການປະຕິວັດ ຈົນກ້າວໄປສູ່ໄຊຊະນະຢ່າງສົມບູນ, ສາມາດທັບມ້າງແອກປົກຄອງ ຂອງພວກລ່າເມືອງຂຶ້ນແບບເກົ່າ ແລະ ແບບໃໝ່ ທີ່ຄອບງຳປະເທດເຮົາ ເປັນເວລາ 80 ກວ່າປີ ໃຫ້ພັງລະລາຍລົງຢ່າງສິ້ນເຊິ່ງ ແລະ ສະຖາປະນາ ສປປ ລາວ ຂຶ້ນໃນວັນທີ 2 ທັນວາ 1975 ຢ່າງສະຫງ່າຜ່າເຜີຍ. ຜົນງານ ແລະ ໄຊຊະນະຕະຫຼອດໄລຍະຂອງການປະຕິວັດ ໂດຍພາຍໃຕ້ການນໍາພາອັນປີຊາສາມາດ ຂອງປະທານ ໄກສອນ ພົມວິຫານ ພ້ອມດ້ວຍຜູ້ນໍາຄົນອື່ນໆ ທີ່ໄດ້ຈາລຶກໄວ້ໃນໜ້າປະຫວັດສາດ ອັນສະຫງ່າອົງອາດ ຂອງຊາດລາວຕະຫຼອດໄປ.
ພາຍຫຼັງ ສປປ ລາວ ໄດ້ຮັບການສະຖາປະນາຂຶ້ນແລ້ວ, ພັກເຮົາ ອັນມີປະທານ ໄກສອນ ພົມວິຫານ ເປັນຜູ້ນຳໜ້າ ໄດ້ນໍາພາທົ່ວປວງຊົນລາວທັງຊາດ ກໍ່ສ້າງລະບອບໃໝ່ ໂດຍປະຕິບັດສອງໜ້າທີ່ຍຸດທະສາດຄື: “ປົກປັກຮັກສາ ແລະ ສ້າງສາພັດທະນາປະເທດຊາດ” ຕາມເສັ້ນທາງສັງຄົມນິຍົມ.  ບົນພື້ນຖານນັ້ນ, ປະທານ ໄກສອນ ໄດ້ມີຄວາມສະດຸ້ງໄວ ແລະ ຕັດສິນໃຈປັບປຸງແນວທາງແຜນນະໂຍບາຍ ແຫ່ງການກໍ່ສ້າງລະບອບໃໝ່ໃຫ້ສອດຄ່ອງ. ອັນພົ້ນເດັ່ນທີ່ສຸດ ແມ່ນການນໍາພາລິເລີ່ມຄົ້ນຄວ້າວາງແນວທາງປ່ຽນແປງໃໝ່ຮອບດ້ານ ແລະ ມີຫຼັກການຂອງພັກ. ເພິ່ນ ໄດ້ຮ່ວມກັບໝູ່ຄະນະນໍາພາການຈັດຕັ້ງຜັນຂະຫຍາຍແນວທາງປ່ຽນແປງໃໝ່ ຢ່າງມີບາດກ້າວ ແລະ ມີຂັ້ນຕອນທີ່ເໝາະສົມ ຊຶ່ງເລີ່ມຈັດຕັ້ງປະຕິບັດ ແນວທາງປ່ຽນແປງໃໝ່ ນັບແຕ່ກອງປະຊຸມໃຫຍ່ ຄັ້ງທີ IV ຂອງພັກ ເປັນຕົ້ນມາ ແລະ ມີໝາກຜົນເທົ່າປັດຈຸບັນ. (ຂ່າວ: ແສງຈັນ)