 |
ກອງປະຊຸມ ທ່ານ ປະທານ ໄດ້ເຜີຍແຜ່ເຊືອມຊຶມມະຕິກອງປະຊຸມຄົບຄະນະ ຄັ້ງທີ 10 ສະໄໝ XI ຂອງຄະນະບໍລິຫານງານສູນກາງພັກ ແລະ ຍັງໄດ້ເລົ່າປະຫວັດມູນເຊື້ອ ປະທານ ສຸພານຸວົງ ເກີດເມື່ອວັນທີ 13 ກໍລະກົດ 1909 ທີ່ແຂວງຫຼວງພະບາງ, ເປັນເຊື້ອເຈົ້າລ້ານຊ້າງຫຼວງພະບາງ, ເປັນປະທານປະເທດ ຜູ້ທຳອິດຂອງ ສາທາລະນະລັດ ປະຊາທິປະໄຕ ປະຊາຊົນລາວ ເມື່ອ ຄ.ສ 1975, ທົ່ວໂລກໄດ້ຮູ້ຈັກໃນນາມ ເຈົ້າຊາຍແດງ, ປະທານ ສຸພານຸວົງ ເປັນຜູ້ນຳປະຕິວັດ “ບູລຸດເຫຼັກ” ແຫ່ງເຊື້ອແນວກະສັດລາວ, ເປັນສັນຍາລັກແຫ່ງການຕໍ່ສູ້ປອງດອງຊາດ. ຍ້ອນໄດ້ເຕີບໃຫຍ່ຂຶ້ນຢູ່ໃນທ່າມກາງສະພາວະທີ່ປະເທດຊາດ ໄດ້ສູນເສຍຄວາມເປັນເອກະລາດ, ຕົກເປັນເມືອງຂຶ້ນ ຂອງຈັກກະພັດຕ່າງດ້າວ, ປະຊາຊົນລາວບັນດາເຜົ່າໄດ້ຕົກເປັນຂ້ອຍຂ້າ ແລະ ໄດ້ຮັບຄວາມທຸກທໍລະມານ ພາຍໃຕ້ການດຳລົງຊີວິດຂອງຄວາມເປັນຂ້ອຍຂ້າມ້າຕ່າງ ແລະ ໄດ້ຮັບຄວາມເຈັບປວດຢ່າງແສນສາຫັດຈາກການກົດຂີ່ຂົ່ມເຫັງຂອງພວກລ່າເມືອງຂຶ້ນ, ປະທານ ສຸພານຸວົງ ຈຶ່ງຄຽດແຄ້ນສັດຕູຕັ້ງແຕ່ເຍົາໄວ. ພາຍໃຕ້ການນຳພາຂອງພັກປະຊາຊົນປະຕິວັດລາວ ປະທານ ສຸພານຸວົງ ໄດ້ເລີ່ມຈາກນັກຮັກຊາດທີ່ແທ້ຈິງຜູ້ໜຶ່ງຈົນກາຍເປັນນັກປະຕິວັດຜູ້ກ້າແກ່ນ, ເປັນຜູ້ນຳຂັ້ນສູງຂອງພັກ ແລະ ລັດເຮົາທີ່ມີບົດບາດ, ອິດທິພົນສູງ, ເພີ່ນແມ່ນຜູ້ນຳທີ່ມີຜົນງານອັນໃຫຍ່ຫຼວງໃນຂະບວນການນໍາພາການຕໍ່ສູ້ ແລະ ການຂະຫຍາຍຕົວຂອງການປະຕິວັດລາວ ກໍຄືການປະກອບສ່ວນເຂົ້າໃນຂະບວນການຕໍ່ສູ້ຂອງບັນດາປະຊາຊາດຢູ່ໃນທົ່ວໂລກ ດັ່ງທີວ່າ “ປະທານ ສຸພານຸວົງ ຜູ້ນຳທີ່ດີເດັ່ນ ແລະ ເຄົາລົບຮັກຂອງປະຊາຊົນລາວບັນດາເຜົ່າ ຍືນຍົງ ໃນດວງໃຈຂອງພວກເຮົາຕະຫຼອດການລະນານ”. ຈາກນັ້ນ ຍັງໄດ້ຜ່ານສອງເອກະສານທີ່ສຳຄັນ, ທັງນີ້ກໍເພື່ອເປັນການແນໃສ່ໃຫ້ສະມາຊິກພັກ, ພະນັກງານ - ລັດຖະກອນ ພາຍໃນອົງການໄອຍະການປະຊາຊົນໄດ້ມີຄວາມຮັບຮູ້ເຂົ້າໃຈເຊື່ມຊຶມພ້ອມທັງເປັນການລະນຶກເຖິງຄຸນງາມຄວາມດີຂອງທ່ານຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ.
(ຂ່າວ: ອອປສ-ພາບ: ຕຸໄລເພັດ)
ຄໍາເຫັນ