ອອປສແລະ ປກສ ລົງນາມຄຳແນະນຳຮ່ວມວ່າດ້ວຍການສັ່ງຟ້ອງຂຶ້ນສານ

ອົງການໄອຍະການປະຊາຊົນສູງສຸດ (ອອປສ) ໄດ້ຈັດພິທີລົງນາມຄໍາແນະນໍາຮ່ວມ ລະຫວ່າງ ອອປສ ແລະ ກະຊວງປ້ອງກັນຄວາມສະຫງົບ (ປກສ) ວ່າດ້ວຍການສັ່ງຟ້ອງຂຶ້ນສານໂດຍກົງ ໃນວັນທີ 21ທັນວານີ້ທີ່ອອປສ, ໂດຍການລົງນາມຂອງ ທ່ານ ບຸນທັນ ບຸນທະວິໄລ ຮອງຫົວໜ້າອອປສ ແລະ ທ່ານພົນຕີ ຄໍາກິ່ງ ຜຸຍຫຼ້າມະນີວົງ  ຮອງລັດຖະມົນຕີກະຊວງປ້ອງກັນຄວາມສະຫງົບມີຫົວໜ້າກົມ ແລະ  ພະນັກງານຫຼັກແຫຼ່ງທັງສອງພາກສ່ວນເຂົ້າຮ່ວມເປັນສັກຂີພິຍານ.
ທ່ານ ອ່ອນຈັນ ມະນີວັນ ຫົວໜ້າກົມຕິດຕາມກວດກາການດໍາເນີນຄະດີອາຍາ ໄດ້ຂຶ້ນຜ່ານເນື້ອໃນຄໍາແນະນໍາຮ່ວມ ລະຫວ່າງ ອອປສ ແລະ ປກສ ວ່າດ້ວຍການສັ່ງຟ້ອງຂຶ້ນສານໂດຍກົງ ຊຶ່ງຄຳແນະນຳຮ່ວມດັ່ງກ່າວ ໄດ້ຮັບການຄົ້ນຄວ້າປຶກສາຫາລື ແລະ ເອກະພາບກັນ ກ່ຽວກັບການປະສານງານ ລະຫວ່າງ ອອປສ ແລະ ປກສ, ໂດຍມອບໃຫ້ຄະນະປະສານງານຂອງສອງຝ່າຍ: ໂດຍໃຫ້ຫົວໜ້າອອປສແລະຫົວໜ້າອົງການສືບສວນ-ສອບສວນ ຂອງເຈົ້າໜ້າທີ່ຕໍາຫຼວດຮັບຮູ້, ເຂົ້າໃຈ ກ່ຽວກັບການສັ່ງຟ້ອງຂຶ້ນສານໂດຍກົງ ແມ່ນຫົວໜ້າອົງການໄອຍະການສັ່ງຟ້ອງຜູ້ຖືກຫາຂຶ້ນສານ, ໂດຍບໍ່ຈໍາເປັນຕ້ອງເປີດການສືບສວນ-ສອບສວນ;ການສັ່ງຟ້ອງຂຶ້ນສານໂດຍກົງຕ້ອງມີເງື່ອນໄຂຄື: ເປັນການກະທໍາຜິດໃນສະຖານລະຫຸໂທດຫຼື ໂທສານຸໂທດ ທີ່ກົດໝາຍກໍານົດໂທດຕັດອິດສະລະພາບຕໍ່າກວ່າ 3 ປີ, ມີຫຼັກຖານຄົບຖ້ວນ. ເປັນຕົ້ນ. ເປັນການກະທໍາຜິດເຊິ່ງໜ້າ, ມີການຮັບສາລະພາບຂອງຜູ້ຖືກຫາ, ຂັ້ນຕອນ ແລະ ຄວາມຮັບຜິດຊອບໃນການສັ່ງຟ້ອງຂຶ້ນສານໂດຍກົງເມື່ອມີເງື່ອນໄຂຄົບຖ້ວນຕາມທີ່ກໍານົດໄວ້ໃນຂໍ້ 2, ຫົວໜ້າອົງການສືບສວນ-ສອບສວນ ຂອງເຈົ້າໜ້າທີ່ຕໍາຫຼວດ, ຫົວໜ້າອອປສ ຕ້ອງມີຄວາມຮັບຜິດຊອບ ແລະ ປະຕິບັດຕາມຂັ້ນຕອນ.
ພິທີລົງນາມຄໍາແນະນໍາຮ່ວມ ລະຫວ່າງ ອອປສ ແລະ ປກສວ່າດ້ວຍການສັ່ງຟ້ອງຂຶ້ນສານໂດຍກົງ ໃນຄັ້ງນີ້ ເພື່ອແນໃສ່ ການເພີ່ມທະວີການຈັດຕັ້ງປະຕິບັດກົດໝາຍຢ່າງຮອບດ້ານ, ພາວະວິໄສ, ຖືກຕ້ອງຕາມຂະບວນຍຸຕິທໍາ, ຕິດຕາມກວດກາໃນການດໍາເນີນຄະດີຕາມຂະບວນການຍຸຕິທໍາ ຂອງອອປສ ແລະ ອົງການສືບສວນ-ສອບສວນ, ເຈົ້າໜ້າທີ່ຕໍາຫຼວດ ໃນການຈັດຕັ້ງປະຕິບັດຕາມກົດໝາຍວ່າດ້ວຍການດຳເນີນຄະດີອາຍາ ໃຫ້ຮັບປະກັນຖືກຕ້ອງຕາມແນວທາງ, ກົດໝາຍ ແລະ ຫຼັກການວິຊາສະເພາະ ເຮັດໃຫ້ສັງຄົມມີຄວາມຍຸຕິທໍາ, ມີຄວາມສະຫງົບ ແລະ ເປັນລະບຽບຮຽບຮ້ອຍ.

ຂ່າວ-ພາບ: ນ້ອຍມີນາ