ທີມນັກຄົ້ນຄວ້າໄດ້ນຳໃຊ້ DNA ທີ່ພົບໃນເລືອດທີ່ຍຸງກິນເຂົ້າໄປ ລະບຸຊະນິດນົກ ແລະ ສັດລ້ຽງລູກດ້ວຍນົມທີ່ອາໄສຢູ່ໃນອຸທິຍານແຫ່ງຊາດກາກາດູ ໃນເຂດດິນແດນພາກເໜືອຂອງອົສຕຣາລີ ປະມານ 70 ຊະນິດ ຊຶ່ງລວມທັງສັດຫຼາຍຊະນິດທີ່ຫາຍາກ ຫຼື ຍາກທີ່ຈະສັງເກດເຫັນ.
ທີມງານຄົ້ນຄວ້າຈາກມະຫາວິທະຍາໄລ Macquarie ແລະ ກະຊວງການປ່ຽນແປງສະພາບອາກາດ, ພະລັງງານ, ສິ່ງແວດລ້ອມ ແລະ ນ້ຳ ຂອງອົສຕຣາລີໄດ້ອະທິບາຍວ່າ: ເຕັກນິກດັ່ງກ່າວຄືການວິເຄາະ DNA ຂອງສັດຈາກຍຸງເພດແມ່ທີ່ຫາກໍກິນເລືອດ. ເມື່ອຍຸງຖືກຈັບໄດ້, ນັກວິທະຍາສາດສາມາດແຍກຮ່ອງຮອຍຂອງ DNA ເພື່ອລະບຸວ່າສັດຊະນິດໃດທີ່ອາໄສຢູ່ໃນພື້ນທີ່ນັ້ນ.
ຜົນການສຶກສາ ຊຶ່ງຕີພິມໃນວາລະສານ Environmental DNA ພົບວ່າ: ວິທີການນີ້ສາມາດກວດພົບສັດລ້ຽງລູກດ້ວຍນົມຫຼາຍຊະນິດໄດ້ຫຼາຍກວ່າອຸປະກອນຖ່າຍຮູບແບບດັ້ງເດີມເຖິງສອງເທົ່າ ແລະ ໃຊ້ເວລາເກັບຕົວຢ່າງພຽງ 2 ຄືນ ເມື່ອທຽບກັບການເຝົ້າຕິດຕາມດ້ວຍກ້ອງ 6 ອາທິດ.
ທ່ານ ແອນໂທນີ ຊາຣິຕັນ ຜູ້ກໍ່ຕັ້ງຫ້ອງທົດລອງ DNA ສິ່ງແວດລ້ອມ ແລະ ຕິດຕາມກວດກາຄວາມຫຼາກຫຼາຍທາງຊີວະພາບຂອງມະຫາວິທະຍາໄລ Macquarie ກ່າວວ່າ: ຍຸງເຮັດໜ້າທີ່ເປັນເຄື່ອງມືການເກັບຕົວຢ່າງທາງຊີວະພາບທຳມະຊາດທີ່ມີປະສິດທິພາບ ແລະ ຄືກັບ "ໂດຣນຂະໜາດນ້ອຍ" ບິນອ້ອມທຸກໆຄືນເພື່ອເກັບຕົວຢ່າງ.
ທີມງານຄົ້ນຄວ້າໄດ້ສັງເກດເຫັນວ່າ: ຍຸງຍ່ອຍເລືອດໄດ້ໄວ ແລະ ອາໄສຢູ່ໃກ້ກັບເຫຍື່ອ ຈຶ່ງຊ່ວຍໃຫ້ສາມາດລະບຸສັນຍານ DNA ຂອງສັດໃນພື້ນທີ່ໄດ້ຢ່າງຖືກຕ້ອງ. ວິທີການນີ້ຊ່ວຍໃຫ້ຕິດຕາມກວດກາຄວາມຫຼາກຫຼາຍທາງຊີວະພາບໂດຍບໍ່ລົບກວນຊີວິດຂອງສັດປ່າ.
ຄໍາເຫັນ