 |
ໃນພິທີ, ເລຂາໜ່ວຍພັກທະນາຄານພັດທະນາລາວ ຕ່າງໜ້າຄະນະພັກຮາກຖານສາຂາທະນາຄານ ຂຶ້ນລາຍງານການນຳພາ-ຊີ້ນຳວຽກງານຮອບດ້ານໃນຕະຫຼອດໄລຍະຜ່ານມາ, ຄະນະພັກຮາກຖານ ໄດ້ເອົາໃຈໃສ່ນໍາພາຈັດຕັ້ງປະຕິບັດຄົ້ນຄວ້າ, ເຊື່ອມຊຶມ ແນວທາງ, ນະໂຍບາຍຂອງພັກ ພ້ອມທັງຈັດຕັ້ງເຜີຍແຜ່ບັນດາເອກະສານຕ່າງໆ ໃຫ້ສະມາຊິກພັກ-ພະນັກງານ ພາຍໃນຄວາມຮັບຜິດຊອບຂອງຕົນ ໄດ້ຮັບຮູ້-ເຂົ້າໃຈຢ່າງເລິກເຊິ່ງ ໃນແຕ່ລະໄລຍະ, ພ້ອມທັງເອົາໃຈໃສ່ນໍາພາ-ຊີ້ນໍາຢ່າງໃກ້ຊິດໃນການປະຕິບັດໜ້າທີ່ວຽກງານວິຊາສະເພາະ ໂດຍອີງໃສ່ແຜນດໍາເນີນທຸລະກິດປະຈຳປີ ຂອງສາຂາ, ເອົາໃຈໃສ່ປັບປຸງການບໍລິການ ແລະ ການຕະຫຼາດ ແນໃສ່ລະດົມທຶນ ແລະ ຂະຫຍາຍຜະລິດຕະພັນ ເປັນຕົ້ນແມ່ນຜະລິດຕະພັນບັດ ແລະ ຜະລິດຕະພັນເອເລັກໂຕຣນິກ, ເອົາໃຈໃສ່ນໍາພາ-ຊີ້ນໍາການປ່ອຍສິນເຊື່ອ ແລະ ຄຸ້ມຄອງສິນເຊື່ອໃຫ້ມີປະສິດທິພາບ, ມີຍອດຊັບສິນ-ໜີ້ສິນ ທັງໝົດ 3,330 ລ້ານກີບ, ມີຍອດເງິນຝາກ 3,171 ລ້ານກີບ, ຍອດສິນເຊື່ອ 1,450 ລ້ານກີບ, ຕູ້ ATM 32 ຕູ້, ຜະລິດຕະພັນບັດ ATM 71,944 ບັດ,ຫນ່ວຍບໍລິການ 10 ໜ່ວຍ, ຜະລິດຕະພັນ QR Code 13,335 ແຫ່ງ, Bcome 36 ແຫ່ງ.
ຈາກນັ້ນ ສະຫາຍ ດາຊີ ສຸວັນນະສາຍ ຮອງຫົວໜ້າຄະນະຈັດຕັ້ງແຂວງ ໄດ້ຜ່ານມະຕິຕົກລົງຂອງຄະນະປະຈຳພັກແຂວງ ເລກທີ 611/ຄປຈ.ຊກ, ລົງວັນທີ 2 ຕຸລາ 2026 ວ່າດ້ວຍບົ່ງຕົວແຕ່ງຕັ້ງ ສະຫາຍ ສຸກສະຫວັນ ໄຊຍະແສງ ຫົວໜ້າທະນາຄານການຄ້າຕ່າງປະເທດລາວ ມະຫາຊົນ ສາຂາແຂວງເຊກອງ ເປັນເລຂາຄະນະພັກຮາກຖານສາຂາທະນາຄານແຂວງເຊກອງ ແລະເປັນເລຂາໜ່ວຍພັກທະນາຄານການຄ້າຕ່າງປະເທດລາວ ມະຫາຊົນ ສາຂາແຂວງເຊກອງ.
 |
ໂອກາດນີ້, ສະຫາຍ ນາງ ສີສະຫງ່າ ແກ້ວດວງດີ ມີຄໍາເຫັນວ່າ: ການບົ່ງຕົວແຕ່ງຕັ້ງເລຂາຄະນະພັກຮາກຖານສາຂາທະນາຄານໃນຄັ້ງນີ້ ແມ່ນອີງໃສ່ຄວາມຮຽກຮ້ອງຕ້ອງການຂອງໜ້າທີ່ວຽກງານການເມືອງ ໃນໄລຍະໃໝ່ ເພື່ອນໍາພາ-ຊີ້ນໍາ ບັນດາໜ່ວຍພັກທະນາຄານ ທີ່ຂຶ້ນກັບ ໃຫ້ມີການເຄື່ອນໄຫວວຽກການເມືອງແນວຄິດ ສ້າງຄວາມອຸ່ນອ່ຽງທຸ່ນທ່ຽງ ແລະ ຄວາມເຊື່ອໝັ້ນໃຫ້ແກ່ພະນັກງານຂອງຕົນ ໃນການປະຕິບັດໜ້າທີ່ຢ່າງມີຜົນສໍາເລັດ; ພ້ອມນີ້ ກໍເພື່ອກະກຽມ ແລະ ດໍາເນີນກອງປະຊຸມໃຫຍ່ຂັ້ນຂອງຕົນ ໄປຕາມແຜນການ ແລະທັນຕາມກຳນົດເວລາ; ສະນັ້ນ, ສະຫາຍ ເລຂາຄະນະພັກຮາກຖານສາຂາທະນາຄານ ຕ້ອງໄດ້ ເອົາໃຈໃສ່ປະຕິບັດພາລະບົດບາດຂອງຕົນໃນການນໍາພາວຽກງານພັກ, ຕ້ອງສ້າງຖັນແຖວພະນັກງານ ໃຫ້ມີຄຸນທາດການເມືອງໜັກແໜ້ນ, ນໍາພາວຽກງານວິຊາສະເພາະໃຫ້ມີການຂະຫຍາຍຕົວ; ເອົາໃຈໃສ່ໃນການລະດົມທຶນໃຫ້ໄດ້ຫຼາຍຂຶ້ນ ແລະ ສະໜອງທຶນສິນເຊື່ອໃຫ້ເຂົ້າເຖິງທ້ອງຖິ່ນ ຖືກຕາມເປົ້າໝາຍ ແນໃສ່ຕອບສະໜອງໃຫ້ແກ່ການພັດທະນາເສດຖະກິດ-ສັງຄົມຂອງແຂວງ ແລະ ເປັນການປະກອບສ່ວນໃຫ້ແກ່ການແກ້ໄຂຄວາມທຸກຍາກ ຂອງປະຊາຊົນ.ຂ່າວ:ພຸດທະສອນ
ຄໍາເຫັນ