ປະກາດບົ່ງຕົວແຕ່ງຕັ້ງຄະນະພັກຮາກຖານ ດ່ານສາກົນຂົວມິດຕະພາບ 3

ສະຫາຍ ບຸນທະວົງສັກ ເທບພະລັກ ຮອງຫົວໜ້າຄະນະຄຸ້ມຄອງດ່ານສາກົນຂົວມິດຕະພາບ 3 ໄດ້ຜ່ານບົດສະຫຼຸບການນໍາພາ-ຊີ້ນໍາ ຂອງຄະນະພັກຮາກຖານດ່ານສາກົນຂົວມິດຕະພາບ 3 ໃນໄລຍະຜ່ານມາວ່າ: ຄະນະພັກຮາກຖານດ່ານສາກົນຂົວມິດຕະພາບ 3 ມີສະມາຊິກພັກໃນທົ່ວຮາກຖານທັງໝົດ 88 ສະຫາຍ ຍິງ 29 ສະ ຫາຍ, ມີສະມາຊິກພັກສຳຮອງ 1 ສະຫາຍ, ມີພະນັກງານທັງໝົດ 124 ທ່ານ ຍິງ 31 ທ່ານ.

ໃນກອງປະຊຸມ, ຕາງໜ້າຄະນະຈັດຕັ້ງແຂວງ ໄດ້ຜ່ານມະຕິຕົກລົງຂອງຄະນະປະຈໍາພັກແຂວງ ວ່າດ້ວຍການບົ່ງຕົວແຕ່ງຕັ້ງ ຄະນະພັກຮາກຖານດ່ານສາກົນຂົວມິດຕະພາບ 3 ຈໍານວນ 3 ສະຫາຍຄື: ສະຫາຍ ພູຊະນະ ໄຊໂກສີ ຫົວໜ້າຄະນະຄຸ້ມຄອງດ່ານສາກົນຂົວມິດຕະພາບ 3 ເປັນເລຂາຄະນະພັກຮາກຖານ, ສະຫາຍ ບຸນທະວົງສັກ ເທບພະລັກ ຮອງຫົວໜ້າຄະນະຄຸ້ມຄອງດ່ານສາກົນຂົວມິດຕະພາບ 3 ເປັນຮອງເລຂາຄະນະພັກຮາກຖານ ທັງເປັນປະທານຄະນະກວດກາພັກ, ສະຫາຍ ພັທ ສຸກທອງ ວົງສາ ເປັນຄະນະພັກຮາກຖານ, ເປັນຮອງປະທານຄະນະກວດກາພັກ. ສ່ວນສະຫາຍອື່ນໆ ໃນຄະນະພັກທີ່ໄດ້ຮັບການເລືອກຕັ້ງ ແລະ ຖືກຮັບຮອງກ່ອນນັ້ນແມ່ນໃຫ້ຮັກສາໄວ້ຄືເກົ່າ, ບົ່ງຕົວແຕ່ງຕັ້ງສະຫາຍ ນາງ ຄຸດພະຈັນ ໄຊຊະນະວົງ ຮອງຫົວໜ້າພາສີປະຈໍາດ່ານສາກົນຂົວມິດຕະພາບ 3 ເປັນຮອງເລຂາໜ່ວຍພັກພາສີ ທັງເປັນຜູ້ກວດກາໜ່ວຍພັກ. ໃຫ້ກຽດມອບມະຕິຕົກລົງໂດຍສະຫາຍ ສາຍຄໍາ ພະໄຊສິດທິເດດ.

ໂອກາດນີ້, ສະຫາຍ ສາຍຄໍາ ພະໄຊສິດທິເດດ ໄດ້ເນັ້ນໜັກໃຫ້ຮີບຮ້ອນແບ່ງໜ້າທີ່ວຽກງານ ກໍຄືແບ່ງຄວາມຮັບຜິດຊອບພາຍໃນຄະນະພັກຮາກຖານໃຫ້ລະອຽດ, ຈະແຈ້ງ, ເອົາໃຈໃສ່ໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ທີ່ໄດ້ຮັບຮອງໃຫ້ເກີດຜົນເປັນຈິງ ສິ່ງສໍາຄັນຕ້ອງເຊີດຊູຄວາມຮັບຜິດຊອບການເມືອງ ດ້ວຍຄວາມເປັນເຈົ້າການ, ດ້ວຍການທຸ້ມເທເຫື່ອແຮງ, ສະຕິປັນຍາ, ຄວາມຮູ້, ຄວາມສາມາດ, ມີຄວາມເສຍສະຫຼະ, ເຮັດແທ້ທຳຈິງ ເພື່ອເຮັດສໍາເລັດໜ້າທີ່ຕາມການມອບໝາຍ ແລະ ສົມກັບຄວາມໄວ້ວາງໃຈຂອງສະມາຊິກພັກ-ພະນັກງານໃນທົ່ວດ່ານສາກົນ; ສືບຕໍ່ເອົາໃຈໃສ່ໃນວຽກງານສຶກສາອົບຮົມທາງດ້ານການເມືອງ-ແນວຄິດ ໃຫ້ສະມາຊິກພັກ-ພະນັກງານ ທີ່ຢູ່ໃນຄວາມຮັບຜິດຊອບໃຫ້ມີຄວາມຈົ່ງຮັກພັກດີ, ມີຄວາມຕັ້ງຕໍ່ບໍລິສຸດ, ມີຄວາມເສຍສະຫຼະ ເຮັດແທ້ທຳຈິງ ເພື່ອຜົນປະໂຫຍດສ່ວນລວມຂອງຊາດ ຕາມພາລະບົດບາດຂອງຕົນ.

ຂ່າວ: ແດງສະຫວັດ ແສນພານິດ