ປະກາດນາຍທະຫານຂັ້ນສູງພັກການກຽມຮັບບຳນານ

ສະຫາຍ ນັນທະພົນ ລີວັດທະນາ ຮອງຫົວໜ້າກົມຄຸ້ມຄອງພະນັກງານ ຕາງໜ້າຄະນະຈັດຕັ້ງສູນກາງພັກໄດ້ຜ່ານມະຕິຕົກລົງຂອງກົມການເມືອງສູນກາງພັກ ວ່າດ້ວຍການອະນຸມັດໃຫ້ພະນັກງານການນຳຂັ້ນສູງພັກການກຽມຮັບບຳນານ ແລະ ດຳລັດຂອງນາຍົກລັດຖະມົນຕີ ວ່າດ້ວຍການອະນຸມັດໃຫ້ພະນັກງານການນຳຂັ້ນສູງພັກການກຽມຮັບບຳນານ. ໃນນີ້, ໄດ້ຕົກລົງໃຫ້ສະຫາຍ ພົນໂທ ທອງລອຍ ສິລິວົງ ກຳມະການສູນກາງພັກ ຮອງລັດຖະມົນຕີກະຊວງປ້ອງກັນປະເທດ ແລະ ສະຫາຍ ພົນໂທ ວົງຄຳ ພົມມະກອນ ກຳມະການສູນກາງພັກ ຮອງລັດຖະມົນຕີກະຊວງປ້ອງກັນປະເທດພັກການຮັບບຳນານ. ຈາກນັ້ນ, ສະຫາຍ ພົນຕີ ວົງສອນ ອິນປານພິມ ຮອງເລຂາຄະນະພັກກະຊວງ ຮອງລັດຖະມົນຕີກະຊວງປ້ອງກັນປະເທດ ຫົວໜ້າກົມໃຫຍ່ການເມືອງກອງທັບ ໄດ້ຜ່ານຂໍ້ຕົກລົງຂອງກະຊວງປ້ອງກັນປະເທດ ວ່າດ້ວຍການອະນຸມັດໃຫ້ພະນັກງານການນຳຂັ້ນສູງພັກການກຽມຮັບບຳນານ. ໃນນີ້, ກະຊວງປ້ອງກັນປະເທດ ຕົກລົງໃຫ້ສະຫາຍ ພົນຕີ ປະສິດ ທ່ຽງທຳ ຮອງລັດຖະມົນຕີກະຊວງປ້ອງກັນປະເທດ, ສະຫາຍ ພົນຕີ ສອນທອງ ພົມລາວົງ ຮອງຫົວໜ້າກົມໃຫຍ່ການເມືອງກອງທັບ, ສະຫາຍ ພົນຈັດຕະວາ ຄອນສະຫວັນ ມິ່ງຈຳປາບານ ຮອງຫົວໜ້າກົມໃຫຍ່ເຕັກນິກກອງທັບພັກການກຽມຮັບບຳນານ.

ໂອກາດນີ້, ສະຫາຍ ພົນໂທ ຄຳລຽງ ອຸທະໄກສອນ ໄດ້ໂອ້ລົມພ້ອມທັງຮຽກຮ້ອງມາຍັງນາຍທະຫານຂັ້ນສູງທີ່ໄດ້ຮັບນະໂຍບາຍພັກການກຽມຮັບບຳນານ ພ້ອມກັນສືບຕໍ່ເສີມຂະຫຍາຍຄວາມເປັນແບບຢ່າງທີ່ດີໃຫ້ພະນັກງານຮຸ່ນສືບທອດ ເປັນແກ່ນສານເຕົ້າໂຮມຄວາມສາມັກຄີໃນອົງການປົກຄອງທ້ອງຖິ່ນຂັ້ນບ້ານ ໂດຍສະເພາະໃນການຊີ້ນຳວຽກງານປ້ອງກັນຊາດ-ປ້ອງກັນຄວາມສະຫງົບ, ດຳລົງຊີວິດປອດໃສຂາວສະອາດ ແລະ ຖືກຕ້ອງຕາມລະບຽບກົດໝາຍ.

ຂ່າວ: ນາງ ກາ ຫຼ້າພາວັນ