ໃນພິທີ, ທ່ານ ອາລຸນໄຊ ສູນນະລາດ ໄດ້ຕາງໜ້າໃຫ້ຄະນະພັກ, ຄະນະນໍາ ກໍຄືຕາງໜ້າໃຫ້ຄະນະກຳມະການ ປກຊ - ປກສ ແຂວງ ລາຍງານກ່ຽວກັບການຈັດຕັ້ງປະຕິບັດວຽກງານ ປກຊ - ປກສ ຢູ່ແຂວງຈຳປາສັກ ໃນໄລຍະ 5 ເດືອນຜ່ານມາ ໂດຍສັງເຂບ ຊຶ່ງຍົກໃຫ້ເຫັນສະພາບລວມໃນການນໍາພາ - ຊີ້ນໍາ, ຜົນງານທີ່ພົ້ນເດັ່ນ ສາມາດມ້າງຄະດີຢ່າເສບຕິດ ໄດ້ທັງໝົດ 224 ຄະດີ, ມີ 425 ຄົນ,ຍິງ 30 ຄົນ, ຢຶດຢາບ້າໄດ້ 52,935 ເມັດ, ເຮໂລອິນ 6 ກິໂລກຣາມ ກັບ 10.32 ກຣາມ, ຄໍລາເຈນ 1 ກິໂລກຣາມ ກັບ 805.95 ກຣາມ; ໄດ້ຫັນເອົາກໍາລັງລົງກໍ່ສ້າງຮາກຖານການເມືອງ ຈໍານວນ 752 ທ່ານ ເພື່ອລົງປັບປຸງລະບົບການເມືອງຢູ່ຂັ້ນຮາກຖານໃຫ້ໜັກແໜ້ນ, ເຂັ້ມແຂງ, ປັບປຸງກໍາລັງກອງຫຼອນ, ປກສ ບ້ານ ຢູ່ຂັ້ນຕາແສງ ແລະ ຂັ້ນບ້ານ. ພ້ອມນີ້, ທ່ານ ອາລຸນໄຊ ສູນນະລາດ ຍັງຜ່ານແຜນຈຸດສຸມໃນຕໍ່ໜ້າ.
ທ່ານ ພັນເອກ ບົວພັນ ດວງຈໍາປາສັກ ຮອງຫົວໜ້າຫ້ອງການ ປກຊ - ປກສ ສູນກາງ ກໍໄດ້ຜ່ານມະຕິຕົກລົງຂອງຄະນະເລຂາທິການສູນກາງພັກ ເລກທີ 100/ຄລສພ, ລົງວັນທີ 18 ພຶດສະພາ 2026 ວ່າດ້ວຍການແຕ່ງຕັ້ງປະທານ, ຮອງປະທານ, ຜູ້ປະຈຳການ ແລະ ກຳມະການ ຄະນະກຳມະການປ້ອງກັນຊາດ - ປ້ອງກັນຄວາມສະຫງົບແຂວງຈໍາປາສັກ ໂດຍແຕ່ງຕັ້ງ ທ່ານ ອາລຸນໄຊ ສູນນະລາດ ເປັນປະທານ, ທ່ານ ສຸກສະຫວັນ ວິໄລວົງ ເປັນຮອງປະທານ, ທ່ານ ພົນຈັດຕະວາ ວິລະຕູ່ ວໍລະຈິດ ເປັນຮອງປະທານ ທັງເປັນຜູ້ປະຈຳການ, ທ່ານ ພົນຈັດຕະວາ ບຸນອ່ຽງ ພັນວົງສາ ເປັນຮອງປະທານ, ທ່ານ ສຸພາບ ທຳມະຮັກສາ, ທ່ານ ສຸກກະເສີມ ສີຫານຸວງ, ທ່ານ ພົນຈັດຕະວາ ຄໍາກົດ ອິນສີນາ, ທ່ານ ພັນເອກ ສິດປະເສີດ ນວນມະນີວົງ ແລະ ທ່ານ ພັນໂທ ຄໍາພູວົງ ແກ້ວວົງກົດ ເປັນກຳມະການ. ຈາກນັ້ນ, ກໍໄດ້ມອບມະຕິຕົກລົງ ແລະ ຊໍ່ດອກໄມ້ໃຫ້ແກ່ຄະນະກໍາມະການ ປກຊ - ປກສ ແຂວງ ທີ່ຖືກແຕ່ງຕັ້ງໃນຄັ້ງນີ້, ໃຫ້ກຽດມອບໂດຍທ່ານ ພົນເອກ ວິໄລ ຫຼ້າຄຳຟອງ.
ທ່ານ ພົນເອກ ວິໄລ ຫຼ້າຄຳຟອງ ໄດ້ມີຄໍາເຫັນໂອ້ລົມເນັ້ນໜັກໃຫ້ ຄະນະພັກ - ຄະນະກໍາມະການ ປກຊ - ປກສ ແຂວງ ທີ່ຖືກແຕ່ງຕັ້ງໃໝ່ ແລະ ຄະນະພັກ - ຄະນະບັນຊາ 2 ກໍາລັງ ສຸມໃສ່ນໍາພາ - ຊີ້ນໍາ ວຽກງານ ປກຊ - ປກສ ຢ່າງແຂງແຮງ ເພື່ອຮັບປະກັນໃຫ້ແຂວງມີຄວາມສະຫງົບທາງດ້ານການເມືອງ, ມີຄວາມເປັນລະບຽບຮຽບຮ້ອຍທາງສັງຄົມ, ເອົາໃຈໃສ່ປັບປຸງຄະນະກໍາມະການ ປກຊ - ປກສ ແຕ່ລະຂັ້ນ ເປັນຕົ້ນແມ່ນຂັ້ນເມືອງ - ນະຄອນ, ສ່ວນຕາແສງ ໃຫ້ມີພຽງແຕ່ໜ່ວຍງານ ປກຊ - ປກສ ຕາແສງ ເພື່ອເຮັດໃຫ້ການຈັດຕັ້ງປະຕິບັດໃຫ້ມີຜົນສໍາເລັດ. ຈາກນັ້ນ, ໃຫ້ເອົາໃຈໃສ່ສຶກສາອົບຮົມການເມືອງ - ແນວຄິດ ໃຫ້ແກ່ສະມາຊິກພັກ - ພະນັກງານ, ການນໍາຫຼັກແຫຼ່ງ ໃຫ້ໜັກ ແໜ້ນເຂັ້ມແຂງ, ມີທັດສະນະຫຼັກໝັ້ນ, ຄຸນທາດການເມືອງໜັກແໜ້ນ, ຈໍາແນກມິດ - ສັດຕູ ໃຫ້ໄດ້ຢ່າງຈະແຈ້ງ, ມີຄວາມເຂັ້ມງວດໃນການຈັດຕັ້ງປະຕິບັດໜ້າທີ່ການເມືອງ, ຕ້ອງເດັດຂາດໂດຍກົງຮອບດ້ານ, ຈັດຕັ້ງນໍາພາແນວທາງປ້ອງກັນຊາດ ທົ່ວປວງຊົນຮອບດ້ານຂອງພັກ, ສ້າງໃຫ້ກໍາລັງມີລະບຽບວິໄນ, ໝັ່ນຝຶກຊ້ອມ - ຝຶກແອບຮໍ່າຮຽນຢ່າງສະໝໍ່າສະ ເໝີ ເພື່ອສ້າງຄວາມເຂັ່ມແຂງໃຫ້ແກ່ກໍາລັງ, ສືບຕໍ່ເອົາໃຈໃສ່ປະກອບສ່ວນເຂົ້າໃນການເຄື່ອນໄຫວວຽກງານກໍ່ສ້າງຮາກຖານການເມືອງ ໃຫ້ໜັກແໜ້ນເຂັ້ມແຂງຂຶ້ນໄປເລື້ອຍໆ.
ຂ່າວ-ພາບ: ທູນທອງໃຈ
ຄໍາເຫັນ