ປະກາດແຕ່ງຕັ້ງຂັ້ນນໍາພາ-ບັນຊາ ແລະ ຍົກລະດັບພະແນກຊາຍແດນ ເປັນຫ້ອງທະຫານຊາຍແດນ ທະຫານແຂວງໄຊຍະບູລີ

ສະຫາຍ ພັນເອກ ຄໍາເອ້ຍ ສຸກແສງເໜືອ ຮອງຫົວໜ້າກົມພະນັກງານ ກົມໃຫຍ່ການເມືອງກອງທັບ ໄດ້ຜ່ານຂໍ້ຕົກລົງຂອງກະຊວງປ້ອງກັນປະເທດ ວ່າດ້ວຍການປະກາດໃຫ້ສະຫາຍ ພັນເອກ ໄວຍາກອນ ເພັດສະລາດ ຮອງກອງບັນຊາການທະຫານແຂວງ, ຫົວໜ້າຫ້ອງເສນາທິການທະຫານແຂວງ ພັກການຮັບບໍານານ ແລະ ແຕ່ງຕັ້ງສະຫາຍ ພັນໂທ ສຸກກະເສີມ ວິຍາວົງ ເປັນຫົວໜ້າຫ້ອງເສນາທິການທະຫານແຂວງ, ສະຫາຍ ພັນໂທ ເສິກ ໄຊຍະພອນ ແລະ ສະຫາຍ ພັນໂທ ຈັນເພັງ ເພັງພະວັນ ເປັນຮອງຫົວໜ້າຫ້ອງເສນາທິການ ທະຫານແຂວງໄຊຍະບູລີ. ຈາກນັ້ນ, ສະຫາຍ ພົຈວ ບຸນຍອງ ດວງດີ ຫົວໜ້າການທະຫານ ກອງບັນຊາການທະຫານແຂວງ ໄດ້ຜ່ານບົດລາຍງານການປະຕິບັດໜ້າທີ່ຂອງກໍາລັງທະຫານຊາຍແດນໃນໄລຍະຜ່ານມາ.

ຈາກນັ້ນ, ສະຫາຍ ພັນເອກ ບຸນເພັງ ເທບພາພອນ ຮອງຫົວໜ້າກົມກໍາລັງພົນ ກົມໃຫຍ່ເສນາທິການກອງທັບ ໄດ້ຜ່ານຂໍ້ຕົກລົງຂອງກະຊວງປ້ອງກັນປະເທດ ວ່າດ້ວຍການຍົກລະດັບພະແນກຊາຍແດນຂຶ້ນເປັນຫ້ອງທະຫານຊາຍແດນແຂວງໄຊຍະບູລີ, ຂໍ້ຕົກລົງວ່າດ້ວຍທີ່ຕັ້ງ, ພາລະບົດບາດຂອງຫ້ອງທະຫານຊາຍແດນ ແລະ ຂໍ້ຕົກລົງແຕ່ງຕັ້ງຄະນະຫ້ອງທະຫານຊາຍແດນແຂວງໄຊຍະບູລີ. ກະຊວງປ້ອງກັນປະເທດ ຕົກລົງແຕ່ງຕັ້ງ ສະຫາຍ ພັນໂທ ທອງວັນ ສຸກສະຫວັນ ເປັນຫົວໜ້າຫ້ອງທະຫານຊາຍແດນ, ສະຫາຍ ພັນໂທ ບຸນທະວີ ຖານະວັນ, ສະຫາຍ ພັນໂທ ສົມແພງ ຍອດໜັ້ນ ແລະ ສະຫາຍ ພັນໂທ ແອຊອນ ຈໍາປາພັນ ເປັນຮອງຫົວໜ້າຫ້ອງທະຫານຊາຍແດນ, ແຕ່ງຕັ້ງສະຫາຍ ພັນຕີ ໜໍ່ຄໍາ ສຸລະເດດ ເປັນຫົວໜ້າພະແນກເສນາປ້ອງກັນຊາຍແດນ, ສະຫາຍ ພັນຕີ ທະນົງສັກ ລັດຕະນະວົງ ເປັນຮອງຫົວໜ້າພະແນກເສນາປ້ອງກັນຊາຍແດນ, ສະຫາຍ ຮ້ອຍເອກ ໄຊສົງຄາມ ມະນີວົງ ເປັນຫົວໜ້າພະແນກສືບຂ່າວຊາຍແດນ, ສະຫາຍ ພັນຕີ ສິດທິພອນ ພົມມະຈັນ ເປັນຮອງຫົວໜ້າພະແນກສືບຂ່າວຊາຍແດນ, ສະຫາຍ ພັນຕີ ເວທີ ສີສະໜອນ ເປັນຫົວໜ້າພະແນກບໍລິຫານ-ສັງລວມ, ສະຫາຍ ພັນຕີ ສົມທອງ ແພງມຸກ ເປັນຮອງຫົວໜ້າພະແນກບໍລິຫານ-ສັງລວມຫ້ອງທະຫານຊາຍແດນ.

ໂອກາດນີ້, ສະຫາຍ ພົນຕີ ແສງມະນີວອນ ຄໍາມະນີ ໄດ້ມີຄຳເຫັນໂອ້ລົມເນັ້ນຕໍ່ບັນດາສະຫາຍທີ່ໄດ້ຮັບໜ້າທີ່ໃໝ່ ຈົ່ງເພີ່ມທະວີຍົກສູງຄວາມຮັບຜິດຊອບຕໍ່ໜ້າທີ່ການເມືອງຂອງຕົນ, ມີຄວາມກະຕືລືລົ້ນ, ຫ້າວຫັນໃນການຝຶກຝົນຫຼໍ່ຫຼອມຕົນເອງ. ເອົາໃຈໃສ່ຍົກສູງພາລະບົດບາດຄວາມສາມັກຄີເປັນປຶກແຜ່ນ, ຍຶດໝັ້ນຫຼັກການລວມສູນປະຊາທິປະໄຕ ເຮັດວຽກເປັນໝູ່ຄະນະ ມີແບບແຜນ ແລະ ມີການຕິດຕາມກວດກາ ແລະ ສະຫຼຸບລາຍງານ, ຕັ້ງໜ້າຍູ້ແຮງຂະບວນການດ້ານຕ່າງໆ ໃຫ້ຟົດຟື້ນ ບົນພື້ນຖານເສີມຂະຫຍາຍ ແລະ ຮັກສາມູນເຊື້ອອັນດີງາມຂອງກົມກອງໄວ້ໃຫ້ໝັ້ນຄົງຕະຫຼອດໄປ. ຂ່າວ: ກອງທັບ