ປັດຈຸບັນ ເຈົ້າໜ້າທີ່ກ່ຽວຂ້ອງທັງພາຍໃນ ແລະ ຕ່າງປະເທດ ໄດ້ສືບຕໍ່ຄົ້ນຫາດຳເນີນການຄົ້ນຫາຜູ້ປະສົບໄພຕິດທີ່ຍັງຕິດຄ້າງຢູ່ໃນຖໍ້າບ້ານພັນໄຊ

ທ່ານ ນໍລະເສດ ປາລະສີງ ຫຼື ຄູເບັ້ນ ຜູ້ຊ່ຽວຊານມຸດນໍ້າຖໍ້າສາກົນ ຈາກປະເທດໄທ ທັງເປັນໜຶ່ງໃນໜ່ວຍງານຄົ້ນຫາຜູ້ປະສົບໄພທີ່ຕິດຄ້າງຢູ່ຖໍ້າບ້ານພັນໄຊ ເມືອງລ່ອງເເຈ້ງ ໃຫ້ຮູ້ວ່າ: ການປະຕິບັດການຄົ້ນຫາຜູ້ປະສົບໄພຄັ້ງນີ້, ດໍາເນີນໄປດ້ວຍຄວາມຫຍຸ້ງຍາກຫຼາຍສົມຄວນ ເນື່ອງຈາກຖໍ້າມີຂະໜາດແຄບ, ຍາວ, ບາງບ່ອນໄດ້ຄານເຂົ້າໄປ ປາກຖໍ້າມີນ້ຳຖ້ວມຂັງ ແລະ ໄດ້ນໍາເອົາຈັກສູບນໍ້າມາຕິດຕັ້ງແລ້ວສູບນໍ້າອອກຕະຫຼອດເວລາ ພ້ອມທັງໄດ້ນໍາເອົາອົກຊີແຊນເຂົ້າຊ່ວຍເພື່ອຫາຍໃຈ ແຕ່ໄດ້ຮັບການຮ່ວມມືຈາກຫຼາຍພາກສ່ວນຂອງລາວ ລວມເຖິງຜູ້ຊ່ຽວຊານຈາກຕ່າງປະເທດ ເຮັດໃຫ້ສາມາດນໍາເອົາ 5 ຄົນອອກມາຈາກຖໍ້າໄດ້ດ້ວຍຄວາມປອດໄພ, ແຕ່ສິ່ງທີ່ຮີບຮ້ອນໃນປັດຈຸບັນນີ້ແມ່ນກໍາລັງວາງແຜນສືບຕໍ່ຄົ້ນຫາຜູ້ທີ່ຍັງຕິດຄ້າງຢູ່ໃນຖ້ຳອີກ 2 ຄົນຢ່າງຮີບດ່ວນ ເນື່ອງຈາກພົບເຫັນຮ່ອງຮອຍວ່າ 2ຄົນນີ້ຍັງມີຊີວິດຢູ່ ຈົນກວ່າຈະສໍາເລັດພາລະກິດ.

ຂະນະທີ່ນາງ ພວງ ຊຶ່ງເປັນແມ່ຂອງທ້າວ ເບ ໜຶ່ງໃນຈໍານວນຜູ້ປະສົບໄພ 2 ຄົນທີ່ຍັງຕິດຄ້າງຢູ່ໃນຖໍ້າໄດ້ສະແດງຄວາມຮູ້ສຶກວ່າ: ເສຍໃຈກັບເຫດການທີ່ເກີດຂຶ້ນ ຊຶ່ງເຫດການນີ້ເປັນອຸບັດເຫດຜ່ານມາລູກຊາຍຕົນເອງໄດ້ໄປຊອກຢູ່ຫາກິນຕາມຄວາມລຶ້ງເຄີຍໃນການດໍາລົງຊີວິດຂອງຄົນທີ່ອາໄສຢູ່ທ້ອງຖິ່ນ, ຫວັງວ່າເຈົ້າໜ້າທີ່ຈະສາມາດຊ່ວຍເຫຼືອ ແລະ ກອບກູ້ເອົາຊີວິດຂອງລູກຊາຍອອກມາໄດ້ຢ່າງປອດໄພ, ພ້ອມທັງສະແດງຄວາມຂອບໃຈເປັນຢ່າງສູງຕໍ່ການຈັດຕັ້ງພັກ-ລັດ, ໜ່ວຍກູ້ໄພທຸກພາກສ່ວນທັງພາຍໃນ ແລະຕ່າງປະເທດ ໂດຍສະເພາະໜ່ວຍກູ້ໄພຈາກປະເທດໄທທີ່ໃຫ້ການຊ່ວຍເຫຼືອຄອບຄົວຂອງຕົນເອງເປັນຢ່າງດີ.

ຂະນະດຽວກັນຜູ້ປະສົບໄພ 5 ຄົນທີ່ທີມງານກູ້ໄພສາມາດຊ່ວຍເຫຼືອອອກມາໄດ້ກ່ອນໜ້ານີ້ ປັດຈຸບັນໄດ້ຮັບການປິ່ນປົວຕາມຫຼັກວິຊາການແພດ ແລະ ໄດ້ຮັບການເບິ່ງແຍງດູແລຢ່າງໃກ້ຊິດຈາກເຈົ້າໜ້າທີ່ກ່ຽວຂ້ອງ ຊຶ່ງເຂົາເຈົ້າທັງໝົດພວມຟື້ນຟູສຸຂະພາບໃຫ້ແຂງແຮງດີຂຶ້ນເລື້ອຍໆ ແຕ່ສິ່ງທີ່ຈະຕ້ອງສືບຕໍ່ຈັດຕັ້ງປະຕິບັດໃນປັດຈຸບັນນີ້ແມ່ນການຊ່ວຍເຫຼືອຜູ້ທີ່ຍັງຕິດຄ້າງຢູ່ໃນຖ້ຳຈໍານວນສອງຄົນຢ່າງຕໍ່ເນື່ອງ ໂດຍໄດ້ຮັບການສະໜັບສະໜູນຈາກພາກສ່ວນຕ່າງໆ ເຖິງວ່າສະພາບເສັ້ນທາງຈະເປັນພູສູງຊັນ ແລະ ຫຍຸ້ງຍາກກໍຕາມ ແຕ່ກໍບໍ່ເປັນອຸປະສັກຂອງໜ່ວຍງານກູ້ໄພແຕ່ຢ່າງໃດ ນັບຖືນ້ຳໃຈຂອງທຸກພາກສ່ວນທີ່ມີສ່ວນຮ່ວມປະຕິບັດງານຄັ້ງນີ້ .

ຂ່າວ: ເດດອາລຸນ ແກ້ວວິໄລ