ປາຖະກະຖາ ຜົນສຳເລັດອັນພົ້ນເດັ່ນຂອງພັກກອມມູນິດຫວຽດນາມ ໃນການນຳພາປະເທດຊາດກ້າວຂຶ້ນສັງຄົມນິຍົມ

ເນື່ອງໃນໂອກາດວັນຊາດ ສສ ຫວຽດນາມ ຄົບຮອບ 78 ປີ ແລະ ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 61 ປີ, ຄະນະໂຄສະນາອົບຮົມສູນກາງພັກ (ຄອສພ) ຮ່ວມກັບ ສະ ຖານທູດ ສສ ຫວຽດນາມ ປະຈຳລາວ ໄດ້ຈັດປາຖະກະຖາ ຜົນສຳເລັດອັນພົ້ນເດັ່ນຂອງພັກກອມມູນິດຫວຽດນາມ ໃນການນຳພາປະເທດຊາດກ້າວຂຶ້ນສັງຄົມນິຍົມ ແລະ ນະໂຍບາຍຕ່າງປະເທດໃນເງື່ອນໄຂປັດຈຸບັນ ໂດຍມີ ສະຫາຍ ລາວປາວຊົ່ງ ນະວົງໄຊ ກຳມະການສູນກາງພັກ ຮອງຫົວໜ້າ ຄອສພ, ມີຮອງຫົວໜ້າ ຄອສພ, ພ້ອມດ້ວຍບັນດາຜູ້ຕາງໜ້າຈາກກະຊວງ, ອົງການ, ບັນດາເຈົ້າເມືອງ, ສະມາຊິກພັກ, ພະນັກງານ-ລັດຖະກອນ ຄອສພ ເຂົ້າຮ່ວມ.
ສະຫາຍ ຫງວຽນບ໋າຮຸ່ງ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສສ ຫວຽດນາມ ປະຈຳລາວ ໄດ້ປາຖະກະຖາ ໂດຍໄດ້ຍົກໃຫ້ເຫັນຜົນສຳເລັດຂອງພັກກອມມູນິດຫວຽດນາມໃນການສ້າງສັງຄົມນິຍົມ ເປັນຕົ້ນພາຍຫຼັງ 35 ກວ່າປີ ແຫ່ງການປ່ຽນແປງໃໝ່ ໂດຍສະເພາະກ່ຽວກັບການພັດທະນາເສດຖະກິດ-ສັງຄົມ ຈາກພື້ນຖານເສດຖະກິດໜຶ່ງທີ່ທຸກຍາກ, ຫຼ້າຫຼັງ, ຖືກທັບມ້າງທຳລາຍດ້ວຍສົງຄາມ, ການລວມສູນ, ເກື້ອກູນ, ຫວຽດນາມໄດ້ບືນຕົວກາຍເປັນພື້ນຖານເສດຖະກິດໜຶ່ງທີ່ມີລາຍຮັບປານກາງ (2010) ແລະ ພວມມຸ່ງສູ່ຈຸດໝາຍກາຍເປັນປະເທດພວມພັດທະນາທີ່ມີລາຍຮັບປານກາງສູງ, ພື້ນຖານເສດຖະກິດມີການເຕີບໂຕຢ່າງຕໍ່ເນື່ອງດ້ວຍຈັງຫວະສູງພໍສົມຄວນ, ສະເລ່ຍເກືອບ 7%/ປີ. ພິເສດ, ປີ 2022 ບັນລຸລະດັບການເຕີບໂຕທີ່ປະທັບໃຈ 8,02%, ເປັນໂຕເລກສູງກວ່າໝູ່ໃນຮອບ 10 ປີຜ່ານມາ,ກ່ອນການປ່ຽນແປງໃໝ່, ຫວຽດນາມຕ້ອງປະເຊີນຕໍ່ວິກິດການດ້ານເສດຖະກິດ-ສັງຄົມ ທີ່ຜັນແປຢ່າງດຸເດືອດ, ອັດຕາເງິນເຟີ້ບາງໄລຍະຂຶ້ນເຖິງ 774,7%, ແຕ່ວ່າມາເຖິງປັດຈຸບັນ, ຫວຽດນາມສາມາດຮັກສາຄວາມໝັ້ນຄົງເສດຖະກິດມະຫາພາກ, ຮັບປະກັນບັນດາການດຸ່ນດ່ຽງໃຫຍ່ຂອງພື້ນຖານເສດຖະກິດ. ມາເຖິງປັດຈຸບັນ, ທຽບກັບໄລຍະເບື້ອງຕົ້ນຂອງການປ່ຽນແປງໃໝ່ໃນປີ 1986, ຂະໜາດເສດຖະກິດຫວຽດ ນາມເພີ່ມຂຶ້ນ 12 ທົບ, ລາຍຮັບສະເລ່ຍຫົວຄົນເພີ່ມຂຶ້ນ 8,3 ທົບ, ມູນຄ່າການຄ້ານຳເຂົ້າ-ສົ່ງອອກເພີ່ມຂຶ້ນ 29,5 ທົບ, ທຶນລົງທຶນຈາກຕ່າງປະເທດໂດຍກົງເພີ່ມຂຶ້ນ 22 ທົບ. ປັດຈຸບັນ, ຫວຽດນາມຢູ່ໃນກຸ່ມ 40 ປະເທດ ທີ່ມີພື້ນຖານເສດຖະກິດມີຂະໜາດ GDP ໃຫຍ່ກວ່າໝູ່ໃນໂລກ, ໃນກຸ່ມ 20 ພື້ນຖານເສດຖະກິດອັນດັບແຖວໜ້າດ້ານການຄ້າສາກົນ, ຫວຽດນາມໄດ້ກາຍເປັນສະຖານທີ່ໜ້າດຶງດູດຕໍ່ກັບບັນດານັກລົງທຶນຕ່າງປະເທດ, ດ້ວຍທຶນ FDI ທັງໝົດເພີ່ມຈາກ 1,28 ຕື້  (1991) ຂຶ້ນເປັນ 449,5 ຕື້ໂດລາ (2022). ຫວຽດນາມ ຈາກປະເທດໜຶ່ງທີ່ຂາດສະບຽງອາຫານ, ຊີວິດການເປັນຢູ່ຂອງປະຊາຊົນມີຄວາມຫຍຸ້ງຍາກຫຼາຍ, ຫວຽດນາມໄດ້ບືນຕົວກາຍເປັນປະເທດທີ່ມີລາຍຮັບປານກາງດ້ວຍ GDP ສະເລ່ຍ ຫົວຄົນບັນລຸ 4.100 ກວ່າໂດລາ ໃນປີ 2022 ແລະ ຄາດວ່າຈະບັນລຸກວ່າ 4.400 ໂດລາ ໃນປີ 2003. ຫວຽດນາມກໍກາຍເປັນໜຶ່ງໃນບັນດາປະເທດສົ່ງອອກຜະລິດຕະພັນກະສິກຳປະລິມານຫຼາຍ ກວ່າໝູ່ (ສົ່ງອອກເຂົ້າສານໃນປີ 2022 ຢູ່ອັນດັບທີສາມຂອງໂລກ ຖັດຈາກໄທ ແລະ ອິນເດຍ), ບໍ່ພຽງ ແຕ່ມີຄວາມສາມາດຮັບປະກັນຄວາມສະຫງົບດ້ານສະບຽງອາຫານ ຫາກຍັງປະກອບສ່ວນເຂົ້າໃນການ ຮັບປະກັນຄາມສະຫງົບດ້ານສະບຽງອາຫານໃຫ້ແກ່ພາກພື້ນ ແລະ ທົ່ວໂລກຢ່າງຕັ້ງໜ້າ. ອັດຕາຄອບຄົວທຸກຍາກຂອງຫວຽດນາມ ໄດ້ຫຼຸດລົງຢ່າງແຂງແຮງ 58% ໃນປີ 1993 ລົງຍັງ 2,23% ໃນປີ 2021.
ສະຫາຍ ຫງວຽນບ໋າຮຸ່ງ ຍັງໄດ້ຍົກໃຫ້ເຫັນ ກ່ຽວກັບວຽກງານພົວພັນຕ່າງປະເທດ ໂດຍ ສສຫວຽດນາມ ໄດ້ເປີດກວ້າງ, ເລິກເຊິ່ງ ສາຍພົວພັນການທູດກັບທຸກປະເທດບ້ານໃກ້ເຮືອນຄຽງ, ບັນດາປະເທດໃຫຍ່, ບັນດາຄູ່ຮ່ວມມື ແລະ ເພື່ອນມິດເປັນມູນເຊື້ອ. ມາເຖິງປັດຈຸບັນ ຫວຽດນາມ ມີສາຍພົວພັນການທູດກັບ 192 ປະເທດ. ໃນນັ້ນ, ມີ 30 ຄູ່ຮ່ວມມືຍຸດທະສາດ ແລະ ຄູ່ຮ່ວມມືຮອບດ້ານ, ປະກອບດ້ວຍ 5 ປະເທດກຳມະການ ປະຈຳການສະພາຄວາມໝັ້ນຄົງສະຫະປະຊາຊາດ (ລ້ວນແລ້ວແຕ່ຢູ່ໃນລະດັບຄູ່ຮ່ວມມືຍຸດທະສາດຂຶ້ນໄປ), G7 ແລະ 17/20 ພື້ນຖານເສດຖະກິດຂະໜາດໃຫຍ່ກວ່າໝູ່ໃນໂລກ, ຫວຽດນາມ ກໍແມ່ນສະມາຊິກຂອງ 70 ກວ່າອົງການ, ເວທີສາກົນສຳຄັນເຊັ່ນ: ສະຫະປະຊາຊາດ ASEAN, APEC, ASEM, WTO ແລະ ອື່ນໆ. ໃນນັ້ນ, ພັກກອມມູນິດຫວຽດນາມມີສາຍພົວພັນກັບ 247 ພັກການເມືອງ ຢູ່ 111 ປະເທດ, ປະກອບດ້ວຍ 90 ພັກກອມມູນິດ ແລະ ກຳມະກອນສາກົນ, ບັນດາພັກກຳອຳນາດ ແລະ ເຂົ້າຮ່ວມເວທີການເມືອງ. ສະພາແຫ່ງຊາດມີສາຍພົວພັນກັບສະພາແຫ່ງ           ຊາດ, ລັດຖະສະພາຂອງ 140 ກວ່າປະເທດ ແລະ ເຂົ້າຮ່ວມຫຼາຍເວທີລັດຖະສະພາຫຼາຍຝ່າຍສຳຄັນຢ່າງຕັ້ງໜ້າ.
ໃນການປະຖະກະຖາຄັ້ງນີ້, ບັນດາຜູ້ເຂົ້າຮ່ວມໄດ້ຮັບຮູ້ເຖິງຜົນສຳເລັດອັນຍິ່ງໃຫຍ່ໃນການພັດທະ ນາປະເທດຊາດຂອງ ສສ ຫວຽດນາມ ເພື່ອກ້າວຂຶ້ນສູ່ສັງຄົມນິຍົມໂດຍພາຍໃຕ້ການນຳພາຂອງພັກກອມມູນິດຫວຽດນາມ ແລະ ວຽກງານການຕ່າງປະເທດທີ່ພົ້ນເດັ່ນໃນປັດຈຸບັນ ຊຶ່ງເປັນຂໍ້ມູນຂ່າວສານອັນໃໝ່ ໃຫ້ແກ້ຜູ້ເຂົ້າຮ່ວມໄດ້ນຳເອົາໄປຄົ້ນຄ້ວາ, ເປັນບົດຮຽນໃນການນຳພາຈັດຕັ້ງປະຕິບັດວຽກງານຕົວຈິງທີ່ຕົນຮັບຜິດຊອບ.
(ຂ່າວ-ພາບ: ສຳນານ)