ກະຊວງປ້ອງກັນປະເທດ ແລະ ສະມາຄົມມິດຕະພາບລາວ-ສປປ ເກົາຫຼີ ຮ່ວມກັບສະຖານເອກອັກຄະລັດ ຖະທູດແຫ່ງ ສປປ ເກົາຫຼີ ປະຈຳ ສປປ ລາວ ໄດ້ຈັດພິທີປາຖະກະຖາເລົ່າມູນເຊື້ອວັນສ້າງຕັ້ງພັກແຮງງານເກົາຫຼີ ຄົບຮອບ 78 ປີ (10/10/1945-10/10/2003) ຂຶ້ນໃນວັນທີ 6 ຕຸລາ ນີ້ ທີ່ກະຊວງປ້ອງກັນປະເທດ. ໃຫ້ກຽດເຂົ້າຮ່ວມມີ ສະຫາຍນາງ ວິລະວອນ ພັນທະວົງ ຮອງຫົວໜ້າຄະນະໂຄສະນາອົບຮົມສູນກາງພັກ ຮອງປະທານສະມາຄົມມິດຕະພາບລາວ - ສປປ ເກົາຫຼີ, ມີສະຫາຍ ວາລະໄຊ ເລັ່ງສະຫວັດ ຮອງຫົວໜ້າຄະນະພົວພັນຕ່າງ ປະເທດສູນກາງພັກ, ສະຫາຍ ລີ ຢົງ ຊົນ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ເກົາຫຼີ ປະຈຳ ສປປ ລາວ; ສະຫາຍ ພົນຕີ ສາຍໃຈ ກົມມະສິດ ຫົວໜ້າຫ້ອງວ່າການກະຊວງປ້ອງກັນປະເທດ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ສະຫາຍ ລີ ຢົງ ຊົນ ໄດ້ຍົກໃຫ້ເຫັນບົດບາດການນຳພາຂອງພັກແຮງງານເກົາຫຼີ ໃນໄລຍະຕໍ່ສູ້ກູ້ຊາດອັນມີສະຫາຍ ກິມອິນຊຸງ, ສະຫາຍ ກິມເຈິງອິນ ຜູ້ນໍາທີ່ຍິ່ງໃຫຍ່ ແລະ ສະຫາຍ ກິມ ເຈິງອູນ ຜູ້ນຳທີ່ເຄົາລົບຮັກ ເລຂາທິການໃຫຍ່ພັກແຮງງານເກົາຫຼີ ປະທານກິດຈະການແຫ່ງລັດແຫ່ງ ສປປ ເກົາຫຼີ ຜູ້ບັນຊາການສູງສຸດກໍາລັງປະກອບອາວຸດແຫ່ງ ສປປ ເກົາຫຼີ ຜູ້ສືບທອດພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ເຮັດໃຫ້ ສປປ ເກົາຫຼີ ມີສະຖຽນລະພາບໜັກແໜ້ນ, ວຽກງານປ້ອງກັນຊາດ-ປ້ອງກັນຄວາມສະຫງົບມີຄວາມເຂັ້ມ ແຂງ ແລະ ທັນສະໄໝ, ເສດຖະກິດມີການພັດທະນາ, ຊີວິດການເປັນຢູ່ຂອງປະຊາຊົນ ສປປ ເກົາຫຼີ ໄດ້ຮັບການປັບປຸງດີຂຶ້ນເລື້ອຍໆ.
ພ້ອມດຽວກັນນີ້ ຍັງໄດ້ຕີລາຄາສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ ແລະ ສປປ ເກົາຫຼີ ສືບຕໍ່ໄດ້ຮັບການເສີມຂະຫຍາຍເພີ່ມພູນຄູນສ້າງ ປະກອບສ່ວນເຂົ້າໃນພະລາກິດເສີມສ້າງສັນຕິພາບ, ມິດຕະພາບ ແລະ ການຮ່ວມມືໃນຂົງເຂດ ແລະ ໃນໂລກ. ນອກຈາກຮັບຟັງປາຖະກະຖາ ຜູ້ເຂົ້າຮ່ວມຍັງໄດ້ຊົມການວາງສະແດງຮູບພາບ, ສາຍວິດີໂອ, ສະແດງສີລະປະ-ວັນນະຄະດີຢ່າງຄຶກຄື້ນຂອງ ສປປ ເກົາຫຼີ ແລະ ສິລະປະກອນກອງທັບປະຊາຊົນລາວເຮັດໃຫ້ພິທີມີເນື້ອໃນເລິກເຊິ່ງ ແລະ ມີບັນຍາກາດເບີກບານມ່ວນຊື່ນ.
ຂ່າວ-ພາບ: ບຸນຕອມ
ຄໍາເຫັນ