ມີຄະນະພັກ-ຄະນະບັນຊາກ່ຽວຂ້ອງເຂົ້າຮ່ວມ.
ສະຫາຍ ພັນເອກ ຈະເລີນສຸກ ວັງເວີນໂຂງ ໄດ້ຍົກໃຫ້ເຫັນຕົ້ນກຳເນີດການເຕີບໃຫຍ່ຂະຫຍາຍຕົວຂອງໂທລະພາບກອງທັບໃນແຕ່ລະໄລຍະນັບແຕ່ໃນປີ 1996-2000 ໂທລະພາບກອງທັບໄດ້ປະຕິບັດພາລະບົດບາດ, ໜ້າທີ່ຂອງຕົນຢ່າງຕັ້ງໜ້າ ແລະ ຄຽງບ່າຄຽງໄຫຼ່ກັບວິທະຍຸກະຈາຍສຽງກອງທັບ ປະຕິບັດໜ້າທີ່ຢ່າງເປັນປົກກະຕິຕະຫຼອດມາໂດຍສຸມໃສ່ປະຕິບັດມະຕິຄຳສັ່ງຂອງກະຊວງປ້ອງກັນປະເທດ ກໍຄືກົມໃຫຍ່ການເມືອງກອງທັບວາງອອກໃນການໂຄສະນາປຸກລະດົມບັນດາກຳລັງປະກອບອາວຸດປະຕິບັດ 2 ໜ້າທີ່ຍຸດທະສາດຂອງພັກຄື: ປົກປັກຮັກສາ ແລະ ພັດທະນາປະເທດຊາດ, ໃນການນຳເອົາພາບແຫ່ງການເຄື່ອນໄຫວປະຕິບັດໜ້າທີ່ຕົວຈິງຂອງບັນດາກົມກອງໃນທົ່ວກອງທັບມາຈັດເຂົ້າໃນລາຍການອອກອາກາດ ພ້ອມກັນນັ້ນໄດ້ໂຄສະນາເຜີຍແຜ່ແນວທາງນະໂຍບາຍ, ທິດທາງໜ້າທີ່ວຽກງານທີ່ພັກ-ລັດວາງອອກ.ໄລຍະຕໍ່ມາ ກະຊວງປ້ອງກັນປະເທດ ແລະ ກົມໃຫຍ່ການເມືອງກອງທັບໄດ້ມີຂໍ້ຕົກລົງໃຫ້ມີພະແນກໂທລະພາບຂອງກອງທັບ ແລະ ໂຮມເຂົ້າກັບວິທະຍຸກະຈາຍສຽງກອງທັບ. ຈາກນັ້ນ, ກໍໄດ້ເພີ່ມທະວີຄວາມຮັບຜິດຊອບໜ້າທີ່ວຽກງານໂຄສະນາຂອງຕົນຂຶ້ນອີກກ້າວໜຶ່ງ ແລະ ໄດ້ຈັດຕັ້ງລາຍການອອກໂທລະພາບທາງຊ່ອງ 3 ຕື່ມອີກ ໂດຍກໍານົດເອົາທຸກໆວັນພະຫັດ, ກຳນົດເວລາ 30 ນາທີ. ກ້າວເຂົ້າໄລຍະໃໝ່ແຫ່ງການພັດທະນາປະເທດຊາດດ້ວຍຄວາມເອົາໃຈໃສ່ຂອງກົມໂຄສະນາອົບຮົມ, ຄວາມຮຽກຮ້ອງຕ້ອງການຂອງວຽກງານຂ່າວສານ, ໂຄສະນາຍິ່ງມີຄວາມຈໍາເປັນສູງ. ຍ້ອນແນວນັ້ນ, ໂທລະພາບກອງທັບຈຶ່ງໄດ້ຮັບການປັບປຸງປະກອບພາຫະນະທີ່ທັນສະໄໝຂຶ້ນກວ່າເກົ່າ ແລະ ຈໍານວນພະນັກງານວິຊາການກໍເພີ່ມຂຶ້ນເຮັດໃຫ້ລາຍການໂທລະພາບມີຄວາມອຸດົມສົມບູນ ນັບມື້ໄດ້ຮັບຄວາມນິຍົມຈາກຜູ້ຊົມ ແລະ ສັງຄົມເປັນຢ່າງດີ. ໂດຍເຫັນໄດ້ການເຕີບໃຫຍ່ຂະຫຍາຍຕົວຂອງວຽກງານໂຄສະນາ, ຂ່າວສານໃນກອງທັບ ມາໃນປີ 2018-2019 ກະຊວງປ້ອງກັນປະເທດໄດ້ຕົກລົງສ້າງຕຶກໂທລະພາບກອງທັບ, ມາໃນວັນທີ 9 ກັນຍາ 2020 ໄດ້ຈັດພິທີເປີດສະຖານີໂທລະພາບກອງທັບປະຊາຊົນລາວຢ່າງເປັນທາງການ, ມາຮອດວັນທີ 29 ມັງກອນ 2020 ກະຊວງປ້ອງກັນປະເທດໄດ້ຕົກລົງແຍກກອງວິທະຍຸ, ໂທລະພາບກອງທັບອອກເປັນ 2 ກົມກອງຄື: ກອງວິທະຍຸກະຈາຍສຽງກອງທັບ, ໂທລະພາບກອງທັບທີ່ຂຶ້ນກັບກົມໃຫຍ່ການເມືອງກອງທັບ ພ້ອມທັງປະກາດລະບົບການຈັດຕັ້ງຄົບຊຸດຂອງກອງໂທລະພາບກອງທັບ.
ສະຫາຍ ພັກເອກ ຈະເລີນສຸກ ວັງເວີນໂຂງ ໃຫ້ຮູ້ຕື່ມວ່າ: ຕະຫຼອດໄລຍະການສ້າງຕັ້ງສະຖານີໂທລະພາບກອງທັບຜ່ານມາ, ຄະນະພັກ-ຄະນະບັນຊາໄດ້ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ພະນັກງານ-ນັກຮົບເຊື່ອມຊຶມ, ກຳແໜ້ນແນວທາງຂອງພັກ, ຂອງລັດຂໍ້ກຳນົດກົດລະບຽບຂອງກອງທັບ ແລະ ປະຕິບັດຈັນຍາບັນສື່ມວນຊົນ, ວ່ອງໄວທັນການ, ທ່ຽງທຳ, ຊັດເຈນຖືກຕ້ອງ, ປັບປຸງບັນດາລາຍການຕ່າງໆໃຫ້ມີສີສັນ ແລະ ເນື້ອໃນອຸດົມສົມບູນຂຶ້ນ. ພ້ອມກັນນັ້ນພະນັກງານ-ນັກຮົບທຸກຄົນໄດ້ປະຕິບັດໜ້າທີ່ຂອງຕົນຢ່າງບໍ່ຮູ້ອິດບໍ່ຮູ້ເມື່ອຍ ໄດ້ເຂົ້າຮັບໃຊ້ກອງປະຊຸມສໍາຄັນຕ່າງໆຂອງຊາດ, ເຂົ້າຮ່ວມພິທີຊ້ອມຮົບຕ່າງໆຂອງຊາດ ແລະ ບັນດາປະເທດເພື່ອນມິດຕ່າງໆ. ທັງໝົດນັ້ນແມ່ນຜົນສໍາເລັດຂອງພະນັກງານ-ນັກຮົບຂອງກອງໂທລະພາບກອງທັບປະຊາຊົນລາວ ເຖິງວ່າຈະຜ່ານໄປບໍ່ດົນເທົ່າໃດແຕ່ມັນແມ່ນຄວາມບຸກບືນສູ້ຊົນຢ່າງແຂງແຮງຂອງຄະນະພັກ-ຄະນະບັນຊາ, ພະນັກງານ-ນັກຮົບກອງໂທລະພາບກອງທັບປະຊາຊົນລາວ. ຂ່າວ-ພາບ: ບິກໄຊ
ຄໍາເຫັນ