ປະທານປະເທດ ຕ້ອນຮັບ ປະທານທະນາຄານ ພັດທະນາອາຊີ ເຂົ້າຢ້ຽມຂໍ່ານັບ

ໃນໂອກາດດັ່ງກ່າວ, ທ່ານປະທານປະເທດ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນຕໍ່ການເດີນທາງມາຢ້ຽມຢາມ ສປປ ລາວ ຄັ້ງນີ້ຂອງ ທ່ານ ມະຊະໂຕະ ຄັນດະ ຊຶ່ງເປັນຄັ້ງທໍາອິດນັບແຕ່ໄດ້ຮັບການແຕ່ງຕັ້ງເປັນປະທານ ADB ພ້ອມທັງໄດ້ສະແດງຄວາມຊົມເຊີຍຕໍ່ຜົນສໍາເລັດ ແລະ ບົດບາດອັນສໍາຄັນຂອງທ່ານ ມະຊະໂຕະ ຄັນດະ ໃນການຊີ້ນໍາ-ນໍາພາ ADB ໃຫ້ມີບົດບາດສູງຂຶ້ນ ໃນການຊຸກຍູ້ການພັດທະນາພາກພື້ນອາຊີ-ປາຊີຟິກ ກໍຄືບັນດາປະເທດສະມາຊິກຂອງ ADB ລວມທັງ ສປປ ລາວ ຕະຫຼອດໄລຍະຜ່ານມາ. ທ່ານ ທອງລຸນ ສີສຸລິດ ກ່າວວ່າ: ສປປ ລາວ ຍາມໃດກໍຖືວ່າ ADB ເປັນຄູ່ຮ່ວມມືເພື່ອການພັດທະນາທີ່ສໍາຄັນຍິ່ງຂອງ ສປປ ລາວ ແລະ ສະແດງຄວາມຊົມເຊີຍທີ່ສອງຝ່າຍຈະຮ່ວມກັນສະເຫຼີມສະຫຼອງການເປັນຄູ່ຮ່ວມມືຄົບຮອບ 60 ປີ ອັນມີຄວາມໝາຍສໍາຄັນດັ່ງກ່າວ ພ້ອມທັງໄດ້ຕາງໜ້າໃຫ້ພັກ, ລັດຖະບານ ແລະ ປະຊາຊົນລາວບັນດາເຜົ່າ ສະແດງຄວາມຂອບໃຈ ຕໍ່ການເປັນຄູ່ຮ່ວມມືທີ່ດີຂອງ ADB ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອ ສປປ ລາວ ໃນຫຼາຍດ້ານ ໂດຍສະເພາະແມ່ນການພັດທະນາເສດຖະກິດ-ສັງຄົມ ລວມທັງໃນໄລຍະທີ່ປະເຊີນກັບຄວາມຫຍຸ້ງຍາກ ແລະ ວິກິດການ ຊຶ່ງເປັນການປະກອບສ່ວນອັນສໍາຄັນ ເຂົ້າໃນການສ້າງສະຖຽນລະພາບທາງດ້ານເສດຖະກິດ-ສັງຄົມ ກໍຄື ການຍົກລະດັບຊີວິດການເປັນຢູ່ຂອງປະຊາຊົນລາວໃຫ້ດີຂຶ້ນ. ພ້ອມດຽວກັນນັ້ນ, ທ່ານປະທານປະເທດ ຍັງໄດ້ຍົກໃຫ້ເຫັນ ເປົ້າໝາຍການພັດທະນາທີ່ສໍາຄັນທີ່ເປັນທິດນໍາ ແລະ ແຜນນະໂຍບາຍຍຸດທະສາດໃນການພັດທະນາ ສປປ ລາວ ໃຫ້ຂະຫຍາຍຕົວຢ່າງຕໍ່ເນື່ອງໃນຕໍ່ໜ້າ ທ່າມກາງສະພາບການຂອງໂລກ ກໍາລັງມີການຜັນແປໄປຢ່າງໄວວາ, ສະຫຼັບສັບຊ້ອນ ແລະ ຄາດຄະເນໄດ້ຍາກ ພ້ອມທັງໄດ້ສະແດງຄວາມເຊື່ອໝັ້ນວ່າ ພາຍໃຕ້ການຊີ້ນໍາຂອງ ທ່ານ ມະຊະໂຕະ ຄັນດະ, ADB ຈະສືບຕໍ່ໃຫ້ການສະໜັບສະໜູນ ເປົ້າໝາຍການພັດທະນາຂອງ ສປປ ລາວ ໃນສັງກາດໃໝ່ນີ້ ໃຫ້ສາມາດບັນລຸຜົນສໍາເລັດຕາມຄາດໝາຍ.
ໃນໂອກາດດຽວກັນນີ້, ທ່ານ ມະຊະໂຕະ ຄັນດະ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນໃນຄັ້ງນີ້ ແລະ ສະແດງຄວາມຊົມເຊີຍຕໍ່ຜົນສໍາເລັດຂອງການເປັນຄູ່ຮ່ວມມື ລະຫວ່າງ ສປປ ລາວ ແລະ ADB ຕະຫຼອດໄລຍະ 60 ປີຜ່ານມາ ພ້ອມທັງໄດ້ສະແດງຄວາມໝາຍໝັ້ນວ່າຈະສືບຕໍ່ໃຫ້ການສະໜັບສະໜູນ ສປປ ລາວ ໃນການພັດທະນາເສດຖະກິດ-ສັງຄົມ ໃນສັງກາດໃໝ່ໃຫ້ມີປະສິດທິຜົນຍິ່ງໆຂຶ້ນ.
ຂ່າວ: ກະຊວງການຕ່າງປະເທດ, ພາບ: ພູວຽງຄຳ