ໃນໄລຍະຜ່ານມາ, ຫຼາຍກະຊວງ, ກົມກອງ ແລະ ທ້ອງຖິ່ນຕ່າງໆໃນຂອບເຂດທົ່ວປະເທດໄດ້ຕັ້ງໜ້າຈັດຕັ້ງປະຕິບັດຜັນຂະຫຍາຍຂໍ້ຕົກລົງ ວ່າດ້ວຍການສະສາງລົດຂອງລັດ ສະບັບເລກທີ 169/ນຍ ໄດ້ຮັບຜົນດີພໍສົມຄວນ. ແຕ່ຖ້າທຽບໃສ່ ຄວາມຮຽກຮ້ອງຕ້ອງການຂອງວຽກງານ ແລະ ລະດັບຄາດໝາຍແລ້ວ ຍັງມີບາງກະຊວງ, ກົມກອງ ແລະ ທ້ອງຖິ່ນຈໍານວນໜຶ່ງ ຍັງບໍ່ທັນສໍາເລັດ ມີລັກສະນະຊັກຊ້າ. ຫ້ອງວ່າການສໍານັກງານນາຍົກລັດຖະມົນຕີ ຈຶ່ງອອກແຈ້ງການເລກທີ 478/ນະຄອນຫຼວງວຽງຈັນ, ວັນທີ 21 ມີນາ 2025 ໃຫ້ສືບຕໍ່ເກັບກໍາຂໍ້ມູນສະຖິຕິລົດຂອງລັດ ເຂົ້າໃນລະບົບຄຸ້ມຄອງຂໍ້ມູນຊັບສິນຂອງລັດ ໃຫ້ຄົບຖ້ວນ ໂດຍສະເພາະແມ່ນລົດທີ່ຢູ່ຂັ້ນທ້ອງຖິ່ນ, ບັນດາເມືອງ ທີ່ຍັງບໍ່ໄດ້ຂໍ້ມູນເລກຈັກ, ເລກຖັງບໍ່ຄົບຖ້ວນ ແລະ ໃຫ້ສືບຕໍ່ຕິດແຜ່ນກາໝາຍນໍາໃຊ້ລົດຂອງລັດ QR Code ໃຫ້ສໍາເລັດ; ມອບສິດໃຫ້ກະຊວງການເງິນ ສົມທົບກັບກະຊວງປ້ອງກັນຄວາມສະຫງົບ ແລະ ພາກສ່ວນກ່ຽວຂ້ອງ ເພື່ອກວດກາການນໍາໃຊ້ລົດຂອງລັດ (ປ້າຍສີຟ້າ) ໃຫ້ນໍາໃຊ້ຖືກຕ້ອງ ຕາມກົດໝາຍ ແລະ ລະບຽບການ, ການນໍາໃຊ້ໃຫ້ຖືກຕ້ອງຕາມເປົ້າໝາຍທາງລັດຖະການ; 2). ກວດກາລົດທີ່ບໍ່ມີ QR Code, ກໍລະນີພົບເຫັນລົດທີ່ບໍ່ມີ QR Code ໃຫ້ເຈົ້າໜ້າທີ່ຢຶດລົດຄັນດັ່ງກ່າວ ແລະ ດໍາເນີນຕາມກົດໝາຍ ແລະ ລະບຽບການ, ກໍລະນີ ແມ່ນພະນັກງານບໍານານນໍາໃຊ້ ເທື່ອທີ 1 ໃຫ້ແນະນໍາຕັກເຕືອນ, ເທື່ອທີ 2 ໃຫ້ປັບໃໝ ແລະ ເທື່ອທີ 3 ໃຫ້ຖອນຄືນລົດຄັນດັ່ງກ່າວ; ລົດບຸກຄົນ ຫຼື ນິຕິບຸກຄົນ ທີ່ໃສ່ທະບຽນປ້າຍລົດລັດບໍລິຫານ (ປ້າຍສີຟ້າ) ຊຶ່ງບໍ່ໄດ້ນໍາໃຊ້ເຂົ້າໃນວຽກງານລວມຂອງລັດ ໃຫ້ຢຶດ ແລະ ດໍາເນີນຕາມກົດໝາຍ ແລະ ລະບຽບການ; ມອບໃຫ້ກະຊວງການເງິນ ແລະ ກະຊວງປ້ອງກັນຄວາມສະຫງົບ ອອກລະບຽບການເປັນອັນລະອຽດໃນການກວດກາ, ພ້ອມທັງກໍານົດເວລາໃນການກວດກາໃຫ້ຊັດເຈນ.
ໃນແຈ້ງການຍັງລະບຸວ່າ: ໃຫ້ບັນດາກະຊວງ, ອົງການລັດທຽບເທົ່າກະຊວງ ແລະ ອົງການປົກຄອງທ້ອງຖິ່ນ ໃນຂອບເຂດທົ່ວປະເທດ ຈັດສັນດຸ່ນດ່ຽງການນໍາໃຊ້ລົດຂອງລັດ ຕາມດໍາລັດ ສະບັບເລກທີ 599/ລບ, ລົງວັນທີ 29 ກັນຍາ 2021 ໃຫ້ສໍາເລັດກ່ອນເດືອນມິຖຸນາ 2025. ຈາກນັ້ນ, ໃຫ້ຫ້ອງວ່າການສໍານັກງານນາຍົກລັດຖະມົນຕີ ສົມທົບກັບກະຊວງການເງິນ ແລະ ພາກສ່ວນກ່ຽວຂ້ອງ ແຕ່ງຕັ້ງຄະນະຮັບຜິດຊອບ ຊີ້ນໍາການຈັດຕັ້ງປະຕິບັດ, ຖ້າເຫັນວ່າ ພາກສ່ວນໃດທີ່ມີພາຫະນະຫຼາຍເກີນກວ່າທີ່ກໍານົດແມ່ນໃຫ້ຖອນຄືນ ເພື່ອຈັດສັນ, ດຸ່ນດ່ຽງ ໃຫ້ພາກສ່ວນທີ່ຍັງຂາດເຂີນ; ມອບໃຫ້ກະຊວງພາຍໃນຄົ້ນຄວ້າ ແລະ ພິຈາລະນາ ຍ້ອງຍໍບຸກຄົນ, ຄະນະທີ່ຮັບຜິດຊອບໃນການຄົ້ນຄວ້າ ແລະ ຈັດຕັ້ງປະຕິບັດ ດໍາລັດ ວ່າດ້ວຍລົດຂອງລັດ ສະບັບເລກທີ 599/ລບ, ລົງວັນທີ 29 ກັນຍາ 2021 ແລະ ຂໍ້ຕົກລົງ ວ່າດ້ວຍການສະສາງລົດຂອງລັດ ສະບັບເລກທີ 169/ນຍ, ລົງວັນທີ 28 ທັນວາ 2023 ຢູ່ຂັ້ນສູນກາງ ຕາມການສະເໜີຂອງກະຊວງການເງິນ; ໃຫ້ກະຊວງການເງິນ ເອົາໃຈໃສ່ໃນການຈັດສັນແຜນງົບປະມານ ໃນການຊື້ລົດການນໍາຂັ້ນສູງ ແລະ ລົດຮັບໃຊ້ວຽກງານບໍລິຫານໃຫ້ໄດ້ຕາມແຜນການ; ກະຊວງການເງິນ ໃນນາມຮັບຜິດຊອບກອງເລຂາ ສ້າງແຜນການດໍາເນີນງານເປັນອັນລະອຽດ, ພ້ອມທັງສົມທົບກັບຫ້ອງວ່າການສໍານັກງານນາຍົກລັດຖະມົນຕີຂຶ້ນແຜນງົບປະມານ ໃນການເຄື່ອນໄຫວວຽກງານຂອງຄະນະຮັບຜິດ ຊອບແຕ່ລະໜ້າວຽກ ໂດຍໃຫ້ມີຈຸດສຸມລະອຽດຄື: ມອບໃຫ້ຄະນະຮັບຜິດຊອບກວດກາຄືນລົດຂອງໂຄງການທີ່ນໍາໃຊ້ທຶນກູ້ຢືມ ແລະ ຊ່ວຍເຫຼືອຢູ່ບັນດາກະຊວງ, ອົງການລັດທຽບເທົ່າກະຊວງ ແລະ ອົງການປົກຄອງທ້ອງຖິ່ນ ໃນຂອບເຂດທົ່ວປະເທດທີ່ໄດ້ເອົາໄປໃສ່ປ້າຍເອກະຊົນ ແລະ ປ້າຍວິສາຫະກິດ ທີ່ເຫັນວ່າບໍ່ຖືກຕ້ອງຕາມກົດໝາຍ; ປະຕິບັດມາດຕະການໃນການຄຸ້ມຄອງ, ປົກປັກຮັກສາລົດຂອງລັດໃຫ້ຖືກຕ້ອງຕາມເຕັກນິກ ໃຫ້ແຕ່ລະພາກສ່ວນກໍານົດບ່ອນຈອດລົດຂອງລັດ ໄວ້ສໍານັກງານຫ້ອງການຂອງຕົນ, ພາຍຫຼັງນໍາໃຊ້ໃນວຽກງານທາງລັດຖະການແລ້ວ, ຫ້າມບຸກຄົນເອົາລົດຂອງລັດເມືອເຮືອນ ຫຼື ໃຊ້ທຽວການ ໂດຍບໍ່ຖືກຕ້ອງ ນອກຈາກລົດປະຈໍາຕໍາແໜ່ງການນໍາລະດັບສູງ; ສ່ວນເມືອງທີ່ຢູ່ຫ່າງໄກສອກຫຼີກ, ທຸລະກັນດານ ມອບໃຫ້ເປັນການຄົ້ນຄວ້າຕົກລົງຂອງ ທ່ານເຈົ້າແຂວງ ເປັນກໍລະນີສະເພາະ ຕາມຄວາມເໝາະສົມ; ພ້ອມທັງໃຫ້ມີມາດຕະການຢ່າງເຂັ້ມງວດຕໍ່ບຸກຄົນທີ່ມີພຶດຕິກໍາຕ້ານການຈັດຕັ້ງ ຫຼື ລະເມີດລະບຽບການນໍາໃຊ້ລົດຂອງລັດ ດ້ວຍການສໍາຫຼວດ, ຕັກເຕືອນ ຫຼື ປົດຊັ້ນ-ຂັ້ນ ຕາມແຕ່ລະກໍລະນີໜັກ ຫຼື ເບົາ; ພ້ອມທັງປັບປຸງເງື່ອນໄຂຂອງພະນັກງານບໍານານ ຜູ້ທີ່ຈະໄດ້ຮັບນະໂຍບາຍ ຕາມຂໍ້ຕົກລົງ ສະບັບເລກທີ 169/ນຍ ທີ່ລະບຸໄວ້ໃນມາດຕາ 4 ຂໍ້ 1 ແມ່ນຜູ້ທີ່ໄດ້ຮັບອຸດໜູນບໍານານ ໃນງວດ III ປີ 2025 ຄືນຫຼັງ ທີ່ໄດ້ນໍາໃຊ້ລົດຂອງລັດຜ່ານມາ. ສໍາລັບການຕີມູນຄ່າການຄິດໄລ່ຄ່າຫຼຸ້ຍຫ້ຽນ ແມ່ນໃຫ້ທຽບຖານເອົາປີ 2024 ຄືກັບຜູ້ທີ່ໄດ້ປະຕິບັດຜ່ານມາແລ້ວ. ບຸກຄົນໃດທີ່ໄດ້ຮັບຂໍ້ຕົກລົງສະສາງແລ້ວໃຫ້ຮີບຮ້ອນຕີລາຄາ ແລະ ໃຫ້ມອບເງິນເຂົ້າງົບປະມານໃຫ້ຄົບຖ້ວນ, ໃນກໍລະນີຜູ້ທີ່ບໍ່ສາມາດຊໍາລະໄດ້ແມ່ນໃຫ້ຖອນລົດຄັນດັ່ງກ່າວຄືນ ເພື່ອຈັດສັນການນໍາໃຊ້ ຄືນໃໝ່.
ຄໍາເຫັນ