 |
ທ່ານ ຂັນທອງ ສີປະເສີດ ຮອງປະທານສະມາຄົມທຸລະກິດກະສິກໍາລາວ ໃຫ້ສໍາພາດຕໍ່ຜູ້ສື່ຂ່າວ ທີ່ສະພາການຄ້າ ແລະ ອຸດສາຫະກໍາແຫ່ງຊາດ ເມື່ອບໍ່ດົນຜ່ານມານີ້ວ່າ: ສະມາຄົມນັກທຸລະກິດລາວ ເຮັດໜ້າທີ່ ເຕົ້າໂຮມນັກທຸລະກິດ ເຂົ້າຮ່ວມຕ່ອງໂສ້ການຜະລິດທີ່ມີຕະຫຼາດຮອງຮັບ, ກຸ່ມຜູ້ຜະລິດ ໄດ້ແກ່: ຟາມລ້ຽງສັດ, ໝູ, ງົວ, ໄກ່, ປາ ຊຶ່ງຈໍານວນຜູ້ຜະລິດສັດ ແມ່ນຕ້ອງການອາຫານສັດ ແລະ ຮັບຊື້ຈໍານວນຫຼາຍ ຄື: ສາລີ, ມັນຕົ້ນ, ເຂົ້າ, ຮໍາ. ຈຶ່ງຂໍເຊີນຊວນບັນດາຜູ້ປະກອບການ, ຊາວກະສິກອນ ທີ່ມີ ດິນ, ແຮງງານ, ທ່າແຮງ, ມູນເຊື້ອດຸໝັ່ນ ໃນການປູກ-ການລ້ຽງ ເຂົ້າຮ່ວມຜະລິດ ເປັນການຄໍ້າປະກັນການຂາຍທີ່ມີຕະຫຼາດຮອງຮັບ ໃຫ້ກັບຜູ້ຜະລິດ, ຈະເກັບຊື້ຜົນຜະລິດທັງໝົດ ໃນລາຄາຕາມທ້ອງຕະຫຼາດ; ຖ້າຫາກວ່າ ຜູ້ປະກອບການ ມີຄວາມຕ້ອງການລ້ຽງສັດ ກໍມີຜູ້ສະໜອງແນວພັນສັດ, ພືດຕ່າງໆ ພ້ອມທັງແນະນໍາເຕັກນິກ,ວິທີລ້ຽງ-ປູກ, ປຸຍ, ກົນຈັກໜັກ ພ້ອມດ້ວຍຕົ້ນທຶນ. ເພື່ອໃຫ້ໄດ້ຮັບຜົນດີ ແບບຕົ້ນທຶນຕໍ່າ ແຕ່ຜົນຜະລິດສູງ; ຖ້າຫາກວ່າ ທ່ານໃດຫາກມີຄວາມສົນໃຈ ສະມາຄົມທຸລະກິດກະສິກໍາລາວ ພ້ອມເປີດຮັບສະໝັກເຂົ້າເປັນສະມາຊິກ ແຕ່ວ່າ ຕ້ອງແມ່ນຜູ້ທີ່ມີຄວາມດຸໝັ່ນເຮັດແທ້ທໍາຈິງມາກ່ອນ ກົງກັນຂ້າມ ຜູ້ທີ່ບໍ່ມີປະສົບການ ແມ່ນຈະມີຄໍາແນະນໍາໃຫ້ ເພື່ອໄປຮຽນຮູ້-ຝຶກ ແລະ ທົດລອງ ໃຫ້ເປັນສາກ່ອນແລ້ວຈຶ່ງລົງມືເຮັດ. ຜູ້ປະກອບການ(ຝ່າຍຜະລິດ) ສາມາດປູກພາຍໃນປະເທດ ຈະມີຄວາມສະດວກຫຼາຍ ແລະ ຈະບໍ່ເສຍຄ່າຂົນສົ່ງ. ຄຽງຄູ່ກັັນນັ້ນ ຖ້າວ່າ ທຶນບໍ່ພຽງພໍ ກໍສາມາດເຮັດໃບສັນຍາຄໍ້າປະກັນໃຫ້, ການໃຊ້ຈ່າຍເງິນ ແມ່ນຜ່ານບັນຊີ ລະບົບໂອນທາງທະນາຄານ.
ທ່ານ ບຸນຊອບ ຟອງສະນິດ ຮອງຜູ້ອໍານວຍການທະນາຄານນະໂຍບາຍ ໃຫ້ສໍາພາດ ວ່າ: ດີໃຈທີ່ໄດ້ຮ່ວມມື ກັບສະມາຄົມທຸລະກິດກະສິກໍາລາວ, ສະພາການຄ້າ ແລະ ອຸດສາຫະກໍາແຫ່ງຊາດ ພາຍໃຕ້ໂຄງການ: “ສົ່ງເສີມກະສິກໍາລາວ ໃຫ້ມີຄວາມເຂັ້ມແຂງ” ຍ້ອນເຫັນໄດ້ຄວາມສໍາຄັນ ຂອງທຸລະກິດກະສິກໍາລາວ ເພື່ອແກ້ໄຂບັນຫາຂໍ້ຫຍຸ້ງຍາກ ດ້ານການເງິນ-ເງິນຕາ ຕິດພັນກັບວຽກງານການຜະລິດ ເປັນສິນຄ້າ ທົດແທນການນໍາເຂົ້າ, ສົ່ງເສີມໃຫ້ທຸລະກິດດັ່ງກ່າວ ເຂັ້ມແຂງ, ມີຜູ້ຜະລິດ-ຜູ້ສະໜອງ-ຜູ້ຊົມໃຊ້ ຕ່າງກໍໄດ້ຮັບຜົນປະໂຫຍດ. ສະນັ້ນ ໃນໂອກາດອັນໃກ້ໆນີ້ ຈະໄດ້ຫັນປ່ຽນ ຈາກ ທະນາຄານພັດທະນາກະສິກໍາ ມາເປັນ ທະນາຄານພັດທະນາຊົນນະບົດ ເພື່ອມີຄວາມມຸ່ງຫວັງ ພັດທະນາຊຸກຍູ້ວຽກງານກະສິກໍາ ເພື່ອຄໍ້າປະກັນ ຊີວິດການເປັນຢູ່ຂອງສັງຄົມ. ທ່ານ ບຸນຊອບ ຟອງສະນິດ ກ່າວຕື່ມ ວ່າ: ຄວາມຄິດຂ້າພະເຈົ້າ ມີຄື: ປະຊາຊົນມີດິນ, ມີແຮງງານ, ສະມາຄົມ ມີຕະຫຼາດ-ເຕັກນິກ, ມີລະບົບຈັດການບໍລິຫານທີ່ດີ, ທະນາຄານມີ ປັດໃຈແຫຼ່ງທຶນ. ໃນນາມສະຖາບັນການເງິນ ກໍຄື ທະນາຄານ ເວລາໃດ ກໍຕ້ອງການຢາກສະໜອງແຫຼ່ງທຶນ ທີ່ຕອບສະໜອງຄວາມຕ້ອງການແທ້ໆ. ຍ້ອນແນວນັ້ນ ການຮ່ວມມືຜະລິດແບບຕ່ອງໂສ້ ຈຶ່ງແມ່ນເປົ້າໝາຍຫຼັກຂອງທະນາຄານ ພາຍໃຕ້ໂຄງການນີ້ ເຊື່ອໝັ້ນວ່າ ພວກເຮົາຈະສົ່ງເສີມສອງສົ້ນ ໝາຍຄວາມວ່າ ຜູ້ເຮັດການຕະຫຼາດ, ຜູ້ຜະລິດຫຼັກ ຈະເປັນຜູ້ສະໜອງເຕັກນິກ-ອອກແບບ ພ້ອມທັງເກັບຊື້, ອອກແບບໃນແຕ່ລະລາຍການ ຂອງສິນຄ້າ. ຄຽງຄູ່ກັນນັ້ນ ເມື່ອສ້າງຕະຫຼາດມາແລ້ວ ຕ້ອງເພີ່ມປະລິມານການຜະລິດ ໃຫ້ສາມາດຕອບສະໜອງກັບຄວາມຮຽກຮ້ອງຕ້ອງການ. ສະນັ້ນຈຶ່ງມີຄວາມຈໍາເປັນຂະຫຍາຍສະມາຊິກ ພາຍໃຕ້ໂຄງການ ສະມາຊິກຈະຕ້ອງມີຄວາມຮູ້ ແລະ ເບິ່ງຄວາມສາມາດ, ເງື່ອນໄຂຂອງຕົນວ່າ ຈະສາມາດເຂົ້າເປັນສະມາຊິກ ເປັນສ່ວນໜຶ່ງຂອງຜູ້ຜະລິດ ມີໜ້ອຍກໍຜະລິດໜ້ອຍ, ມີຫຼາຍກໍຜະລິດຫຼາຍ ແລະ ລວມກຸ່ມກັນ ເປັນສະຫະກອນກໍໄດ້, ສຸດທ້າຍແລ້ວ ກໍແມ່ນໄດ້ປະລິມານສິນຄ້າ ທີ່ຕອບສະໜອງກັບຕະຫຼາດ (ໂຄງການ), ພວກຂ້າພະເຈົ້າເຊື່ອໝັ້ນວ່າ ຕະຫຼາດ ຍັງຫຼາກຫຼາຍ ແລະ ເປີດກວ້າງ ທາງນະຄອນຫຼວງວຽງຈັນ ແລະ ຕ່າງແຂວງ. ພາຍໃຕ້ການຮ່ວມມືດັ່ງກ່າວ ຄິດວ່າເປັນ ການຮ່ວມມືທີ່ດີຫຼາຍ ໂອກາດນີ້ ຂໍເຊີນຊວນ ພໍ່ແມ່ປະຊາຊົນ ທີ່ຕ້ອງການຢາກເຂົ້າຮ່ວມໃນວຽກງານການຜະລິດ (ປູກ-ລ້ຽງ) ຕ້ອງເລືອກເອົາຕາມຄວາມເໝາະສົມ ແລະ ຄວາມສາມາດ ຂອງແຕ່ລະພາກສ່ວນ.
ດັ່ງນັ້ນ, ຖ້າຫາກວ່າ ທ່ານໃດ ມີຄວາມມັກ-ຮັກວຽກງານປູກ-ລ້ຽງ ໃຫ້ເຂົ້າໄປສອບຖາມ ຫຼືປຶກສານໍາພາກສ່ວນທີ່ກ່ຽວຂ້ອງໄດ້ ເພາະວ່າ ເຮັດວຽກງານກະສິກໍາ ຈະສາມາດນໍາພາຄອບຄົວ ແລະ ສັງຄົມຫຼຸດພົ້ນອອກຈາກຄວາມທຸກຍາກ ແລະ ກ້າວໄປສູ່ຄວາມຢູ່ດີ-ກິນດີ ທັງມີລາຍຮັບເຂົ້າສູ່ຄອບຄົວຕະຫຼອດປີ.
ຄໍາເຫັນ