ສຳມະນາວິທະຍາສາດລະດັບຊາດ ມູນເຊື້ອວັນສະຖາປະນາ ສປປ ລາວ ແລະ ວັນເກີດ ປະທານ ໄກສອນ ພົວວິຫານ

ສະຫາຍ ກິແກ້ວ ໄຂຄໍາພິທູນ ໄດ້ກ່າວບົດນໍາ ແລະ ພ້ອມທັງກ່າວເປີດກອງປະຊຸມ ໂດຍພາຍໃຕ້ຫົວຂໍ້ “ລະນຶກວັນສະຖາປະນາ ສາທາລະນະລັດ ປະຊາທິປະໄຕປະຊາຊົນລາວ ຄົບຮອບ 50 ປີ ແລະ ວັນເກີດ ປະທານ ໄກສອນ ພົມວິຫານ ຄົບຮອບ 105 ປີ” ໂດຍໄດ້ເນັ້ນໜັກວ່າ: ໃນເງື່ອນໄຂທີ່ສະພາບແວດລ້ອມພາກພື້ນ ແລະ ສາກົນ ສືບຕໍ່ຜັນແປໄປຢ່າງໄວວາສັບສົນ, ຄາດຄະເນໄດ້ຍາກນັ້ນ ການປະຕິບັດພາລະກິດແຫ່ງການປົກປັກຮັກສາ ແລະ ສ້າງສາປະເທດ ກໍຄືການສືບຕໍ່ບູລະນະລະບອບປະຊາທິປະໄຕປະຊາຊົນ ສ້າງປະຖົມປັດໄຈ ເພື່ອກ້າວຂຶ້ນສູ່ສັງຄົມນິຍົມ ຢ່າງໜັກແໜ້ນ ເລັ່ງທວງໃຫ້ ພັກ-ລັດພວກເຮົາ ຕ້ອງເພີ່ມທະວີຄວາມສາມາດໃນການນໍາພາ ແລະ ຊີ້ນໍາພາລະກິດປະຕິວັດໃນໄລຍະໃໝ່ນີ້ ໃຫ້ໜັກແໜ້ນເຂັ້ມແຂງ.

ດັ່ງນັ້ນ, ກອງປະຊຸມຄັ້ງນີ້ ຈຶ່ງເປັນຄວາມຈໍາເປັນພາວະວິໄສ ແລະ ຮີບດ່ວນກວ່າເວລາໃດໝົດ ເພື່ອທົບທວນຄືນ, ເປັນການຄົ້ນຄວ້າກໍາແໜ້ນມູນເຊື້ອ ແລະ ຜົນງານແຫ່ງການຈັດຕັ້ງປະຕິບັດພາລະກິດປົກປັກຮັກສາ ແລະ ສ້າງສາປະເທດຊາດ; ຄົ້ນຄວ້າ, ເຊື່ອມຊຶມ ກຳແໜ້ນ ແບບຢ່າງຄຸນສົມບັດສິນທໍາປະຕິວັດອັນໃສແຈ້ງ ແລະ ແນວຄິດຊີ້ນໍາຂອງ ປະທານ ໄກສອນ ພົມວິຫານ ອັນເປັນທວນໄຟເຍືອງທາງ ໃຫ້ການປະຕິວັດຂອງປະເທດເຮົາກ້າວຂຶ້ນ. ກອງປະຊຸມດັ່ງກ່າວນີ້,ຍັງມີຄວາມໝາຍສຳຄັນ ທັງໃນດ້ານທິດສະດີ ແລະ ພຶດຕິກໍາ ແລະ ເປັນປະໂຫຍດໃຫຍ່ຫຼວງ ເພື່ອຮັບໃຊ້ໃຫ້ການຈັດຕັ້ງປະຕິບັດພາລະກິດປະຕິວັດ ຂອງພັກ, ຂອງຊາດ ໃນປັດຈຸບັນ.

ກອງປະຊຸມໄດ້ຮັບຟັງການສະເໜີ 6 ຫົວຂໍ້ຍ່ອຍຄື: ໄຊຊະນະສົມບູນຂອງການປະຕິວັດຊາດປະຊາທິປະໄຕ ຢູ່ປະເທດເຮົາ-ຄວາມໝາຍ ທາງປະຫວັດສາດ ແລະ ຍຸກສະໄໝ ໂດຍແມ່ນກະຊວງປ້ອງກັນປະເທດ ຮັບຜິດຊອບກະກຽມເນື້ອໃນ ແລະ ສະເໜີໂດຍ ສະຫາຍ ພົນຕີ ວົງສອນ ອິນປານພິມ ຮອງລັດຖະມົນຕີກະຊວງປ້ອງກັນປະເທດ; 50 ປີ ແຫ່ງພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ (1975-2025) ສະເໜີໂດຍ ສະຫາຍ ພູວົງ ກິດຕະວົງ ຮອງລັດຖະມົນຕີກະຊວງການເງິນ; ສປປ ລາວ ໃນຍຸກສະໄໝໃໝ່ ແຫ່ງການພັດທະນາ ສະເໜີໂດຍ ສະຫາຍ ສະຖາບັນດິດ ອິນສີຊຽງໃໝ່ ຮອງປະທານສະຖາບັນວິທະຍາສາດເສດຖະກິດ-ສັງຄົມແຫ່ງຊາດ; ປະທານ ໄກສອນ ພົມວິຫານ ກັບການປະຕິວັດຊາດປະຊາທິປະໄຕ ຢູ່ປະເທດເຮົາ ສະເໜີໂດຍ ສະຫາຍ ຄໍາມອນ ຈັນທະຈິດ ຮອງຫົວໜ້າຄະນະໂຄສະນາອົບຮົມສູນກາພັກ ຮອງປະທານຜູ້ປະຈໍາການສະພາທິດສະດີສູນກາງພັກ; ແນວຄິດ ໄກສອນ ພົມວິຫານ ເປັນທວນໄຟເຍືອງທາງໃຫ້ແກ່ການປະຕິວັດລາວຕະຫຼອດໄປ ສະເໜີໂດຍ ສະຫາຍ ພູວົງ ອຸ່ນຄໍາແສນ ກຳມະການສູນກາງພັກ ເລຂາຄະນະບໍລິຫານງານພັກ ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ; ແບບຢ່າງຄຸນສົມບັດສິນທໍາປະຕິວັດ ອັນໃສແຈ້ງຂອງ ປະທານ ໄກສອນ ພົມວິຫານ ສະເໜີໂດຍ ສະຫາຍ ກອງແກ້ວ ໄຊສົງຄາມ ກໍາມະການສູນກາງພັກ, ປະທານສະຖາບັນວິທະຍາສາດເສດຖະກິດ-ສັງຄົມແຫ່ງຊາດ.

ພ້ອມດຽວກັນນີ້, ກໍໄດ້ມີການປະກອບຄໍາເຫັນ ຢ່າງກົງໄປກົງມາ ເປັນຕົ້ນຄື ສະຫາຍ ບົວສອນ ບຸບຜາວັນ ອະດີດກຳມະການກົມການເມືອງສູນກາງພັກ ອະດີດນາຍົກລັດຖະມົນຕີ, ສະຫາຍ ສົມສະຫວາດເລັ່ງສະຫວັດອະດີດກຳມະການກົມການເມືອງສູນກາງພັກອະດີດຮອງນາຍົກລັດຖະມົນຕີ ທີ່ປຶກສາສະພາທິດສະດີສູນກາງພັກ ເຮັດໃຫ້ກອງປະຊຸມມີບັນຍາກາດຟົດຟື້ນ ແລະ ມີເນື້ອໃນເລິກເຊິ່ງ.

ກອງປະຊຸມຄັ້ງນີ້, ດຳເນີນໃນເວລາເຄິ່ງວັນ ດ້ວຍບັນຍາກາດທີ່ຟົດຟື້ນ, ມີຄວາມຮັບຜິດຊອບສູງ, ມີເນື້ອໃນອຸດົມສົມບູນ ແລະ ໄດ້ສໍາເລັດຢ່າງຈົບງາມ ທັງເປັນການເພີ່ມຄັງສາງທິດສະດີ ແລະ ຄັງຄວາມຮູ້ໃຫ້ມີຄວາມອຸດົມສົມບູນຍິ່ງຂຶ້ນ. ກອງປະຊຸມຍັງຈະໄດ້ສືບຕໍ່ຈັດຢູ່ແຂວງສະຫວັນນະເຂດ ຊຶ່ງແມ່ນ 1 ໃນ 2 ຈຸດ ທີ່ຖືກກໍານົດໃນການຈັດສຳມະນາວິທະຍາສາດລະດັບຊາດ ໃນຫົວຂໍ້ນີ້ ໃນຂອບເຂດທົ່ວປະເທດ.

(ຂ່າວ-ພາບ: ສຸກສະຫວັນ)