ແຈ່ວປາບໍ້າກຸ້ງຕ້ອງລອງ ໄດ້ຮັບຄວາມນິຍົມໃນງານບຸນພະທາດຫຼວງ

ທ່ານ ສຸທາກອນ ສອນວິໄຊ ເຈົ້າຂອງແຈ່ວປາບໍ້າກຸ້ງຕ້ອງລອງໄດ້ໃຫ້ສຳພາດຕໍ່ນັກຂ່າວໜັງສືພິມປະຊາຊົນໂອກາດເຂົ້າຮ່ວມງານວາງສະແດງສິນຄ້າໃນງານບຸນນະມັດສະການພະທາດຫຼວງວຽງຈັນວັນທີ 1ພະຈິກຜ່ານມາວ່າ: ຕົນເອງມີຄວາມຮູ້ສຶກເປັນກຽດ ແລະ ພາກພູມໃຈຫຼາຍທີ່ໄດ້ມີໂອກາດເຂົ້າຮ່ວມງານຄັ້ງນີ້ ຖືເປັນຄັ້ງທີ 2 ຕາມການເຊີນຂອງພະແນກອຸດສາຫະກຳ ແລະ ການຄ້າແຂວງຫົວພັນ. ຊຶ່ງໄດ້ນໍາເອົາຜະລິດຕະພັນແຈ່ວປາບໍ້າກຸ້ງຕ້ອງລອງມາວາງຂາຍໃນຄັ້ງນີ້ປະມານ 3 ໂຕ່ນລາຄາເລີ່ມຕົ້ນກ່ອງນ້ອຍ 30,000 ກີບ, ກ່ອງໃຫຍ່ 150,000 ກີບ, ລາຄາຕໍ່ແພັກ 6 ກ່ອງ 150,000 ກີບພ້ອມນັ້ນຍັງມີແຈ່ວໝາກແຂ່ນ, ແຈ່ວສູບຊຶ່ງມີລາຄາຄືກັນ, ສຳລັບແຈ່ວປາບໍ້າກຸ້ງຕ້ອງລອງໄດ້ຮັບການຢັ້ງຢືນເປັນຜະລິດຕະພັນໂອດັອບໃນປີ 2024 ການເຂົ້າຮ່ວມງານໃນຄັ້ງນີ້ມີລູກຄ້າທີ່ມາຈາກຕ່າງແຂວງ, ຕ່າງປະເທດໃຫ້ຄວາມສົນໃຈເຂົ້າມາອຸດໜູນເປັນຈຳນວນຫຼາຍ. ໃນໄລຍະຜ່ານມາໄດ້ເຂົ້າຮ່ວມງານວາງສະແດງຢູ່ສູນການຄ້າລາວ-ໄອເຕັກ ແລະ ງານຕ່າງໆຖ້າຫາກລູກຄ້າທ່ານໃດສົນໃຈສາມາດເຂົ້າໄປສັ່ງຊື້ໄດ້ທີ່ຕິກຕັອກ ຫຼື ເຟສບຸກ ກຸ້ງຕ້ອງລອງ.

ສຳລັບການມາໃນຄັ້ງນີ້ເປັນຂີດໝາຍສຳຄັນຂອງຜະລິດຕະພັນພວກເຮົາ ໂດຍໄດ້ຮັບການສະໜັບສະໜູນຊຸກຍູ້ຈາກພັກ-ລັດໄດ້ມີນະໂຍບາຍຊ່ວຍດ້ານສະຖານທີ່ຮ້ານວາງຂາຍສິນຄ້າພ້ອມທັງໄດ້ມີການສົ່ງເສີມ ແລະ ເປີດກວ້າງໂຄສະນາໃຫ້ສັງຄົມຮັບຮູ້ຢ່າງກວ້າງຂວາງ ຊຶ່ງໄດ້ເລີ່ມວາງຂາຍນັບແຕ່ວັນທີ 31 ຈົນເຖິງວັນທີ 5 ພະຈິກ ຊຶ່ງເປັນມື້ສຸດທ້າຍຂອງງານບຸນ.