ບິກຊີຊຸບເປີເຊັນເຕີລາວ ຈຳກັດ ສັດທາຫຼັກບຸນກະຖິນ ທີ່ວັດປ່ານາຄູນນ້ອຍ

ງານບຸນກະຖິນຄັ້ງນີ້, ຜູ້ບໍລິຫານ ແລະ ພະນັກງານ ບໍລິສັດບິກຊີຊຸບເປີເຊັນເຕີລາວ ຈຳກັດ ໄດ້ເປັນເຈົ້າພາບເຈົ້າສັດທາ ຕັ້ງກອງບຸນກະຖິນຂຶ້ນວັນທີ 31 ຕຸລາຜ່ານມາ ຢູ່ທີ່ສຳນັກງານໃຫຍ່ຮ້ານບິກຊີສາຂາສູນການຄ້າລາວ-ໄອເຕັກ ບ້ານໂພນທັນ ເມືອງໄຊເສດຖາ ນວ ນໍາໂດຍທ່ານ ວິຊານາ ເສີມ ໃໝ່ ປະທານບໍລິຫານບິກຊີຊຸບເປີເຊັນເຕີລາວ ຈໍາກັດ ພ້ອມດ້ວຍລູກຄ້າຂອງບິກຊີ ໄດ້ໂມທະນາເຮັດບຸນຮ່ວມກັນ ເພື່ອປະກອບສ່ວນທຶນເຂົ້າໃນການສ້າງສາພັດທະນາວັດປ່ານາຄູນນ້ອຍ. ພາຍຫຼັງຕັ້ງກອງບຸນ 1 ມື້ 1 ຄືນແລ້ວ. ໃນວັນທີ 1 ພະຈິກຜ່ານມາ ໄດ້ແຫ່ກອງກະຖິນ ມາຍັງວັດປ່ານາຄູນນ້ອຍ ແລະ ຮັບເອົາໂດຍພະອາຈານ ສີທົນ ໄຊຍະວົງສອນ ເຈົ້າອະທິການວັດປ່ານາຄູນນ້ອຍ.

ທ່ານ ວິຊານາ ເສີມໃໝ່ ກ່າວວ່າ: ການຈັດງານບຸນກະຖິນ ປະຈຳປີ 2025 ຂອງບໍລິສັດຄັ້ງນີ້,ເປັນກິດຈະກຳໜຶ່ງ ເພື່ອປະກອບສ່ວນຊ່ວຍເຫຼືອສັງຄົມລາວ ໂດຍບໍລິສັດໄດ້ຈັດຂຶ້ນທຸກໆປີ ຕ່າງແຕ່ໃນແຕ່ລະປີຈະຈັດກິດຈະກຳແຕກຕ່າງກັນໄປ ໂດຍລວມແລ້ວທຸກກິດຈະກຳເປັນການປະກອບສ່ວນຊ່ວຍ ເຫຼືອສັງຄົມລາວ ແລະ ມີສ່ວນຮ່ວມໃນການສ້າງສາພັດທະນາປະເທດຊາດບ້ານເມືອງຂອງລາວ ເພື່ອໃຫ້ຈະເລີນຮຸ່ງເຮືອງສີວິໄລເປັນກ້າວໆ ແລະ ຍັງເປັນກິດຈະກຳໜຶ່ງທີ່ສົ່ງເສີມວັດທະນະທຳຮີດຄອງປະເພນີອັນດີງາມຂອງຊາດລາວ ກໍຄືພຸດທະສາສະໜາ.

ພະອາຈານ ສີທົນ ໄຊຍະວົງສອນ ກ່າວວ່າ: ບຸນກະຖິນຄັ້ງນີ້, ເຈົ້າພາບເຈົ້າສັດທາຫຼັກແມ່ນບໍລິສັດບິກຊີຊຸບເປີເຊັນເຕີລາວ ຈຳກັດ ແລະ ມີອອກຕົນຍາດໂຍມທັງຫຼາຍມາຮ່ວມນໍາ ຊຶ່ງລວມຍອດເງິນໄດ້ຫຼາຍກວ່າ 400 ລ້ານກີບ ແລະ ເງິນຈຳນວນດັ່ງກ່າວ ທາງວັດຈະໄດ້ໝູນໃຊ້ເຂົ້າໃນການສ້າງສາພັດທະນາວັດ ໂດຍສະເພາະເປັນທຶນສ້າງພື້ນຖານໂຄງລ່າງ ເປັນຕົ້ນເສັ້ນທາງເບຕົງເສີມເຫຼັກຈາກທາງໃຫຍ່ເຂົ້າຫາວັດ ທີ່ມີໄລຍະທາງຍາວ 300 ກວ່າແມັດ ເພື່ອສະດວກໃຫ້ແກ່ການສັນຈອນໄປ-ມາຂອງຄູບາອາຈານພາຍໃນວັດ, ອອກຕົນຍາດໂຍມ ແລະ ປະຊາຊົນທີ່ມາວັດ.

ຂ່າວ-ພາບ: ບຸນຕອມ-ບຸນອຸ້ມ