ເປີດວາງສະແດງລົດໄຟຟ້າຫຼູສູ່ໂລກແຫ່ງພະລັງງານສະອາດ

ໃນພິທີ, ທ່ານ ວີເພັດ ສີຫາຈັກ ປະທານບໍລິສັດສັນຕິພາບມໍເຕີ ກ່າວວ່າ: ໃນນາມຄະນະບໍລິຫານບໍລິສັດສັນຕິພາບມໍເຕີ ຂ້າພະເຈົ້າຮູ້ສຶກເປັນກຽດຢ່າງຍິ່ງທີ່ໄດ້ຕ້ອນຮັບບັນດາທ່ານທີ່ສະຖານທີ່ແຫ່ງນີ້ເນື່ອງໃນໂອກາດການເປີດຫ້ອງວາງສະແດງຍີ່ຫໍ້ລົດໄຟຟ້າຫຼູ Deepal ແລະ ຕົວແທນຈໍາໜ່າຍຢ່າງເປັນທາງການ, ບໍລິສັດ ສັນຕິພາບມໍເຕີເປີດຫ້ອງວາງສະແດງລົດແຫ່ງທໍາອິດໃນນະຄອນຫຼວງວຽງຈັນຢ່າງເປັນທາງການ. ດັ່ງທີ່ບັນດາທ່ານຮູ້ໃນໄລຍະ 2-3 ປີທີ່ຜ່ານມາ ພາຫະນະທີ່ຂັບເຄື່ອນດ້ວຍລະບົບໄຟຟ້າໄດ້ຮັບຄວາມນິຍົມນັບມື້ນັບເພີ່ມຂຶ້ນ. ຄວາມນິຍົມດັ່ງກ່າວເກີດມາຈາກຄວາມຮຽກຮ້ອງຕ້ອງການຂອງຜູ້ບໍລິໂພກທີ່ຕ້ອງການນໍາໃຊ້ລົດພະລັງງານສະອາດຄຽງຄູ່ໄປກັບເຕັກໂນໂລຊີທີ່ອັດສະລິຍະຍີ່ຫໍ້ Deepal, ເວົ້າໄດ້ວ່າເປັນ “ນ້ອງໃໝ່” ໃນເຄືອຂ່າຍຂອງກຸ່ມບໍລິສັດ Chang An, ໃນໄລຍະຜ່ານມາໄດ້ມີການພັດທະນາ ແລະ ຂະຫຍາຍຕົວຢ່າງວ່ອງໄວໃນຫຼາຍປະເທດທົ່ວໂລກດ້ວຍນະວັດຕະກຳທາງດ້ານຄວາມປອດໄພ, ການນໍາໃຊ້ພະລັງງານທີ່ມີປະສິດທິພາບສູງ ແລະ ການອໍານວຍຄວາມສະດວກໃຫ້ກັບຜູ້ຂັບຂີ່. ບັນດາທ່ານຈະໄດ້ສຳຜັດກັບລົດ 2 ລຸ້ນຄື: S07 ແລະ S05 ຊຶ່ງເປັນ 2 ລຸ້ນຍອດນິຍົມຂອງ Deepal ໃນທົ່ວໂລກ. ຫ້ອງວາງສະແດງແຫ່ງນີ້ບໍ່ເປັນພຽງແຕ່ເປັນບ່ອນຈໍາໜ່າຍລົດ, ແຕ່ຍັງເປັນສູນບໍລິການຫຼັງການຂາຍທີ່ມີມາດຕະຖານສູງ, ພວກເຮົາພ້ອມໃຫ້ຄໍາປຶກສາ ແລະ ຂໍ້ແນະນໍາວິທີການໃຊ້ງານ, ພ້ອມໃຫ້ບໍລິການຈາກວິສະວະກອນທີ່ໄດ້ຮັບການຢືນຢັນ, ນຳໃຊ້ອາໄຫຼ່ຂອງແທ້ ແລະ ມີການຮັບປະກັນຈາກໂຮງງານໂດຍກົງ, ຂ້າພະເຈົ້າຂໍຝາກຂໍ້ຄວນຄິດ 1 ຂໍ້ ເພື່ອສະແດງຜົນປະໂຫຍດທີ່ທ່ານຈະໄດ້ຮັບເມື່ອຫັນມາໃຊ້ລົດໄຟຟ້າ, ຕະຫຼອດໄລຍະການຂັບຂີ່ 1 ແສນກິໂລແມັດ, ທ່ານສາມາດປະຢັດຄ່ານໍ້າມັນໄດ້ຫຼາຍກວ່າ 200 ລ້ານກີບແລະ ກະແສໄຟຟ້າທີ່ນໍາໃຊ້ໃນການສາກລົດເປັນຊັບພະຍາກອນທຳມະຊາດທີ່ປະເທດລາວສາມາດຜະລິດໄດ້ ແລະ ເປັນມິດຕໍ່ສິ່ງແວດລ້ອມໃນໄລຍະ 1 ແສນກິໂລແມັດ, ລົດໄຟຟ້າປ່ອຍອາຍ Carbon ຕໍ່າກວ່າລົດນໍ້າມັນ 60 ຫາ 70%. ໃນພິທີຍັງມີການແນະນຳຈາກນັກວິຊາການໃນການຂັບຂີ່ ແລະ ນຳໃຊ້ລົດດັ່ງກ່າວໃຫ້ເກີດຜົນປະໂຫຍດສູງສຸດ, ພ້ອມສະເໜີຄຸນນະພາບຂອງລົດທັງສອງລຸ້ນ ແລະ ເລີ່ມເປີດຮັບການສັ່ງຈອງລົດນັບແຕ່ມື້ເປີດວາງສະແດງລົດໄຟຟ້າຫຼູເປັນຕົ້ນໄປ.

(ຂ່າວ: ແສງຈັນ)