ທ່ານ ຫງວຽນ ວັນ ຝອງ ກ່າວວ່າ: ໂຮງງານຜະລິດ ແປງມັນຕົ້ນ ຂອງບໍລິສັດ MTP ເປັນບໍລິສັດໜຶ່ງທີ່ຂຶ້ນກັບກຸ່ມບໍລິສັດ ການຄ້າ-ການລົງທຶນ ທັງແດດ (thung dad) ຈຳກັດ, ມີສໍານັກງານ ຕັ້ງຢູ່ເຂດລຽນຫຽນ ເມືອງຟຸກທໍ້ ນະຄອນຫຼວງຮ່າໂນ້ຍ ສສ ຫວຽດນາມ, ໄດ້ລົງທຶນສ້າງຕັ້ງໂຮງງານຜະລິດແປ້ງມັນຕົ້ນ ຢູ່ບ້ານໂພນສະອາດ ເມືອງນໍ້າບາກ ແຂວງຫຼວງພະບາງ ສປປ ລາວ ໃນເນື້ອທີ່ເກືອບ 10 ເຮັກຕາ, ມູນຄ່າການລົງທຶນທັງໝົດ 5 ລ້ານ 5 ແສນໂດລາ, ໂດຍໄດ້ຮັບການອະນຸຍາດ ການລົງທຶນໃນວັນທີ 12 ພະຈິກ 2024, ມື້ໜຶ່ງສາມາດຜະລິດແປ້ງມັນຕົ້ນໄດ້ 80-100 ໂຕນ, ແຮງງານຕົ້ນຕໍ ແມ່ນແຮງງານທ້ອງຖິ່ນ ກວມ 80% ແລະ ອີກ 20% ເປັນແຮງານຫວຽດນາມ.
ສຳລັບວັດຖຸດີບ ແມ່ນໄດ້ມາຈາກປະຊາຊົນ ເມືອງນໍ້າບາກ, ເມືອງງອຍ, ເມືອງໂພນທອງ ແລະເມືອງປາກອູຈຳນວນໜຶ່ງ, ສ່ວນຕະຫຼາດສົ່ງອອກແມ່ນ ສປ ຈີນ, ສສ ຫວຽດນາມ ແລະ ສົ່ງຂາຍພາຍໃນ ສປປ ລາວ. ທ່ານກ່າວຕື່ມວ່າ: ພາຍໃນໂຮງງານໄດ້ເອົາໃຈໃສ່ຮັກສາສິ່ງແວດລ້ອມ ໂດຍສະເພາະໄດ້ກໍ່ສ້າງບໍບຳບັດນໍ້າເສຍ ຊຶ່ງມີເນື້ອທີ່ 65,000 ແມັດກ້ອນເພື່ອບໍ່ໃຫ້ມີຜົນກະທົບຕໍ່ປະຊາຊົນທ້ອງຖິ່ນ, ພ້ອມນັ້ນ ໄດ້ສ້າງຂົວເປຕົງຂ້າມຫ້ວຍນໍ້າຂານ, ມີຄວາມຍາວ 15 ແມັດ, ກວ້າງ 6 ແມັດ ເພື່ອອໍານວຍຄວາມສະດວກໃຫ້ປະຊາຊົນໄປ-ມາ ຊື້-ຂາຍ.
(ພາບ-ຂ່າວ: ດາວອນ ມະນີວັນ)
ຄໍາເຫັນ