ຫວ່າງບໍ່ດົນມານີ້ ທີ່ວິທະຍາໄລກະສິກໍາ ແລະ ປ່າໄມ້ພາກເໜືອ ແຂວງຫຼວງພະບາງ ໄດ້ຈັດພິທີເປີດປ້າຍ ກະສິກໍາທັນສະໄໝສາກົນ ແລະ ມອບ-ຮັບອຸປະກອນປູກເນື້ອເຍື່ອ. ໂດຍມີ ທ່ານ ສີປະໄພ ໄຊສົງຄາມ ຫົວໜ້າຫ້ອງການກະຊວງກະສິກໍາ ແລະ ປ່າໄມ້, ທ່ານ ຊາງ ເຊີ ປິງ ຫົວໜ້າກົງສູນໃຫຍ່ ສປ ຈີນ ປະຈໍາພາກເໜືອ, ບັນດາຕາງໜ້າພາກສ່ວນກ່ຽວຂ້ອງທັງສອງຝ່າຍ ຕະຫຼອດຮອດຄູ-ອາຈານ ແລະນັກສຶກສາເຂົ້າຮ່ວມ.
ທ່ານ ສີປະໄພ ໄຊສົງຄາມ ກ່າວວ່າ: ນີ້ ເປັນການຮ່ວມມືລະຫວ່າງ ວິທະຍາໄລກະສິກໍາ ແລະປ່າໄມ້ພາກເໜືອແຂວງຫຼວງພະບາງ ແລະ ວິທະຍາໄລກະສິກໍາ ເຈິນຕູ ສປ ຈີນ ຊຶ່ງຂອບເຂດການຮ່ວມມືແມ່ນມີຫຼາຍດ້ານເຊັ່ນ: ການໃຫ້ທຶນກາສຶກສາໄປຍົກລະດັບຂອງຄູ-ອາຈານ ແລະ ນັກສຶກສາໃນສາຂາປູກຝັງ, ລ້ຽງສັດ-ສັດຕະວະແພດ ການບໍລິຫານການທ່ອງທ່ຽວທີ່ ສປ ຈີນ, ການແລກປ່ຽາອາຈານໃນການສິດສອນ ລະຫວ່າງ 2 ວິທະຍາໄລ, ການຝຶກອົບຮົມໄລຍະສັ້ນ, ການຄົ້ນຄວ້າທົດລອງທາງດ້ານກະສິກໍາ ແລະ ນະວັດຕະກໍາກະສິກໍາ, ການທົດລອງແນວພັນເຂົ້າ 10 ແນວພັນ, ການແລກປ່ຽນວັດທະນະທໍາ ແລະ ການຮຽນພາສາຈີນ ຊຶ່ງເປັນການປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງຊາດ ແລະ ຜັນຂະຫຍາຍຍຸດທະສາດພັດທະນາບຸກຄະລາກອນຂອງຂະແໜງກະສິກໍາ ແລະ ປ່າໄມ້ ຮອດປີ 2025, ວິໄສທັດ 2030 ແລະ ເປັນການປະກອບສ່ວນໃນການຈັດຕັ້ງປະຕິບັດການຮ່ວມມືແບບພິເສດຄູ່ຮ່ວມຊາຕາກໍາລາວ - ຈີນ, ຈີນ - ລາວ ເວົ້າລວມ ເວົ້າສະເພາະແມ່ນເປັນການແລກປ່ຽນບົດຮຽນ ແລະທັດສະນະສຶກສາພາຍໃຕ້ໂຄງການຮ່ວມມືເສັ້ນທາງສາຍໄໝກະສິກໍາເພື່ອການທ່ອງທ່ຽວ ແລະ ພັກຜ່ອນຢ່ອນໃຈຂອງປະຊາຊົນ 2 ປະເທດຢູ່ສະຖານທີ່ກະສິກໍາ ແລະ ປ່າໄມ້ພາກເໜືອແຂວງຫຼວງພະບາງ. ແຕ່ສິ່ງສໍາຄັນແມ່ນເປັນການຜັນຂະຫຍາກອບການຮ່ວມມືທາງດ້ານວິຊາການ, ວິທະຍາສາດ ແລະ ເຕັກໂນໂລຊີ ຫຼື ນະວັດຕະກໍາກະສິກໍາລະຫວ່າງສອງປະເທດໃຫ້ກ້າວສູ່ລ່ວງເລິກ, ກວ້າງຂວາງຜ່ານພຶດຕິກໍາຕົວຈິງ ແລະ ສ້າງໂອກາດອໍານວຍຄວາມສະດວກໃນທຸກລະດັບ, ສ້າງເງື່ອນໄຂຊ່ວຍເຫຼືອຮ່ວມມືລະຫວ່າງໂຮງຮຽນວິທະຍາໄລຂອງ ສປປ ລາວ ກັບບັນດາໂຮງຮຽນເຕັກນິກວິຊາຊີບຂອງ ສປ ຈີນ ໃນອະນາຄົດ,ສ້າງຄູ່ຮ່ວມພັດທະນາດ້ານເຕັກນິກ ແລະ ວິຊາການກັບສາກົນໃນທົ່ວໂລກ.
ພິທີຄັ້ງນີ້ທາງບໍລິສັດ ກະສິກໍາ ມົດຄໍາ ຂອງ ສປ ຈີນ ໄດ້ມອບອຸປະກອນຫ້ອງທົດລອງການປູກເນື້ອເຍື່ອ ມູນຄ່າ 10.000 ຢວນ ໃຫ້ແກ່ວິທະຍາໄລກະສິກໍາ ແລະ ປ່າໄມ້ພາກເໜືອ ແຂວງຫຼວງພະບາງ ພ້ອມທັງເປີດປ້າຍ ກະສິກໍາທັນສະໄໝສາກົນຫຼວງພະບາງ ລາວ-ຈີນ ຕື່ມອີກ.
ຂ່າວ-ພາບ: ເພັດສາຄອນ ສິມມະ
ວົງ
ຄໍາເຫັນ