ນັບແຕ່ມື້ອົງການຈັດຕັ້ງແມ່ຍິງລາວໄດ້ຮັບການສ້າງຕັ້ງຂຶ້ນມາ ສະຫະພັນແມ່ຍິງລາວມີຄວາມເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ ໄດ້ເອົາໃຈໃສ່ປັບປຸງການຈັດຕັ້ງ, ປັບປຸງແບບແຜນວິທີນໍາພາ, ວິທີເຮັດວຽກ ຂອງສະຫະພັນແມ່ຍິງແຕ່ລະຂັ້ນໃຫ້ມີຄວາມໜັກແໜ້ນ, ເຂັ້ມແຂງ,ໃຫ້ແທດເໝາະກັບຄວາມຮຽກຮ້ອງຕົວຈິງຂອງວຽກງານໃນໄລຍະໃໝ່.ແມ່ຍິງລາວບັນດາເຜົ່າໄດ້ຄຽງບ່າຄຽງໄລ່ກັບເພດຊາດອຸທິດເລືອດເນື້ອ, ເຫື່ອແຮງ, ສະຕິປັນຍາ, ວັດຖຸປັດໄຈປະກອບສ່ວນເຂົ້າໃນພາລະກິດລວມຂອງຊາດ ເວົ້າລວມ, ເວົ້າສະເພາະພາລະກິດປ່ຽນແປງໃໝ່ຂອງພັກເຮົາ. ດັ່ງປະທານ ໄກສອນ ພົມວິຫານ ໄດ້ມີທິດຊີ້ນຳຕໍ່ເອື້ອຍນ້ອງແມ່ຍິງ ເພື່ອປຸກລະດົມຂົນຂວາຍເອື້ອຍນ້ອງແມ່ຍິງ ປະກອບສ່ວນເຂົ້າໃນທຸກຂົງເຂດວຽກງານ. ເພີ່ນໄດ້ຊີ້ນໍາ ວ່າ: "ກ່ອນອື່ນຕ້ອງເຂົ້າໃຈຈະແຈ້ງວ່າ: ວຽກງານຂົນຂວາຍແມ່ຍິງເປັນໜ້າທີ່ປະຕິວັດອັນຍາວນານອັນໜຶ່ງ, ມັນບໍ່ພຽງແຕ່ກ່ຽວພັນເຖິງເພດຍິງທີ່ກວມເຄິ່ງໜຶ່ງຂອງປະຊາກ່ອນເທົ່ານັ້ນ, ແຕ່ຍັງກ່ຽວຂ້ອງເຖິງທັງໝົດສັງຄົມ ເວົ້າສະເພາະ ຢູ່ແຕ່ລະຄອບຄົວ ທັງຕິດພັນຢ່າງສະໜິດແໜ້ນເຖິງການປົປັກຮັກສາ ແລະການຂະຫຍາຍເຊື້ອພັນຂອງຊາດອີກດ້ວຍ. ດັ່ງນັ້ນ ການຂົນຂວາຍແມ່ຍິງ ຈຶ່ງກວມເອົາທຸກຂົງເຂດ ເຊັ່ນ: ການເມືອງ, ເສດຖະ ກິດ, ສັງຄົມ, ວັດທະນະທຳ ແລະເຜົ່າຊົນ."
ໃນໄລຍະດຳເນີນພາລະກິດປ່ຽນແປງໃໝ່ຮອບດ້ານ ແລະມີຫຼັກການ ຂອງພັກ ຍິ່ງມີຄວາມຈຳເປັນປຸກລະດົມແມ່ຍິງລາວບັນດາເຜົ່າໃຫ້ປະກອບສ່ວນຫຼາຍກວ່າເກົ່າຊຶ່ງແມ່ຍິງເຜົ່າຕ່າງໆມີຄວາມຮັບຜິດຊອບອັນໜັກໜ່ວງ ແລະເປັນເພດທີ່ມີຄວາມສາມາດອັນໃຫຍ່ຫຼວງ.ປະທານ ໄກສອນ ພົມວິຫານໄດ້ເນັ້ນໜັກອີກຕື່ມວ່າ: "ໃນໄລຍະໃໝ່ຂອງການປະຕິວັດ, ແມ່ຍິງລາວເຮົາມີກຽດທີ່ໄດ້ເປັນແມ່ຍິງພິລະອາດຫານ, ແມ່ຍິງທີ່ດຸໝັ່ນຂະຫຍັນພຽນ, ຊື່ສັດບໍລິສຸດ, ສະຫງຽມຄ່ຽມຄົມ, ເຮັດວຽກບ້ານກໍເຮືອງ, ເຮັດວຽກເມືອງກໍເດັ່ນ."
ມາໃນປັດຈຸບັນ, ສະພາບການແວດລ້ອມສາກົນ ແລະພາກພື້ນ ໄດ້ຜັນແປໄປຢ່າງວ່ອງໄວ ແລະສະຫຼັບສັບຊ້ອນຊຶ່ງມີດ້ານທີ່ເປັນເງື່ອນໄຂສະດວກພື້ນຖານ ແລະດ້ານທີ່ເປັນສິ່ງທ້າທາຍທົດສອບເປັນຕົ້ນການແກ້ງແຍ່ງແຂ່ງຂັນພາຍໃຕ້ກະແສໂລກາພິວັດນັບມື້ນັບຮຸນແຮງຂຶ້ນ; ຍິ່ງໄປກວ່ານັ້ນອິດທິກຳລັງປໍລະປັກ ແລະພວກຄົນບໍ່ດີ ຍັງບໍ່ປະລະກົນອຸບາຍຫັນປ່ຽນໂດຍສັນຕິຕໍ່ປະເທດເຮົາ ຊຶ່ງນັບມື້ນັບເລິກແລບແນບນຽນກວ່າເກົ່າ. ແຕ່ຍ້ອນມີ ຂະບວນການເຄື່ອນໄຫວວຽກງານຂອງເອື້ອຍນ້ອງແມ່ຍິງລາວເຮົາເປັນກຳລັງແຮງໜຶ່ງປະກອບສ່ວນ ຈຶ່ງເຮັດໃຫ້ສັງຄົມມີຄວາມສະຫງົບ ແລະເປັນລະບຽບຮຽບຮ້ອຍ, ການພັດທະນາເສດຖະກິດ-ສັງຄົມໄດ້ຮັບການຂະຫຍາຍຕົວຢ່າງຕໍ່ເນື່ອງ. ທັງໝົດທີ່ກ່າວມານັ້ນ,ແມ່ນການປະກອບສ່ວນອັນແຂງແຮງຂອງເອື້ອຍນ້ອງແມ່ຍິງລາວ ຊຶ່ງພັກເຮົາຍາມໃດກໍຖືແມ່ຍິງເປັນກຳລັງແຮງອັນສຳຄັນ ດັ່ງຄຳເວົ້າທີ່ວ່າ "ບ່ອນໃດທີ່ມີການຈັດຕັ້ງສະຫະພັນແມ່ຍິງທີ່ເຂັ້ມແຂງ, ໜັກແໜ້ນ, ບ່ອນນັ້ນສາມາດປະຕິບັດພາລະບົດບາດ ແລະໜ້າທີ່ຂອງຕົນໄດ້ຢ່າງມີຜົນສຳເລັດ; ເອື້ອຍນ້ອງແມ່ຍິງ ຍັງໄດ້ປະຕິບັດໜ້າທີ່ສໍາຄັນໃນການເບິ່ງແຍງ, ອົບຮົມບົ່ມສອນລູກຫຼານ, ເຕົ້າໂຮມຄວາມສາມັກຄີ, ສ້າງສະຖາບັນຄອບຄົວໃຫ້ມີຄວາມຜາສຸກ".
ຄໍາເຫັນ