ພັກປະຊາຊົນ ປະຕິວັດລາວ ແລະ ພັກກອມມູນິດຫວຽດນາມ ສໍາມະນາທິດສະດີຄັ້ງທີX

ໃນທ່າມກາງບັນຍາກາດ ທີ່ສອງພັກ, ສອງລັດ ແລະປະຊາຊົນສອງຊາດລາວ-ຫວຽດນາມພວມອອກແຮງແຂ່ງຂັນຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງ ພັກ ປປ ລາວ ແລະກອງປະຊຸມໃຫຍ່ ຄັ້ງທີ XIII ຂອງພັກກອມມູນິດຫວຽດນາມ ແລະ ໃນບັນຍາກາດແຫ່ງປີສາມັກຄີມິດຕະພາບ ລາວ-ຫວຽດນາມ;ສະເຫຼີມສະຫຼອງວັນສ້າງຕັ້ງສາຍພົວພັນທາງການທູດຄົບຮອບ 61ປີ ແລະວັນເຊັນສົນທິສັນຍາມິດຕະພາບ ແລະການຮ່ວມມືຮອບດ້ານ ລາວ-ຫວຽດນາມ ຄົບຮອບ 46ປີ ທີ່ເຕັມໄປດ້ວຍບັນຍາກາດອັນຟົດຟື້ນ ແລະ ມີເນື້ອໃນເລິກເຊິ່ງ. 
ເພື່ອສືບຕໍ່ຜັນຂະຫຍາຍບົດບັນທຶກການຮ່ວມມືລະຫວ່າງສອງສະພາທິດສະດີສູນກາງພັກ ລາວ-ຫວຽດນາມ ໃນໄລຍະປີ 2022-2026, ສະພາທິດສະດີຂອງສອງພັກ ລາວ-ຫວຽດນາມ ໄດ້ຮ່ວມກັນຈັດກອງປະຊຸມສໍາມະນາທິດສະດີລະຫວ່າງສອງພັກ ລາວ-ຫວຽດນາມ ຄັ້ງທີ Xຂຶ້ນເມື່ອບໍ່ດົນມານີ້ທີ່ແຂວງກວາງນິງສສຫວຽດນາມພາຍໃຕ້ຫົວຂໍ້ “ພັດທະນາວັດທະນະທຳ, ຄົນໃນຂະບວນວິວັດແຫ່ງການພັດທະນາປະເທດຊາດ ຕາມທິດສັງຄົມນິຍົມ ບົດຮຽນຂອງລາວ ແລະ ຫວຽດນາມ”ໂດຍການເປັນປະທານຮ່ວມຄະນະປະທານຝ່າຍຫວຽດນາມມີ: ສະຫາຍ ຫງວຽນ ຊວນ ຖັງ ກຳມະການກົມການເມືອງ ປະທານສະພາທິດສະດີສູນກາງພັກ ຫົວໜ້າສະຖາບັນການເມືອງແຫ່ງຊາດ ໂຮ່ຈິມິນ; ສະຫາຍ ຕະ ຫງອກ ເຕີນ ຮອງປະທານຜູ້ປະຈຳການສະພາທິດສະດີສູນກາງພັກ ກອມມູນິດ ຫວຽດນາມ; ສະຫາຍ ນາງ ຫງວຽນ ຖິ ຮວ້າຍ ເວິ່ນ ຮອງຫົວໜ້າຜູ້ປະຈໍາການ ຄະນະພົວພັນຕ່າງປະເທດສູນກາງພັກກອມມູນິດ ຫວຽດນາມ; ຄະນະປະທານຝ່າຍລາວມີ: ສະຫາຍ ກິແກ້ວ ໄຂຄຳພິທູນ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ; ສະຫາຍ ຄຳພັນ ເຜີຍຍະວົງ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ ປະທານສະພາທິດສະດີສູນກາງພັກ; ສະຫາຍ ສອນທະນູ ທຳມະວົງ ກຳມະການສູນກາງພັກ ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ຮອງປະທານຜູ້ປະຈຳການສະພາທິດສະດີສູນກາງພັກ; ສະຫາຍ ວະລາໄຊ ເລັ່ງສະຫວັດ ຮອງຫົວໜ້າຄະນະພົວພັນຕ່າງປະເທດສູນກາງພັກ ປະຊາຊົນ ປະຕິວັດລາວ. ໂດຍມີບັນດາການນໍາຂັ້ນສູງແລະພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມ.
ໃນກອງປະຊຸມສໍາມະນາຄັ້ງນີ້, ຄະນະປະທານກອງປະຊຸມສອງຝ່າຍ ໄດ້ຜັດປ່ຽນກັນສະເໜີບົດນໍາທີ່ມີເນື້ອໃນອຸດົມສົມບູນດ້ວຍການວິເຄາະ, ໄຈ້ແຍກໃຫ້ເຫັນແຈ້ງແຕ່ລະເນື້ອໃນໂດຍສະເພາະທາງດ້ານທິດສະດີ ແລະ ພຶດຕິກຳ, ເປັນຕົ້ນ ແມ່ນເນື້ອໃນພັດທະນາວັດທະນະທຳ, ຄົນໃນຂະບວນວິວັດການພັດທະນາປະເທດຊາດຕາມທິດສັງຄົມນິຍົມ. ອັນພົ້ນເດັ່ນແມ່ນສາມາດວິເຄາະ, ໄຈ້ແຍກ, ສະໜອງຂໍ້ມູນໃນການພັດທະນາຊັບພະຍາກອນມະນຸດຄຸນນະພາບສູງ, ການພັດທະນາສືມີແຮງງານ, ການເສີມຂະຫຍາຍວັດທະນະທຳອັນດີງາມຂອງຊາດ, ຢັ້ງຢືນພຶດຕິກຳການພົວພັນລະຫວ່າງເສດຖະກິດກັບວັດທະນະທຳ, ນຳສະເໜີຂໍ້ມູນຕົວຈິງໃນການປະຕິບັດບົດບາດ ແລະ ສິດເປັນເຈົ້າຂອງປະຊາຊົນ ເຂົ້າໃນການພັດທະນາປະເທດຊາດປັດໄຈຄົນ ຫຼື ການພັດທະນາຊັບພະຍາກອນມະນຸດ ແມ່ນປັດໄຈທີ່ມີລັກສະນະຕັດສິນ ແລະ ເປັນກຸນແຈສໍາຄັນ ຂອງການກ້າວຂຶ້ນສັງຄົມນິຍົມ. ສະນັ້ນ, ການຖືເອົາຄົນເປັນປັດໄຈກົກຖືເອົາປະຊາຊົນເປັນກົກແມ່ນການກຳນົດທີ່ຖືກຕ້ອງມີລັກສະນະວິທະຍາສາດຂອງ ສອງພັກລາວ-ຫວຽດນາມ.
ທັງສອງຝ່າຍໄດ້ຍົກໃຫ້ເຫັນຢ່າງຈະແຈ້ງຕໍ່ບັນດາໝາກຜົນລວມຍອດສະຕິປັນຍາຂອງແຕ່ລະພັກຕະຫຼອດໄລຍະແຫ່ງການນໍາພາທີ່ຜ່ານມາ, ບັນດາແນວທາງຍຸດທະສາດຂອງແຕ່ລະພັກ ລ້ວນແຕ່ມີບົດບາດຕັດສິນໃຫ້ແກ່ການກ້າວເດີນໄປຕາມຈຸດໝາຍຂອງພັກທີ່ກໍານົດໄວ້ ແລະແລກປ່ຽນ, ເພີ່ມທະວີຄວາມເຂົ້າອົກເຂົ້າໃຈ, ປະກອບສ່ວນເຂົ້າໃນການຮັດແໜ້ນ ແລະ ເພີ່ມທະວີສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ກໍຄືສອງສະພາທິດສະດີສູນກາງພັກປະຊາຊົນປະຕິວັດລາວ ແລະສະພາທິດສະດີສູນກາງພັກກອມມູນິດຫວຽດນາມ ໃຫ້ກ້າວເຂົ້າສູ່ລວງເລິກໃນທຸກຂົງເຂດວຽກງານຄົ້ນຄວ້າທິດສະດີ ແລະພຶດຕິກຳ.
ກອງປະຊຸມຄັ້ງນີ້, ບັນດານັກວິທະຍາສາດ, ນັກທິດສະດີ ຂອງທັງສອງຝ່າຍໄດ້ຜັດປ່ຽນກັນຂຶ້ນສະເໜີບົດປະກອບຄຳເຫັນຝ່າຍລະ 5 ບົດ, ລວມເປັນ 10 ບົດ. ພ້ອມກັນນັ້ນກໍໄດ້ມີການແລກປ່ຽນບົດຮຽນ ໃນແຕ່ລະບັນຫາ ດ້ວຍຄວາມຈິງໃຈ ແລະກົງໄປກົງມາຊຶ່ງໄດ້ມີຄວາມກະຈ່າງແຈ້ງທັງໃນແງ່ທິດສະດີວິທະຍາສາດ ແລະພຶດຕິກຳທີ່ມີຊີວິດຊີວາ, ມີຄວາມໝາຍສໍາຄັນໃຫ້ແກ່ການຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກປະຊາຊົນ ປະຕິວັດລາວແລະ ກອງປະຊຸມໃຫຍ່ຄັ້ງທີ XIII ຂອງພັກກອມມູນິດຫວຽດນາມ. ໃນຫົວຂໍ້ຫຍ່ອຍທີ່ປິ່ນອ້ອມ ເປັນຕົ້ນ: ຂະບວນການພັດທະນາຄວາມຮັບຮູ້ຂອງພັກກອມມູນິດຫວຽດນາມ ກ່ຽວກັບທີ່ຕັ້ງ ແລະ ບົດບາດຂອງວັດທະນະທໍາ ແລະ ປັດໄຈຄົນ ໃນພາລະກິດປ່ຽນແປງໃໝ່ຂອງປະເທດສັງຄົມນິຍົມ; ເສີມຂະຫຍາຍຄຸນຄ່າວັດທະນະທໍາທີ່ເປັນເອກະລັກຂອງຊາດ ແລະ ຮັບເອົາວັດທະນະທໍາ ທີ່ກ້າວໜ້າສີວິໄລຂອງມວນມະນຸດ; ການພັດທະນາຊັບພະຍາກອນມະນຸດຄຸນນະພາບສູງ ເພື່ອຕອບສະໜອງຄວາມຕ້ອງການຂອງການພັດທະນາຕາມທິດສັງຄົມນິຍົມ; ວັດທະນະທຳ, ສອດຄ່ອງກັບການເຕີບໂຕຂອງເສດຖະກິດ ແລະ ຄວາມກ້າວໜ້າ, ຄວາມຍຸຕິທຳໃນສັງຄົມ ແມ່ນທິດທາງພື້ນຖານອັນໜຶ່ງຂອງຂະບວນວິວັດແຫ່ງການກໍ່ສ້າງສັງຄົມນິຍົມຢູ່ຫວຽດນາມ; ການພັດທະນາສືມີແຮງງານລາວທີ່ມີຄຸນນະພາບຮອບດ້ານເພື່ອຮັບປະກັນສະຫວັດດີການສັງຄົມ; ພັດທະນາວັດທະນະທໍາ ແລະ ຄົນ ຢູ່ນະຄອນຫຼວງຮ່າໂນ້ຍ ໃນໄລຍະ 40 ປີ ແຫ່ງການປ່ຽນແປງໃໝ່; ການປົກປ້ອງສິດຜົນປະໂຫຍດຂອງພົນລະເມືອງລາວ ຕິດພັນກັບຜົນປະໂຫຍດຂອງຊາດ ແລະ ສິດເປັນເຈົ້າຂອງປະຊາຊົນ; ກໍ່ສ້າງ ແລະ ພັດທະນາຄົນຮອບດ້ານ, ຟື້ນຟູສິນລະທໍາ, ສ້າງຄ່ານິຍົມຂອງຄົນ ແລະ ວັດທະນະທຳຫວຽດນາມ ຕາມຈຸດໝາຍ: ປະຊາຊົນຮັ່ງມີ-ປະເທດຊາດມັ່ງຄັ່ງເຂັ້ມແຂງ-ປະຊາທິປະໄຕ-ຍຸຕິທຳ-ສີວິໄລ; ການຫັນແນວທາງ, ທັດສະນະ, ແຜນນະໂຍບາຍຂອງພັກ ກ່ຽວກັບການພັດທະນາວັດທະນະທໍາ, ກໍ່ສ້າງຄົນໃຫ້ໃຫ້ມີຄວາມຮູ້ຄວາມສາມາດປະຕິບັດຕາມກົດໝາຍ ແລະ ບັນດານະໂຍບາຍທີ່ເປັນຮູບປະທຳ; ວັດທະນະທໍາກັບການພັດທະນາເສດຖະກິດຢູ່ ສປປ ລາວ.ນອກນັ້ນ, ຄະນະຜູ້ແທນຂອງທັງສອງຝ່າຍຍັງໄດ້ຮ່ວມກັນແລກປ່ຽນ ແລະ ຖອດຖອນບົດຮຽນບັນຫາຕ່າງໆທີ່ທັງສອງຝ່າຍໃຫ້ຄວາມສົນໃຈ. 
ຂ່າວ-ພາບ:ສະພາທິດສະດີ