ອັນພົ້ນເດັ່ນກວ່າໝູ່ ແມ່ນຄວາມເປັນເອກະລາດ, ອໍານາດອະທິປະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດຊາດ ໄດ້ຮັບການປົກປັກຮັກສາໄດ້ຢ່າງໝັ້ນຄົງ, ລະບອບປະຊາທິປະໄຕປະຊາຊົນ ມີສະຖຽນລະພາບທາງດ້ານການເມືອງໜັກແໜ້ນ, ສັງຄົມມີຄວາມສະຫງົບປອດໄພ, ເສດຖະກິດຂະຫຍາຍຕົວ, ຊີວິດການເປັນຢູ່ຂອງປະຊາຊົນ, ບັນຫາປະກົດການຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມ ກໍໄດ້ຮັບການແກ້ໄຂ ແລະ ມີທ່າອ່ຽງດີຂຶ້ນຕາມລໍາດັບ.
ສະຫາຍ ເຫລັກໄຫລ ສີວິໄລ ກໍາມະການສູນກາງພັກ ເລຂາພັກແຂວງ ເຈົ້າແຂວງເຊກອງ ໄດ້ໃຫ້ສໍາພາດເມື່ອບໍ່ດົນຜ່ານມານີ້ ວ່າ: ຫວນຄືນ 41 ປີຜ່ານມາ, ຄະນະພັກ ແລະ ປະຊາຊົນບັນດາເຜົ່າຊາວແຂວງເຊກອງ ໄດ້ຕໍ່ສູ້ປົກປັກຮັກສາເຂດນໍ້າແດນດິນຂອງຕົນຢ່າງພິລະອາດຫານບໍ່ຍອມຈໍານົນຕໍ່ສັດຕູ (ຈັກກະພັດໂຕຮ້າຍກາດ) ປີ 1945 ເລີ່ມມີຮູບຮ່າງໜໍ່ແໜງກໍ່ສ້າງເຂດທີ່ໝັ້ນປະຕິວັດຢູ່ເມືອງດາກຈຶງ, ຊຶ່ງໃນໄລຍະນັ້ນມີຊື່ວ່າ: ສະຫະເມືອງຕາເວັນອອກ ປະກອບດ້ວຍ 7 ເມືອງ ຄື: ເມືອງດາກຈຶງ, ກະລຶມ, ເຊກອງໃຕ້, ເຊກອງເໜືອ, ຕະໂອ້ຍ, ວຽງທອງ ແລະ ເມືອງຊານໄຊ. ປີ 1957 ສູນກາງພັກ ໄດ້ຕົກລົງສ້າງຕັ້ງເປັນສະຫະເມືອງ ເພື່ອວາງແຜນການຕໍ່ສູ້ທາງດ້ານການເມືອງ-ການທະຫານ ໂດຍອີງໃສ່ສັນຍາເຊີແນວເປັນຫຼັກ ໄດ້ເຄື່ອນໄຫວປຸກລະດົມຄວາມສາມັກຄີບັນດາເຜົ່າເປັນກົກ.
ວັນທີ 28 ສິງຫາ 1961 ສູນກາງພັກ ໄດ້ຕົກລົງສ້າງຕັ້ງເປັນແຂວງຕາເວັນອອກ ແລະ ເປັນໄລຍະຕໍ່ສູ້ກູ້ຊາດຕ້ານກັບຈັກກະພັດຜູ້ຮຸກຮາກ ໂດຍພາຍໃຕ້ການເປັນຄັນທຸງຂອງບັນດາທ່ານການນໍາສະຫະເມືອງຕາເວັນອອກໃນເວລານັ້ນ ແລະ ໄດ້ຮັບການສະໜັບສະໜູນອຸ້ມຊູຊ່ວຍເຫຼືອຢ່າງແຮງກ້າ ຂອງປະຊາຊົນບັນດາເຜົ່າ; ຜ່ານຂະບວນວິວັດຂອງການຕໍ່ສູ້ກູ້ຊາດ ທີ່ເຕັມໄປດ້ວຍຄວາມຫຍຸ້ງຍາກລໍາບາກ, ລະອິດລະອ້ຽວ ແລະ ເຕັມໄປດ້ວຍຄວາມເສຍສະຫຼະເລືອດເນື້ອເຫື່ອແຮງຂອງບັນພະບູລຸດ ເພື່ອພາລະກິດປະຕິວັດອັນສູງສົ່ງ, ເພື່ອປະເທດຊາດບ້ານເກີດເມືອງນອນອັນແສນຮັກຂອງຕົນ, ລວມກັບປະຊາຊົນລາວບັນດາເຜົ່າ ໃນທົ່ວປະເທດສາມາດຍາດໄດ້ຄວາມເປັນເອກະລາດ ແລະ ໄຊຊະນະມາສູ່ ປະຊາຊົນຢ່າງແທ້ຈິງ. ຈາກແປວໄຟສົງຄາມຕ້ານຈັກກະພັດ ຍ້ອນການນໍາພາຂອງພັກ, ເຫັນໄດ້ຄວາມໂຫດຮ້າຍປ່າເຖື່ອນຂອງສັດຕູ; ລູກຫຼານຊາວແຂວງຕາເວັນອອກວິລະຊົນ (ແຂວງເຊກອງ) ຈຶ່ງມີຄວາມຄຽດແຄ້ນ, ໄດ້ອຸທິດຕົນ ທັງເລືອດເນຶ້ອເຫື່ອໄຄ, ເສຍສະຫຼະພັດພາກຈາກຄອບຄົວ ອອກໄປເປັນທະຫານຮັບໃຊ້ການປົດປ່ອຍຊາດ ຢູ່ບັນດາກົມກອງ-ເຫຼົ່າລົບຕ່າງໆ ແຕ່ໃຕ້ຮອດເໜືອ ລ້ວນແຕ່ມີລູກຫຼານຊາວແຂວງເຊກອງໄດ້ປະກອບສ່ວນ ຈົນໄດ້ຮັບນາມມະຍົດວິຊົນແຫ່ງຊາດ, ນັກຮົບແຂ່ງຂັນຈໍານວນຫຼາຍສະຫາຍ, ຍ້ອນການເສຍສະຫຼະເລືອດເນື້ອ ຂອງລູກຫຼານຄືແນວນັ້ນ, ພັກ-ລັດຖະບານ ຈຶ່ງຕົກລົງມອບນາມມະຍົດໃຫ້ແຂວງຕາເວັນອອກ (ເຊກອງປັດຈຸບັນ) ເປັນແຂວງວິລະຊົນ. ພ້ອມນີ້, ຍັງມີບັນດາເມືອງ, ຕາແສງ, ບ້ານ ແລະ ບຸກຄົນ ກໍໄດ້ຮັບນາມມະຍົດວິລະຊົນແຫ່ງຊາດເປັນຈຳນວນຫຼວງຫຼາຍ.
ແຂວງເຊກອງ ຜືນແຜ່ນດິນຢູ່ທາງພາກໃຕ້ດ້ານຕາເວັນອອກຂອງ ສປປ ລາວ, ເປັນເຂດປະຕິວັດລາວໃຕ້ ທີ່ປະທານ ຄໍາໄຕ ສີພັນດອນ, ທ່ານ ສະໝານ ວິຍະເກດ ເຄີຍດໍາລົງຊີວິດເຄື່ອນໄຫວປະຕິວັດ ແລະ ທັງເປັນເຂດເສັ້ນທາງໂຮ່ຈິມິນຫຼາຍເສັ້ນທາງຜ່ານອອກສູ່ສະໜາມຮົບປົດປ່ອຍພາກໃຕ້ຫວຽດນາມ.
ພາຍຫຼັງສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975 ສູນກາງພັກ ໄດ້ອອກຄໍາສັ່ງສະບັບເລກທີ 160 ໃຫ້ເຕົ້າໂຮມແຂວງຕາເວັນອອກ ເຂົ້າກັບແຂວງວາປີຄໍາທອງ ແລະ ແຂວງສາລະວັນ ໂດຍໃສ່ຊື່ວ່າ: ແຂວງສາລະວັນ. ແຕ່ເນື່ອງຈາກເນື້ອທີ່ຂອງແຂວງສາລະວັນກວ້າງໃຫຍ່, ເປັນເຂດທຸລະກັນດານພູສູງຊັນ, ເສັ້ນທາງເຂົ້າເຖິງບັນດາເມືອງມີຄວາມຫຍຸ້ງຍາກລໍາບາກ, ເຮັດໃຫ້ການເບິ່ງແຍງດູແລຊີວິດການເປັນຢູ່ຂອງປະຊາຊົນເຂດເບື້ອງຕາເວັນອອກມີຄວາມຫຍຸ້ງຍາກ-ບໍ່ທົ່ວເຖິງ ໂດຍປະຕິບັດຕາມດໍາລັດ ສະບັບເລກທີ 041/ປສລ, ລົງວັນທີ 14 ເມສາ 1984 ວ່າດ້ວຍການແບ່ງແຂວງສາລະວັນ ອອກເປັນ 2 ແຂວງ ຄື: ແຂວງເຊກອງ ແລະ ແຂວງສາລະວັນ. ນັບແຕ່ມື້ໄດ້ຮັບການສ້າງຕັ້ງ ມາຮອດປັດຈຸບັນ ແຂວງເຊກອງ ກໍມີອາຍຸໃກ້ຈະຄົບເກືອບ 41 ປີ. ກ່ອນໜ້ານີ້ 41 ປີ ແມ່ນເປັນເຂດພູດອຍຫ່າງໄກສອກຫຼີກທີ່ສຸດຂອງປະເທດ, ປະຊາຊົນຍັງມີແນວຄິດຄອງເດີມ, ເຊື່ອຖືງົມງວາຍ, ພະນັກງານ-ລັດຖະກອນຍັງຂາດເຂີນດ້ານປະລິມານ ແລະ ຄຸນນະພາບ, ພື້ນຖານໂຄງລ່າງດ້ານເສດຖະກິດ-ສັງຄົມບໍ່ທັນມີຫຍັງ, ເສັ້ນທາງຄົມມະນາຄົມ (ທາງບົກ) ສຸດທີ່ຫຍຸ້ງຍາກທຸລະກັນດານ, ເຮືອນຊານ-ບ້ານຊ່ອງຂອງປະຊາຊົນ ລວມທັງສໍານັກງານ-ຫ້ອງການຕ່າງໆຂອງລັດ ຂອງແຂວງແມ່ນມຸງຫຍ້າ, ແອ້ມຝາກະຕີ, ຊົ້ນຢູ່ຕາມຮົ່ມໄມ້; ຊີວິດການເປັນຢູ່ຂອງພະນັກງານ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າ ແມ່ນມີຄວາມຫຍຸ້ງຍາກຝືດເຄືອງ ແລະ ຂຶ້ນກັບທໍາມະຊາດ 100%. ແຕ່ດ້ວຍຈິດໃຈຟົດຟື້ນປະຕິວັດ, ຄວາມຮັກຊາດຮັກລະບອບໃໝ່, ຮັກຄວາມເປັນເອກະລາດອັນແຮງກ້າ ຂອງປະຊາຊົນບັນດາເຜົ່າຊາວແຂວງເຊກອງ ໂດຍພາຍໃຕ້ການນໍາພາ ຂອງພັກປະຊາຊົນປະຕິວັດລາວ ກໍຄື ຄະນະພັກ, ອໍານາດການປົກຄອງແຂວງແຕ່ລະສະໄໝ ໄດ້ສາມັກຄີກັນເປັນຈິດໜຶ່ງໃຈດຽວ, ສູ້ຊົນຜ່ານຜ່າຄວາມຫຍຸ້ງຍາກອຸປະສັກ ນາໆປະການ ແລະ ທັງເປັນການທົດສອບອັນຂ້ຽວຂາດສັບສົນທີ່ນັບບໍ່ຖ້ວນ.
ຕະຫລອດໄລຍະ 70 ປີ ພາຍໃຕ້ການນໍາພາຂອງພັກປະຊາຊົນປະຕິວັດລາວ ແລະ 41 ປີແຫ່ງການບຸກບືນສູ້ຊົນ ໂດຍມີມະຕິກອງປະຊຸມໃຫຍ່ອົງຄະນະພັກແຂວງ ສະໄໝທີ IV ຫາສະໄໝທີ X ເປັນເຂັມຊີ້ທິດເຍືອງທາງ ຊຶ່ງເຮັດໃຫ້ແຂວງເຊກອງ ໄດ້ຮັບການສ້າງສາພັດທະນານັບມື້ເຕີບໃຫຍ່ເຂັ້ມແຂງ ແລະ ມີການປ່ຽນແປງທີ່ໃຫຍ່ຫຼວງ, ອັນພົ້ນເດັ່ນທີ່ສຸດ ແມ່ນໄດ້ເສີມຂະຫຍາຍມູນເຊື້ອວິລະຊົນຂອງແຂວງ ກໍຄື ຂອງປະຊາຊົນບັນດາເຜົ່າ, ປັບປຸງກໍາລັງກອງຫຼອນ, ປກສ ບ້ານ, ສ້າງບ້ານປ້ອມໝັ້ນ, ກຸ່ມບ້ານສູ້ຮົບຕິດລຽນ ໄປພ້ອມໆກັບການຍົກປະລິມານ ແລະ ຄຸນນະພາບ ຂອງກໍາລັງທ້ອງຖິ່ນເປັນປົກກະຕິ ຊຶ່ງສາມາດທັບມ້າງກົນອຸບາຍຂອງພວກຄົນບໍ່ດີ ແລະ ອິດທິກໍາລັງປໍລະປັກ ເຮັດໃຫ້ແຂວງເຊກອງມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍໃນທົ່ວສັງຄົມໂດຍພື້ນຖານ. ແຂວງໄດ້ຈັດຕັ້ງປະຕິບັດແນວທາງປ່ຽນແປງໃໝ່ຮອບດ້ານຢ່າງມີຫຼັກການຂອງພັກ, ການສ້າງສາພັດທະນາເສດຖະກິດ-ສັງຄົມ ຂອງແຂວງກ້າວເຂົ້າສູ່ຄຸນນະພາບໃໝ່ ແລະ ຫັນປ່ຽນຈາກການຜະລິດທໍາມາຫາກິນແບບທໍາມະຊາດ ໄປສູ່ການຜະລິດສິນຄ້າເທື່ອລະກ້າວ.
ບັນດາພື້ນຖານໂຄງລ່າງ, ດ້ານເສດຖະກິດ ໄດ້ຮັບການປັບປຸງ, ແກ້ໄຂ ແລະ ກໍ່ສ້າງໃໝ່ເປັນຈໍານວນຫຼວງຫຼາຍ ໂດຍສະເພາະແມ່ນລະບົບເສັ້ນທາງຄົມມະນາຄົມຂົນສົ່ງ, ລະບົບໄຟຟ້າ, ນໍ້າປະປາ (ນໍ້າສະອາດ) ໄດ້ຮັບການລົງທຶນກໍ່ສ້າງ ແລະ ຂະຫຍາຍຕົວອອກສູ່ຊົນນະບົດຫ່າງໄກສອກຫຼີກ; ການລົງທຶນຂອງລັດ, ການລົງທຶນຂອງເອກະຊົນພາຍໃນ ແລະ ຕ່າງປະເທດນັບມື້ເພີ່ມຂຶ້ນ ໂດຍສະເພາະການລົງທຶນໃນຂົງເຂດພະລັງງານ ແລະ ບໍ່ແຮ່ ເປັນຕົ້ນ ໂຄງການກໍ່ສ້າງເຂື່ອນໄຟຟ້ານໍ້າຕົກ, ໂຄງການກໍ່ສ້າງໄຟຟ້າພະລັງງານລົມ ແລະ ໂຄງການອື່ນໆ ທີ່ກໍາລັງລົງມືຈັດຕັ້ງປະຕິບັດ ຊຶ່ງໄດ້ປະກອບສ່ວນພັດທະນາຊຸມຊົນ, ສ້າງວຽກເຮັດງານທໍາ, ສ້າງອາຊີບໃຫ້ປະຊາຊົນ ອັນໄດ້ເຮັດໃຫ້ຊີວິດການເປັນຢູ່ຂອງປະຊາຊົນໄດ້ຮັບການພັດທະນາດີຂຶ້ນ; ການພັດທະນາຂົງເຂດວັດທະນະທໍາ-ສັງຄົມ ໄດ້ຮັບການເອົາໃຈໃສ່ຢ່າງຕັ້ງໜ້າ, ພື້ນຖານໂຄງລ່າງດ້ານການສຶກສາ ແລະ ສາທາລະນະສຸກ ໄດ້ຮັບການຂະຫຍາຍຕົວອອກສູ່ຊົນນະບົດ, ຫຼາຍບ້ານ ແລະ ຫຼາຍກຸ່ມບ້ານ ໄດ້ມີໂຮງຮຽນ, ສຸກສາລາ ແລະ ຖົງຢາປະຈໍາບ້ານ; ຂະນະທີ່ປະຊາຊົນ ກໍໄດ້ເຂົ້າເຖິງການບໍລິການດ້ານການສຶກສາ ແລະ ການບໍລິການດ້ານສາທາລະນະສຸກຢ່າງທົ່ວເຖິງໂດຍພື້ນຖານ; ສິລະປະ-ວັນນະຄະດີ, ວັດທະນະທໍາ-ຮີດຄອງປະເພນີອັນດີງາມຂອງບັນດາເຜົ່າ ໄດ້ຮັບການອະນຸລັກ, ສົ່ງເສີມ ແລະ ພັດທະນານັບມື້ດີຂຶ້ນ; ການປະຕິບັດນະໂຍບາຍຕອບບຸນແທນຄຸນໃຫ້ແກ່ພະນັກງານອາວຸໂສປະຕິວັດ, ຜູ້ມີຜົນງານ ແລະ ຄຸນງາມຄວາມດີຕໍ່ການປະຕິວັດຊາດ ປະຊາທິປະໄຕໃນເມື່ອກ່ອນ ໄດ້ຮັບການເອົາໃຈໃສ່ປະຕິບັດຢ່າງຕໍ່ເນື່ອງ.
ສະຫາຍ ເຫລັກໄຫລ ສີວິໄລ ກ່າວຕື່ມວ່າ: 41 ປີ ແຫ່ງການປົກປັກຮັກສາ ແລະ ສ້າງສາພັດທະນາແຂວງເຊກອງ ພວກເຮົາສາມາດຜ່ານພົ້ນຄວາມຫຍຸ້ງຍາກ, ການທົດສອບອັນລະອິດລະອ້ຽວ ແລະ ສາມາດຍາດໄດ້ໄຊຊະນະອັນໃຫຍ່ຫຼວງ ແລະ ສໍາຄັນຫຼາຍດ້ານ. ທັງໝົດເຫຼົ່ານີ້ ແມ່ນຍ້ອນການນໍາພາ-ຊີ້ນໍາຢ່າງໃກ້ຊິດຕິດແທດ ຂອງພັກປະຊາຊົນປະຕິວັດລາວ. ດັ່ງນັ້ນ, ພວກເຮົາຕ້ອງສືບຕໍ່ເສີມຂະຫຍາຍມູນເຊື້ອອັນດີງາມດັ່ງກ່າວ, ເພີ່ມທະວີຄວາມສາມັກຄີເປັນເອກະພາບໃຫ້ແໜ້ນແຟ້ນ, ເຊີດຊູນໍ້າໃຈຮັກຊາດ, ຮັກບ້ານເກີດເມືອງນອນ ແລະ ພ້ອມກັນຫັນເອົາແນວທາງ ກໍຄື ມະຕິຕ່າງໆ ຂອງພັກ ໄປຈັດຕັ້ງປະຕິບັດໃຫ້ເປັນຮູບປະທໍາຕົວຈິງ ເພື່ອສ້າງທ່ວງທ່າການຂະຫຍາຍຕົວໃໝ່, ເຮັດໃຫ້ແຂວງເຊກອງຫຼຸດພົ້ນອອກຈາກຄວາມດ້ອຍພັດທະນາ ແລະ ແກ້ໄຂຄວາມທຸກຍາກຂອງປະຊາຊົນຫຼຸດລົງເທື່ອລະກ້າວ.
(ແຫຼ່ງຂ່າວ: ແຂວງເຊກອງ)
ຄໍາເຫັນ