ຈາກອ່າງໂຕ່ງແບບຍືນຍົງໜາດນ້ອຍ ນໍ້ານ້ອຍ (ຜົ້ງສາລີ), ນໍ້າໄດ້ (ຊຽງຂວາງ) ແລະ ນໍ້າເຊືອງ (ຫຼວງພະບາງ) ທັດສະນະສຶກສາ ເບິ່ງກິດຈະກຳການປູກ, ການລ້ຽງຂອງຊາວກະສິກອນ ຢູ່ແຂວງອຸດົມໄຊ ເປັນຕົ້ນແມ່ນ ການປູກຜັກເຮືອນຮົ່ມ ຢູ່ບ້ານວຽງສາເມືອງໄຊ, ການລ້ຽງເຜິ້ງແບບຍືນຍົງ, ການປູກຜັກແບບປະສົມ ປະສານ ຢູ່ບ້ານຫ້ວຍຫຼາ, ການປູກໄມ້ໃຫ້ໝາກແບບປະສົມປະສານ ບ້ານ ໜອງບົວ ເມືອງຫຼາ, ສວນໝາກສີດາ ບ້ານດອນແກ້ວ ແລະ ສວນຜັກ ຂອງສູນກະສິກຳຮ່ວມມືລາວ-ຈີນ.
ທັງນີ້ ກໍເພື່ອໃຫ້ຜູ້ເຂົ້າຮ່ວມໄດ້ຮັບຮູ້ການເຮັດນິເວດກະສິກໍາຕົວຈິງທີ່ໄດ້ຮັບຜົນສໍາເລັດຜ່ານມາ ເພື່ອເຮັດໃຫ້ຊາວກະສິກອນຈາກ 3 ອ່າງໂຕ່ງດັ່ງກ່າວ ໄດ້ຮຽນຮູ້ການຫັນປ່ຽນສູ່ນິເວດກະສິກໍາທີ່ປະສົບຜົນສາເລັດ ເພື່ອນໍາບົດຮຽນດັ່ງກ່າວ, ໄປຍົກລະດັບການຜະລິດກະສິກຳທີ່ເປັນມິດກັບອ່າງໂຕ່ງຂອງເຂົາເຈົ້າ. ຊຸກຍູ້ໃຫ້ຊາວກະສິກອນນໍາເອົາແບບຢ່າງນິເວດກະສິກຳໄປປະຕິດບັດຕົວຈິງ ໂດຍຜ່ານການແລກປ່ຽນປະສົບການ ເພື່ອສົ່ງເສີມເຕັກນິກການປູກພືດແບບປະດິດສ້າງໃນບົດຮຽນໃໝ່ໆ. ສ້າງເຄືອຄ່າຍເພື່ອສືບຕໍ່ແລກປ່ຽນຄວາມຮູ້ ແລະ ການຮ່ວມມືວຽກງານນິເວດກະສິກຳຕິດພັນກັບການຮັບປະກັນຄວາມຍືນຍົງຂອງອ່າງໂຕ່ງເຂດເນີນສູງພາກເໜືອໃນຕໍ່ໜ້າ.
ການທັດສະນະສຶກສາຄັ້ງນີ້, ມີຜູ້ເຂົ້າຮ່ວມທັງໝົດ 33 ທ່ານ ປະກອບດ້ວຍ ຄະນະວິຊາການຈາກ ຫ້ອງການກະສິກຳ ແລະ ປ່າໄມ້ ຂອງບັນດາເມືອງເປົ້າໝາຍ, ຮອງຫົວໜ້າທິມງານ SWAN IP2, ບັນດາຊ່ຽວຊານນິເວດກະສິກຳ, ຜູ້ປະສານງານຊຸມຊົນ ແລະ ຊາວກະສິກອນ ຈາກອ່າງໂຕ່ງເປົ້າໝາຍຂອງໂຄງການ; ໃນການລົງທັດສະນະສຶກສາຄັ້ງນີ້ ນຳໂດຍທ່ານ ນາງ ສອນພາວັນ ຫລຽ່ມພະຈັນ ຮອງຫົວໜ້າທິມງານ ສາຫວັນ ໄອພິສອງ (swan - ip2), ມີທ່ານ ສົມໃຈ ຈັນທະວົງ ຊ່ຽວຊານ ນິເວດກະສິກຳປະຈຳໂຄງການ swan - ip2 ພ້ອມດ້ວຍ ທິມງານ ຊ່ຽວຊານ ຜູ້ປະສານງານ ແລະ ຊາວກະສິກອນຈາກໂຄງການໃນສາມແຂວງເຂົ້າຮ່ວມ.
(ຂ່າວ: ແສງອາທິດ)
ຄໍາເຫັນ