ເວົ້າລວມແມ່ນສະມາຊິກພັກ ແລະ ການນຳຂອງພັກທຸກຂັ້ນ ຊຶ່ງມີຖັນແຖວພະນັກງານ, ສະມາຊິກພັກ ທີ່ເຮັດວຽກງານໂຄສະນາອົບຮົມຂອງພັກເປັນເສນາທິການ, ເປັນໃຈກາງ ແລະ ມີຄວາມຮັບຜິດຊອບໂດຍກົງ.
2. ວຽກງານໂຄສະນາອົບຮົມ ໄດ້ຕິດພັນກັບຂະບວນການ ການເຄື່ອນໄຫວນຳພາຂອງຄະນະພັກແຄ້ວນລາວ ແລະ ບຸກຄົນການນຳຂອງພັກເຮົາໃນແຕ່ລະໄລຍະ.
ໃນຄວາມເປັນຈິງ ນັບແຕ່ມື້ເລີ່ມຕົ້ນຂອງຂະບວນການຕໍ່ສູ້ຕ້ານການຮຸກຮານ ຈາກສັດຕູພາຍນອກລ້ວນແລ້ວແຕ່ແມ່ນບຸກຄົນຜູ້ນຳໜ້າ ຫຼື ຜູ້ນຳຂະບວນການເປັນຜູ້ເຮັດວຽກປຸກລຸກຂົນຂວາຍ, ປຸກລະດົມຂະບວນການ. ໄລຍະເບື້ອງຕົ້ນຂອງການເຮັດວຽກງານໂຄສະນາອົບຮົມຂອງພັກ ຄະນະແຄ້ວນລາວ ແລະ ບັນດາບຸກຄົນທີ່ໂດດເດັ່ນໃນການເຮັດວຽກງານໂຄສະນາອົບຮົມ ເຊັ່ນ: ປະທານ ໄກສອນ ພົມວິຫານ, ປະທານ ສຸພານຸວົງ, ປະທານ ຄຳໄຕ ສີພັນດອນ, ທ່ານ ພູມີ ວົງວິຈິດ ແລະ ບຸກຄົນການນຳຜູ້ອື່ນໆ.
1. ຂະບວນການເຮັດວຽກງານໂຄສະນາອົບຮົມ ໃນປີ 1934-1935 ພາຍໃຕ້ການນຳພາຂອງຄະນະພັກແຄ້ວນລາວ.
ຄະນະພັກແຄ້ວນລາວ ໄດ້ຮັບການສ້າງຕັ້ງຂຶ້ນໃນກອງປະຊຸມຄັ້ງວັນທີ 6-7 ກັນຍາ 1934 ທີ່ດອນຊິງຊູ້ນະຄອນຫຼວງວຽງຈັນ. ເບື້ອງຕົ້ນກອງປະຊຸມກໍໄດ້ຖືສຳຄັນວຽກງານສຶກສາອົບຮົມຜ່ານ “ກອງປະຊຸມ”ແລະ ຖືເອົາ “ສື່”ເປັນການໂຄສະນາອົບຮົມ. ການໂຄສະນາອົບຮົມຜ່ານສື່ກໍແມ່ນໜຶ່ງໃນສອງຮູບການເບື້ອງຕົ້ນ ໂດຍຖືເອົາສື່ສິ່ງພິມຕ່າງໆ ເຊັ່ນ: ໜັງສືພິມແວ່ນລວມ (ເກືອງຈຸງ), ໜັງສືພິມເພື່ອນໜຸ່ມ, ໜັງສືພິມໜຸ່ມເລນິນ, ໜັງສືພິມເພື່ອນນາຍຊ່າງ, ໜັງສືພິມນັກຮຽນ ແລະ ປຶ້ມເສັ້ນທາງການປະຕິວັດຂອງສະຫາຍ ຫງວຽນອາຍກວັກ ແລະ ປຶ້ມສັດຈະວິພາກປະຫວັດສາດ ເບື້ອງຕົ້ນເປັນເຄື່ອງມືເຂົ້າໃນການໂຄສະນາສຶກສາອົບຮົມບັນດາຊັ້ນຄົນ, ນັກຮຽນ, ນັກສຶກສາ, ກຳມະກອນ ແລະ ປະຊາຊົນຊັ້ນຄົນຜູ້ອອກແຮງງານ ໃຫ້ເຫັນໄດ້ເສັ້ນທາງປະຕິວັດ ແລະ ລຸກຂຶ້ນເຮັດການປະຕິວັດປົດປ່ອຍຕົນເອງ.
2. ການເຄື່ອນໄຫວນຳພາປຸກລຸກຂົນຂວາຍຂອງປະທານ ໄກສອນ ພົມວິຫານ ໃນປີ1945ແລະ ກ້າວໄປເຖິງການປະກາດສ້າງຕັ້ງກອງລາດຊະວົງ ໃນປີ 1949.
- ປະທານ ໄກສອນ ພົມວິຫານ ເປັນນັກຍຸດທະສາດຍຸດທະວິທີທີ່ສະຫຼາດສ່ອງໃສ,ຍາມໃດເພິ່ນກໍໄດ້ເອົາການເຄື່ອນໄຫວຂອງຕົນ ຕິດແໜ້ນກັບຂະບວນການປຸກລຸກຂົນຂວາຍ, ເພິ່ນຖືເອົາການໂຄສະນາອົບຮົມເປັນໜ້າວຽກເລີ່ມຕົ້ນທັງມີຄວາມຈຳເປັນຕ້ອງໄດ້ເຮັດແຕ່ຫົວທີໂລດ ຊຶ່ງສະແດງອອກໃນພຶດຕິກຳຂອງເພິ່ນຢູ່ໃນຂະບວນການຕ່າງໆ ໂດຍສະເພາະແມ່ນໃນວັນທີ 13 ສິງຫາ ປີ 1945 ປະທານ ໄກສອນ ພົມວິຫານ ພ້ອມດ້ວຍຄະນະຊາວສະຫວັນນະເຂດໄປປຸກລະດົມຂົນຂວາຍທະຫານຍີ່ປຸ່ນ ສາມາດເຮັດໃຫ້ທະຫານຍີ່ປຸ່ນຕ້ອງຍອມມອບປືນຈຳນວນ 120 ກະບອກ ພ້ອມດ້ວຍລູກປືນອີກຈຳນວນຫຼາຍຫີບໃຫ້ພວກເພິ່ນ.
- ຍ້ອນຜົນງານ ແລະ ຜົນສໍາເລັດໃນການນໍາພາຕົວຈິງ ປະທານ ໄກສອນ ພົມວິຫານ ຈຶ່ງຖືກແຕ່ງ
ຕັ້ງໃຫ້ເປັນຫົວໜ້າພະແນກຖະແຫຼງຂ່າວໂຄສະນາຂອງແຂວງສະຫວັນນະເຂດ, ມາຮອດປີ 1947 ປະທານ ໄກສອນ ພົມວິຫານ ໄດ້ເຂົ້າເຮັດວຽກຢູ່ຫ້ອງການໂຄສະນາກອງບັນຊາການເຂດ 12.
- ປີ 1948 ປະທານ ໄກສອນ ພົມວິຫານ ໄດ້ນຳພາສ້າງກອງຕະລຸມບອນເຂດລາວເໜືອຂຶ້ນ ໂດຍແມ່ນເພິ່ນເອງເປັນຫົວໜ້າກອງຕະລຸມບອນ, ກອງຕະລຸມບອນແມ່ນເຮັດໜ້າທີ່ໂຄສະນາປະກອບອາວຸດ; ເຮັດໜ້າທີ່ກໍ່ສ້າງຮາກຖານການເມືອງ, ປຸກລຸກຂົນຂວາຍປະຊາຊົນ ທັງຕີສັດຕູໄປພ້ອມ ເຮັດໃຫ້ກຳລັງນັບມື້ເຂັ້ມແຂງທັງປະລິມານ ແລະ ຄຸນນະພາບ ໄດ້ເພີ່ມຂຶ້ນຈົນສາມາດນຳພາສ້າງຕັ້ງກອງລາດຊະວົງ ໃນປີ 1949 ຊຶ່ງເປັນການກຳເນີດກອງທັບປະຊາຊົນລາວຂອງພວກເຮົາໃນວັນທີ 20 ມັງກອນ 1949.
3. ການເຄື່ອນໄຫວປຸກລຸກຂົນຂວາຍຂອງປະທານ ຄຳໄຕ ສີພັນດອນ ໃນການສ້າງຕັ້ງກອງໂຄສະນາປະກອບອາວຸດ ປະສານສົມທົບກັບກອງໄຊຈັກກະພັດເຂດໃຕ້ລາວ (1948) ແລະ ລົງແກ້ໄຂສະພາບການຢູ່ພາກກາງ 1952.
- ປີ 1948 ປະທານ ຄຳໄຕ ສີພັນດອນ ໃນນາມເປັນຜູ້ແທນລັດຖະບານລາວອິດສະຫຼະປະຈຳຢູ່ເຂດຕໍ່ຕ້ານລາວໃຕ້ ເພິ່ນໄດ້ນຳພາສ້າງກອງໂຄສະນາປະກອບອາວຸດຂຶ້ນ 10 ກອງ ເພື່ອເຮັດວຽກໂຄສະນາປຸກລະດົມຂົນຂວາຍປະຊາຊົນໃຫ້ເຂົ້າຮ່ວມຂະບວນການຕໍ່ສູ້. ຜ່ານການເຄື່ອນໄຫວໃນວຽກງານດັ່ງກ່າວ ໄດ້ເຮັດໃຫ້ເຂດຕໍ່ຕ້ານລາວໃຕ້ປະສົບຜົນສຳເລັດ, ເຂດທີ່ໝັ້ນຮາກຖານໄດ້ຖືກສ້າງຂຶ້ນຢູ່ໃນຫຼາຍບ່ອນ, ກໍາລັງທະຫານນັບມື້ເພີ່ມຂຶ້ນ ສາມາດເປັນກຳລັງໜູນ ສະໜອງໃຫ້ແກ່ກອງກຳລັງໃນທົ່ວປະເທດ, ປະຊາຊົນກໍໄດ້ໃຫ້ການສະໜັບສະໜູນອູ້ມຊູຊ່ວຍເຫຼືອນັບມື້ກວ້າງຂວາງ ແລະ ຫຼາຍຂຶ້ນ ເຮັດໃຫ້ການຕໍ່ຕ້ານຢູ່ພາກໃຕ້ໄດ້ຂະຫຍາຍຕົວຢ່າງໄວວາ.
- ປີ 1952 ໃນໄລຍະຢູ່ພາກກາງຂອງລາວ ເຂດບົວລະພາ ແຂວງຄຳມ່ວນ ກຳລັງຂອງຝ່າຍແນວລາວອິດສະຫຼະມີຄວາມສັບສົນ ຍ້ອນພຶດຕິກຳການເຄື່ອນໄຫວບໍ່ຕ່າງຫຍັງກັບການທະຫານຝ່າຍຂວາວຽງຈັນ ຈຶ່ງເຮັດໃຫ້ປະຊາຊົນເສື່ອມສັດທາຕໍ່ກຳລັງຂອງພວກເຮົາ. ປະທານ ຄຳໄຕ ສີພັນດອນ ໃນນາມຕາງໜ້າໃຫ້ສູນກາງລົງແກ້ໄຂ ໂດຍການສຶກສາອົບຮົມປຸກລະດົມ ກໍສາມາດເຮັດໃຫ້ສະພາບຂອງກຳລັງໄດ້ມີຄວາມສະຫງົບ, ເຂັ້ມແຂງ ແລະ ຂະຫຍາຍຕົວກວ້າງອອກ.
4. ການເຄື່ອນໄຫວເຮັດວຽກງານໂຄສະນາຂອງ ທ່ານ ພູມີ ວົງວິຈິດ ໃນປີ 1947-1948.
ປີ 1947 ຄະນະຕໍ່ຕ້ານແນວລາວອິດສະຫຼະໄດ້ແຕ່ງຕັ້ງໃຫ້ທ່ານ ພູມີ ວົງວິຈິດ ເປັນປະທານຕໍ່ຕ້ານເຂດ 2 (ຫົວຂອງ-ນ້ຳທາ) ຊຶ່ງເປັນຜູ້ເຮັດວຽກງານໂຄສະນາອົບຮົມຂົນຂວາຍປຸກລະດົມພະນັກງານ, ທະຫານ ແລະ ປະຊາຊົນໃຫ້ເຂົ້າຮ່ວມການຕໍ່ສູ້ຂອງກຳລັງປະຕິວັດ ໂດຍເພິ່ນໄດ້ຖືເອົາປຶ້ມການດັດແປງວິທີເຮັດວຽກ ຂອງປະທານ ໂຮ່ຈິມິນ ແລະ ໜັງສືພິມກູ້ຊາດເປັນເຄື່ອງມືໃນການເຮັດວຽກງານໂຄສະນາອົບຮົມໃນເບື້ອງຕົ້ນ ຈຶ່ງສາມາດເຮັດໃຫ້ກຳລັງປຸກລຸກຂົນຂວາຍໄດ້ຂະຫຍາຍຕົວໄວ, ກອງໂຄສະນາປະກອບອາວຸດກໍໄດ້ຮັບການສ້າງຕັ້ງຂຶ້ນ ແລະ ເຄື່ອນໄຫວຢ່າງເປັນຂະບວນການ.
5. ການເຄື່ອນໄຫວປຸກລຸກຂົນຂວາຍຂອງບັນດາຜູ້ນຳເຮົານຳໂດຍປະທານ ສຸພານຸວົງ ເພື່ອໂຕນອອກຈາກຄຸກໂພນເຄັງ ໃນປີ 1959-1960.
ຂະບວນການສຶກສາອົບຮົມ, ປຸກລຸກຂົນຂວາຍ ຂອງຜູ້ນຳທີ່ຖືກຄຸມຂັງຢູ່ຄຸກໂພນເຄັງ ຊຶ່ງນຳໂດຍປະ
ທານ ສຸພານຸວົງ, ທ່ານ ໜູຮັກ ພູມສະຫວັນ ແລະ ບຸກຄົນການນຳຜູ້ອື່ນໆ ຊຶ່ງພວກເພິ່ນໄດ້ກາຍເປັນນັກປຸກລະດົມທີ່ຄ່ອງແຄ້ວ, ສະຫຼຽວສະຫຼາດ ສາມາດເຮັດໃຫ້ສາລະວັດທະຫານທີ່ຄຸ້ມກັນນັກໂທດກາຍມາເປັນຜູ້ຮັບໃຊ້ໃນການປ້ອງກັນການໂຕນຄຸກດ້ວຍຄວາມພິລະອາດຫານ ແລະ ປອດໄພ.
ຜ່ານພຶດຕິກຳຂອງຂະບວນການໂຄສະນາປຸກລະດົມຂົນຂວາຍ ຂອງບັນພະບູລຸດລາວເຮົາໃນແຕ່ລະຍຸກ, ແຕ່ລະສະໄໝ ກໍຄືຜູ້ນຳປະຕິວັດຮຸ່ນອາວຸໂສ ແລະ ພະນັກງານສະມາຊິກພັກ ໃນຂະບວນການຕໍ່ສູ້ປະຕິ ວັດ ຈຶ່ງສາມາດສະຫຼຸບໄດ້ວ່າ: ວຽກງານໂຄສະນາອົບຮົມແມ່ນໜ້າທີ່ຄວາມຮັບຜິດຊອບຂອງຜູ້ນຳພາຂະບວນການໃນແຕ່ລະໄລຍະ. ພາຍຫຼັງມີພັກນຳພາວຽກງານດັ່ງກ່າວກໍແມ່ນຄວາມຮັບຜິດຊອບໂດຍກົງຂອງຄະນະພັກທຸກຂັ້ນ ແລະ ສະມາຊິກພັກທຸກຄົນ. ຖ້າຢາກໃຫ້ການເຄື່ອນໄຫວຂອງວຽກງານໂຄສະນາອົບຮົມໄດ້ດີ, ມີປະສິດທິພາບສູງ ຜູ້ທີ່ເຮັດວຽກງານໂຄສະນາອົບຮົມຕ້ອງແມ່ນພະນັກງານຫຼັກແຫຼ່ງຂອງພັກ ທີ່ມີຫຼັກໝັ້ນຊົນຊັ້ນໜັກແໜ້ນ, ມີແນວຄິດ ແລະ ອຸດົມການປະຕິວັດຈະແຈ້ງ, ມີພາວະການເປັນຜູ້ນຳ, ມີບົດບາດອິດທິພົນພາຍໃນພັກ, ພາຍໃນການຈັດຕັ້ງການເມືອງ-ສັງຄົມ ແລະ ມະຫາຊົນ. ພ້ອມກັນນັ້ນກໍຕ້ອງມີຄວາມຮູ້, ຄວາມສາມາດທາງດ້ານວິຊາການໃນລະດັບທີ່ແນ່ນອນ, ມີຄວາມເປັນແບບຢ່າງທາງດ້ານຈິດສຳນຶກ ແລະ ພຶດຕິກຳ, ມີແນວຄິດເສຍສະຫຼະສູງສົ່ງ ແລະ ຮັກອາຊີບ.
(ຂໍ້ມູນຈາກ: ກົມອົບຮົມ ຄອສພ)
ຄໍາເຫັນ