 |
ການລົງເຄື່ອນໄຫວຄັ້ງນີ້, ທ່ານປະທານຄະນະກວດກາສູນກາງພັກໄດ້ຮັບຟັງການລາຍງານຫຍໍ້ສະພາບລວມ ແລະ ການພັດທະນາເສດຖະກິດ-ສັງຄົມ ພ້ອມດ້ວຍການກະກຽມໃຫ້ແກ່ວຽກງານການເລືອກຕັ້ງ ສະມາຊິກສະພາແຫ່ງຊາດ (ສສຊ) ຊຸດທີ X ແລະ ສະມາຊິກສະພາປະຊາຊົນແຂວງ ຊຸດທີ V ຈາກການນໍາທັງສອງເມືອງ. ຈາກນັ້ນ, ທ່ານ ວັນໄຊ ພອງສະຫວັນ ກໍໄດ້ສະແດງເຖິງຄວາມເປັນຫ່ວງເປັນໃຍ ແລະ ສະແດງຄວາມຂອບໃຈ ທີ່ໄລຍະຜ່ານມາ ພວກເຮົາໄດ້ສຸມໃສ່ຈັດຕັ້ງປະຕິບັດ ມະຕິກອງປະຊຸມໃຫຍ່ຂອງອົງຄະນະພັກເມືອງ, ອົງຄະນະພັກແຂວງ ກໍ່ຄືແຜນພັດທະນາເສດຖະກິດ-ສັງຄົມ ພາຍໃຕ້ການນໍາພາ-ຊີ້ນໍາ ຂອງການນໍາຂັ້ນແຂວງ, ຂັ້ນເມືອງ ກໍຄືການສະໜັບສະໜູນ ການຮ່ວມມືຈາກອຳນາດການົກຄອງບ້ານ ແລະ ພໍ່ແມ່ປະຊາຊົນ ຈົນຍາດໄດ້ຜົນງານຮ່ວມກັນ ແລະ ມີຜົນສຳເລັດໃນຫຼາຍໆດ້ານ. ເພື່ອສືບຕໍ່ຈັດຕັ້ງປະຕິບັດແນວທາງນະໂຍບາຍ, ມະຕິຄໍາສັ່ງຕ່າງໆ ແລະ ເພື່ອຍົກລະດັບຊີວິດການເປັນຢູ່ຂອງພະນັກງານ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າ ໃນ 5 ປີຕໍ່ໜ້າ. ພ້ອມທັງໄດ້ຮຽກຮ້ອງໃຫ້ການນໍາຂອງເມືອງ ຈົ່ງໄດ້ເອົາໃຈໃສ່ຜັນຂະຫຍາຍ ເຊື່ອມຊຶມມະຕິກອງປະຊຸມໃຫຍ່ຂອງອົງຄະນະພັກເມືອງໃຫ້ພະນັກງານຫຼັກແຫຼ່ງ, ພໍ່ແມ່ປະຊາຊົນ ໄດ້ຮັບຮູ້ ເຂົ້າໃຈ ແລະ ໃຫ້ເຂົາເຈົ້າໄດ້ເຂົ້າຮ່ວມໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງເມືອງໃຫ້ບັນລຸຕາມລະດັບຄາດໝາຍ, ເອົາໃຈໃສ່ວຽກງານປ້ອງກັນຊາດ-ປ້ອງການຄວາມສະຫງົບ ຕິດພັນກັບການແກ້ໄຂປະກົດການຫຍໍ້ທໍ້ໃນສັງຄົມໃຫ້ມີຄວາມເຂັ້ມແຂງ, ສືບຕໍ່ສົ່ງເສີມການຜະລິດພາຍໃນ, ຍູ້ແຮງການຜະລິດກະສິກຳກາຍເປັນສິນຄ້າ ຕິດພັນກັບການສ້າງກຸ່ມຜະລິດ ເພື່ອເຂົ້າເຖິງການຕະຫຼາດໄດ້ຫຼາຍຂຶ້ນ, ເສີມຂະຫຍາຍ ການຜະລິດສິນຄ້າທີ່ເປັນພູມປັນຍາຂອງຊາວບ້ານ, ເອົາໃຈໃສ່ປົກປັກຮັກສາປ່າໄມ້, ທີ່ດິນ ແລະ ແຫຼ່ງນໍ້າ ໃຫ້ມີຄວາມຍືນຍົງ, ເອົາໃຈໃສ່ໃນການແກ້ໄຂຄວາມທຸກຍາກຂອງປະຊາຊົນ ແລະ ເອົາໃຈໃສ່ໃນການປັບປຸງພື້ນຖານໂຄງລ່າງ, ເສັ້ນທາງຄົມມະນາຄົມ, ຊົນລະປະທານ, ພັດທະນາວຽກງານການສຶກສາ, ສາທາລະນະສຸກ ເພື່ອສ້າງເງື່ອນໄຂອຳນວຍຄວາມສະດວກໃຫ້ພໍ່ແມ່ປະຊາຊົນ ໄດ້ໄປມາຫາສູ່, ແລກປ່ຽນຊື້-ຂາຍ ສິນຄ້າ, ຜົນຜະລິດ ແລະ ເຂົ້າເຖິງການບໍລິການທາງດ້ານການສຶກສາ, ສາທາລະນະສຸກ ໄດ້ຢ່າງທົ່ວເຖິງ ເພື່ອແນໃສ່ພັດທະນາຊີວິດການເປັນຢູ່ຂອງປະຊາຊົນໃຫ້ມີບາດກ້າວຂະຫຍາຍຕົວດີຂຶ້ນ.
 |
ໂອກາດນີ້, ທ່ານ ວັນໄຊ ພອງສະຫວັນ ຍັງໄດ້ມອບອຸປະກອນການແພດໃຫ້ແກ່ໂຮງໝໍເມືອງມະຫາໄຊ ແລະ ມອບອຸປະກອນການຮຽນ, ອຸປະກອນການຫຼິ້ນກິລາ, ເຂົ້າສານ ແລະ ເຄື່ອງບໍລິໂພກ ຈໍານວນໜຶ່ງໃຫ້ແກ່ ເມືອງມະຫາໄຊ ແລະ ເມືອງຍົມມະລາດ.
 |
(ຂ່າວ-ພາບ: ກອງຄໍາ)
ຄໍາເຫັນ